Read Gujarati Common Language Bible - પવિત્ર બાઇબલ C.L. ગીતશાસ્ત્ર 33 Bible Online

ગીતશાસ્ત્ર 33 - Gujarati Common Language Bible - પવિત્ર બાઇબલ C.L. bible

ગીતશાસ્ત્ર 33

¹હે નેકજનો, પ્રભુમાં આનંદ કરો; હે પ્રામાણિકજનો, સ્તુતિ કરવી એ જ તમને શોભે!

²તાનપુરો વગાડીને પ્રભુને ધન્યવાદ આપો; દશ તારવાળી વીણા વગાડીને તેમની સ્તુતિ ગાઓ.

³પ્રભુની સમક્ષ નવું ગીત ગાઓ; વાજિંત્રો નિપુણતાથી વગાડો અને આનંદના પોકાર કરો.

⁴કેમ કે પ્રભુનો શબ્દ સચોટ છે, અને તેમનાં સર્વ કાર્યો તેમનું વિશ્વાસુપણું દર્શાવે છે.

⁵તે નેક અને ન્યાયી વર્તન કરનાર લોકોને ચાહે છે, અને પૃથ્વી તેમના પ્રેમથી છલક્ય છે.

⁶પ્રભુના શબ્દથી આકાશો અને તેમના મુખની આજ્ઞાથી સૂર્ય, ચંદ્ર અને સર્વ તારાગણો ઉત્પન્‍ન થયા.

⁷તેમણે સમુદ્રનાં પાણી જાણે મશકમાં ભરતા હોય તેમ એકઠાં કર્યાં, અને પાતાળનાં પાણી જાણે કે વખારોમાં સંગ્રહ કરતા હોય તેમ ભરી દીધાં.

⁸સમસ્ત સૃષ્ટિ પ્રભુનું ભય રાખો, અને પૃથ્વીના સર્વ લોકો તેમનું ડરપૂર્વક સન્માન કરો.

⁹તે બોલ્યા કે સૃષ્ટિ ઉત્પન્‍ન થઈ; તેમણે આજ્ઞા કરી કે તે અસ્તિત્વમાં આવી.

¹⁰પ્રભુ વિધર્મી રાષ્ટ્રોના ઇરાદાને નિષ્ફળ કરે છે, અને તે પ્રજાઓની યોજનાઓને નિરર્થક બનાવે છે.

¹¹પરંતુ પ્રભુનો ઇરાદો સદાસર્વદા અટલ છે, અને તેમની યોજનાઓ પેઢી દરપેઢી ટકે છે.

¹²જે રાષ્ટ્રના ઈશ્વર પ્રભુ છે, અને જે પ્રજાને તેમણે પોતાના વારસા તરીકે પસંદ કરી છે તેને ધન્ય છે!

¹³પ્રભુ સ્વર્ગમાંથી નીચે જુએ છે તે સર્વ મનુષ્યોને નિહાળે છે.

¹⁴પોતાના રાજ્યાસન પર તે બિરાજમાન છે. ત્યાંથી તે પૃથ્વીના સર્વ લોકોને જુએ છે.

¹⁵તે એકલા જ સર્વ હૃદયોના ઘડનાર છે, અને તે તેમનાં સર્વ કાર્યોને પારખે છે.

¹⁶કોઈ રાજા માત્ર પોતાના મોટા સૈન્યને લીધે જ વિજય પામતો નથી; કોઈ સૈનિક પોતાના બળને આધારે જ શત્રુથી બચી જતો નથી.

¹⁷યુદ્ધમાં વિજય માટે અશ્વદળ પર રાખેલી આશા નિરર્થક છે; ઘોડો પોતાની તાક્તથી તેના સવાર સૈનિકને ઉગારી શક્તો નથી.

¹⁸યાદ રાખો, પ્રભુની અમીદષ્ટિ તેમના ભક્તો પર અને તેમના પ્રેમ પર ભરોસો રાખનારાઓ પર છે.

¹⁹ઈશ્વર તેમને કમોતથી ઉગારે છે અને તેમને દુકાળમાં પણ જીવતા રાખે છે.

²⁰આપણે પ્રભુની પ્રતીક્ષા કરીએ છીએ; તે જ આપણા બેલી અને સંરક્ષક ઢાલ છે.

²¹સાચે જ આપણાં હૃદયો તેમને લીધે આનંદ કરશે; કારણ, આપણે તેમના પવિત્ર નામ પર ભરોસો રાખ્યો છે.

²²હે પ્રભુ, તમારો પ્રેમ અમારા પર રહો; કારણ, અમે તમારા પર જ આશા રાખીએ છીએ.