Read Gujarati Common Language Bible - પવિત્ર બાઇબલ C.L. હઝકિયેલ 42 Bible Online

હઝકિયેલ 42 - Gujarati Common Language Bible - પવિત્ર બાઇબલ C.L. bible

હઝકિયેલ 42

¹પછી તે મને ઉત્તર તરફના બહારના ચોકમાં લઈ ગયો. તે મને મંદિરની ફરતેની ખુલ્લી જગ્યા અને ઉત્તરના બાંધકામની વચ્ચેની ઓરડીઓમાં લઈ આવ્યો.

²ઓરડીઓના આ મકાનની ઉત્તર તરફની લંબાઈ પચાસ મીટર અને તેની પહોળાઈ પણ પચાસ મીટર હતી.

³અંદરના ચોકમાં મંદિરને ફરતે આવેલી ખુલ્લી જગ્યાની દસ મીટરવાળી બાજુને અડીને બહારના ચોકની ફરસબંદીની સામે આવેલા ત્રણ માળમાં ઓરડીઓને એક ઉપર બીજો એમ ઝરુખા હતા.

⁴એ ઓરડીઓની સામે એક રસ્તો હતો જેની લંબાઈ પચાસ મીટર અને પહોળાઈ પાંચ મીટર હતી. [1] ઓરડીઓનાં બારણાં ઉત્તર તરફ હતાં.

⁵ઉપલી ઓરડીઓ નીચેની ઓરડીઓ કરતાં સાંકડી હતી; કારણ, વચલી અને નીચલી ઓરડીઓની ઓસરીઓને લીધે તેમની ઉપરની ઓરડીનો ભાગ કપાઈ જતો હતો.

⁶ચોકમાંનાં અન્ય મકાનોની જેમ ત્રીજા માળની ઓરડીઓને થાંભલા નહોતા; તેથી છેક ઉપરની ઓરડીઓ વચલી અને નીચેની ઓરડીઓ કરતાં નાની હતી.

⁷ઓરડીઓની સામે તેમને સમાંતર બહારના ચોક તરફ એક દીવાલ હતી; જેની લંબાઈ પચીસ મીટર હતી.

⁸કારણ, બહારના ચોક તરફની ઓરડીઓની લંબાઈ પચીસ મીટર હતી; જ્યારે મંદિરની સામેની તેવી ઓરડીઓની લંબાઈ પચાસ મીટર હતી.

⁹બહારના ચોકમાંથી આ ઓરડીઓના વિસ્તારમાં પ્રવેશવાને ઓરડીઓની બંને દીવાલોની વચમાં નીચે થઈને જવાનું પ્રવેશદ્વાર હતું.

¹⁰વળી, મંદિરના ચોકની પૂર્વ તરફની દીવાલમાં પણ બીજો પ્રવેશમાર્ગ હતો. તે દક્ષિણની બહારની દીવાલ અને મંદિરના મકાનની વચ્ચે આવેલી ઓરડીઓના વિસ્તારની મોખરે હતો. એ ઓરડીઓ પણ લંબાઈ અને પહોળાઈ, તથા તેમના ઘાટ અને આયોજનમાં ઉત્તર તરફની ઓરડીઓ જેવી જ હતી. એમનાં બારણાં દક્ષિણ તરફનાં હતાં. તેમની વચ્ચેના રસ્તાનું પ્રવેશદ્વાર પૂર્વ તરફ હતું; અને ઓરડીઓના વિસ્તારમાં ત્યાંથી આવતું હતું.

¹²મકાનની દક્ષિણ બાજુએ પૂર્વને છેડે જ્યાં દીવાલ શરૂ થતી હતી ત્યાં એક પ્રવેશદ્વાર હતું.

¹³પછી તે માણસે મને કહ્યું: “આ બંને ઈમારતો પવિત્ર છે. તેમાં પ્રભુની સેવામાં જોડાયેલા યજ્ઞકારો સૌથી પવિત્ર અર્પણો ખાય છે. યજ્ઞકારો અને પવિત્ર ખંડોમાં સૌથી પવિત્ર વસ્તુઓ એટલે ધાન્યઅર્પણ, પ્રાયશ્ર્વિતબલિ અને દોષનિવારણ બલિ મૂકશે.

¹⁴મંદિરમાં દાખલ થયા પછી યજ્ઞકારો સીધા બહારના ચોકમાં જશે નહિ, અને જો તેમણે જવું હોય તો સેવાકાર્ય કરતી વખતે પહેરેલાં વસ્ત્રો ઉતારીને તે ખંડોમાં મૂકી દેવાં, કારણ, તે વસ્ત્રો પવિત્ર છે. તેમણે સામાન્ય જનસમૂહ માટે નિયુક્ત થયેલા સ્થાનમાં બીજાં વસ્ત્રો પહેરીને જ જવું.”

¹⁵મંદિરના અંદરના ક્ષેત્રવિસ્તારને માપી રહ્યા પછી તે મને પૂર્વના દરવાજાથી બહાર લઈ ગયો અને પછી તેણે મંદિરની ચારે તરફના બહારના ક્ષેત્રની માપણી શરૂ કરી.

¹⁶તેણે માપવાના ગજ વડે પૂર્વની બાજુ માપી તો તેનું માપ બસો પચાસ મીટર થયું.

¹⁷તેણે ઉત્તરની બાજુ માપી તો તે પણ બસોપચાસ મીટર થઈ.

¹⁸તેણે દક્ષિણની બાજુ માપી તો તે પણ બસો પચાસ મીટર થઈ.

¹⁹તેણે પશ્ર્વિમની બાજુ માપી તો તે પણ બસો પચાસ મીટર થઈ.

²⁰આમ તેણે દીવાલથી રક્ષાયેલા ચોરસ ભાગનું માપ લીધું તો દરેક બાજુએ બસો પચાસ મીટર થયું. એ દીવાલ મંદિરના પવિત્ર ભાગને સામાન્ય ભાગથી જુદી પાડતી હતી.