Read Gujarati Common Language Bible - પવિત્ર બાઇબલ C.L. ગીતશાસ્ત્ર 63 Bible Online

ગીતશાસ્ત્ર 63 - Gujarati Common Language Bible - પવિત્ર બાઇબલ C.L. bible

ગીતશાસ્ત્ર 63

¹(દાવિદનું ગીત: તે યહૂદિયાના રણપ્રદેશમાં હતો તે સમયનું) હે ઈશ્વર, તમે જ મારા ઈશ્વર છો; હું આતુરતાથી તમારી ઝંખના સેવું છું. મારો પ્રાણ તમારે માટે તલસે છે, સૂકી, તાપે તપેલી તથા જલહીન ભૂમિ જેમ પાણી માટે તરસે, તેમ મારું હૃદય [1] તમારે માટે તલપે છે.

²તમારા પવિત્રસ્થાનમાં મને તમારું દર્શન કરાવો. જેથી હું તમારાં સામર્થ્ય અને ગૌરવ નિહાળી શકું.

³તમારો પ્રેમ જીવન કરતાં ઉત્તમ છે. તેથી મારા હોઠો તમારું સ્તવન કરશે.

⁴હું તમને જીવનભર ધન્યવાદ આપીશ; તમારે નામે હું હાથ જોડીને પ્રાર્થના કરીશ.

⁵જાણે કે ભવ્ય ભોજનથી મારો પ્રાણ તૃપ્ત થયો હોય તેમ આનંદભર્યા હોઠોથી મારું મુખ તમારી સ્તુતિ ગાશે.

⁶હું મારા બિછાનામાં તમારું સ્મરણ કરું છું, અને રાત્રિના પ્રહરોમાં તમારું ધ્યાન ધરું છું.

⁷કેમ કે તમે સદા મારા મદદગાર બન્યા છો, અને તમારી પાંખોની છાયામાં હું હર્ષભેર ગાઉં છું.

⁸હું તમને વળગી રહું છું, અને તમારો જમણો હાથ મને સંભાળે છે.

⁹પણ જેઓ મારો જીવ લેવા ચાહે છે તેઓ નાશ પામશે; તેઓ ધરતીનાં ઊંડાણોમાં ઊતરી પડશે.

¹⁰તેઓ તલવારની ધારથી માર્યા જશે, અને શિયાળવાંનો ભક્ષ થઈ પડશે.

¹¹પરંતુ રાજા તો ઈશ્વરના વિજયમાં આનંદ કરશે, તેમને નામે શપથ લેનાર વિજય મળ્યાથી તેમની સ્તુતિ કરશે, પરંતુ જૂઠાઓનાં મોં બંધ કરાશે.