Read Gujarati Common Language Bible - પવિત્ર બાઇબલ C.L. સુભાષિતસંગ્રહ 30 Bible Online

સુભાષિતસંગ્રહ 30 - Gujarati Common Language Bible - પવિત્ર બાઇબલ C.L. bible

સુભાષિતસંગ્રહ 30

¹યાકેહના પુત્ર આગૂરનાં આ ગંભીર [1] કથનો છે: કોઈક આવું બોલી ઊઠે છે: ઈશ્વર મારી સાથે નથી, ઈશ્વર મારી સાથે નથી. હું લાચાર છું. [2]

²સાચે જ હું મનુષ્ય નથી પણ પશુવત્ છું, અને મારામાં મનુષ્યની સમજ નથી.

³હું દિવ્યજ્ઞાન પામ્યો નથી, તેમ જ મને પવિત્ર પરમેશ્વર કેવા છે તેની જાણકારી નથી.

⁴કોણ સ્વર્ગમાં ચડીને પાછું નીચે ઊતર્યું છે? કોણે પવનને કદી પોતાની મુઠ્ઠીમાં પકડયો છે? કોણે મહાસાગરને વસ્ત્રમાં બાંધ્યો છે? કોણે પૃથ્વીની સર્વ સીમાઓ સ્થાપી છે? તેમનું નામ શું? અને તેમના પુત્રનું નામ શું? સાચે જ તને તો ખબર હશે!

⁵ઈશ્વરનું દરેક કથન સાચું ઠરેલું છે, ઈશ્વરને શરણે જનાર માટે તે ઢાલરૂપ છે.

⁶તેથી ઈશ્વર જે બોલ્યા છે તેમાં તું કંઈ ઉમેરો ન કર; નહિ તો ઈશ્વર તને ઠપકો આપશે અને તને જૂઠો પુરવાર કરશે.

⁷હે ઈશ્વર, હું તમારી પાસે બે વરદાન યાચું છું; અને મને મરણપર્યંત તેમનાથી વંચિત રાખશો નહિ.

⁸તમે મને છળકપટ અને જૂઠથી બચાવો; મને ન તો ગરીબી આપો કે ન તો અપાર સમૃદ્ધિ આપો, પણ મને મારો દૈનિક આહાર આપજો.

⁹નહિ તો હું સમૃદ્ધિથી છકી જઈને, તમારો નકાર કરું, અને કહું કે, ‘યાહવે તે કોણ?’ અથવા, ગરીબ હોવાને લીધે ચોરી કરીને મારા ઈશ્વરના નામને બટ્ટો લગાડું.

¹⁰કોઈપણ નોકરની તેના શેઠ સમક્ષ નિંદા ન કર; નહિ તો તે તને શાપ દેશે અને તું દોષપાત્ર ઠરશે.

¹¹એવા લોકો પણ હોય છે જેઓ પોતાના પિતાને શાપ દે છે, અને પોતાની જનેતાની કદર બૂજતા નથી.

¹²એવા લોકો પણ હોય છે જેઓ પોતાને શુદ્ધ માને છે, પણ તેમની મલિનતાથી શુદ્ધ થયા નથી.

¹³એવા લોકો પણ હોય છે જેમની આંખોમાં ઘમંડ હોય છે, અને જેઓ સૌને તુચ્છકારની નજરે જુએ છે.

¹⁴એવા લોકો પણ હોય છે જેમના દાંત તલવાર જેવા અને જેમની દાઢો ક્સાઈની છરી જેવી તીક્ષ્ણ હોય છે. તેઓ પૃથ્વી પરથી કચડાયેલાઓને અને લોકોમાંથી ગરજવાનોને ફાડી ખાય છે.

¹⁵જળોને બે દીકરીઓ હોય છે; તેમનાં નામ છે: “આપ, આપ!” વળી, ત્રણ વસ્તુઓ કદી તૃપ્ત થતી નથી, અને “બસ” એમ કદી ન કહેનાર ચાર બાબતો છે:

¹⁶મૃત્યુલોક શેઓલ, વંધ્યાનું ઉદર, વર્ષાના અભાવે તરસી ભૂમિ, અને ભભૂકી ઊઠેલી આગ!

¹⁷પિતાની મશ્કરી કરનાર અને વૃદ્ધ માતાની ઘૃણા કરનાર પુત્રની આંખો ખીણના કાગડા કોચી કાઢશે અને ગીધડાં તેમનો ભક્ષ કરશે.

¹⁸ત્રણ વાતો મને અદ્‍ભુત લાગે છે, અને ચાર બાબતો હું સમજી શક્તો નથી:

¹⁹આકાશમાં ઊડતા ગરુડનો માર્ગ, ખડક પર સરક્તા સાપનો માર્ગ, અને મહાસાગરમાં વહાણનો માર્ગ, અને સ્ત્રી સાથે પુરુષનો વ્યવહાર!

²⁰વ્યભિચારી સ્ત્રીનું વર્તન આવું હોય છે: તે ખાઈને પોતાનું મુખ લૂછી નાખે છે; [3] પછી કહે છે, “મેં કંઈ દુષ્કર્મ કર્યું જ નથી!”

²¹ત્રણ વાતોને લીધે ધરતી કાંપે છે, અને ચાર બાબતો તે સહન કરી શક્તી નથી;

²²જ્યારે કોઈ ગુલામ રાજા બને છે; જ્યારે કોઈ મૂર્ખને પેટભરીને ભાવતાં ભોજન મળે છે;

²³જ્યારે અણમાનીતી પત્ની પતિ પાસેથી વૈવાહિક અધિકાર મેળવે છે; જ્યારે દાસી શેઠાણીનું સ્થાન પ્રાપ્ત કરે છે.

²⁴પૃથ્વી પર ચાર પ્રાણી નાનાં છે, પણ તે સૌથી શાણાં છે:

²⁵કીડી જાતની નાજુક છે, પણ તે ઉનાળામાં ખોરાકનો સંગ્રહ કરે છે.

²⁶સસલાંની જાત ખૂબ નિર્બળ છે, છતાં તેઓ ખડકોમાં પોતાના દર બનાવે છે.

²⁷તીડોને કોઈ રાજા હોતો નથી, છતાં તેઓ ક્તારબદ્ધ ચાલે છે.

²⁸ગરોળીને હાથથી પકડી શકાય છે, છતાં તે રાજમહેલમાં પણ મળી આવે છે.

²⁹ત્રણ જાતનાં પ્રાણીઓની ચાલ દમામદાર હોય છે; ચાર પ્રાણીઓની ચાલ ગૌરવવંતી હોય છે:

³⁰સિંહ પશુઓમાં સૌથી બળવાન મનાય છે, તે કોઈની સામે પોતાનો માર્ગ બદલતો નથી,

³¹ગરદન ફુલાવી ચાલતો કૂકડો, [4] અથવા બકરો, પ્રજાની આગળ દમામભેર ચાલતો રાજા.

³²જો તેં પોતાનાં વખાણ કરીને મૂર્ખાઈ કરી હોય, અને જો તેં કાવતરું ઘડયું હોય તો થોભીને વિચાર કર.

³³કારણ, દહીં વલોવ્યાથી માખણ નીપજે છે, અને નાક મચડવાથી લોહી ફૂટી નીકળે છે, તેમ જ ક્રોધ છંછેડવાથી ઝઘડા ઊભા થાય છે.