Read Gujarati Common Language Bible - પવિત્ર બાઇબલ C.L. ગણના 26 Bible Online

ગણના 26 - Gujarati Common Language Bible - પવિત્ર બાઇબલ C.L. bible

ગણના 26

¹રોગચાળા પછી પ્રભુએ મોશેને અને યજ્ઞકાર આરોનના પુત્ર એલાઝારને કહ્યું,

²“સમગ્ર ઇઝરાયલ પ્રજાની તેમના કુટુંબ પ્રમાણે વીસ કે તેથી વધારે ઉંમરના જે કોઈ લશ્કરમાં ભરતી થવાને પાત્ર હોય તે સર્વની વસતી ગણતરી કર.”

³તેથી મોઆબના સપાટ મેદાનોમાં યર્દન નદીને સામે કિનારે યરીખો પાસે મોશે અને યજ્ઞકાર એલાઝારે ઇઝરાયલી લોકોને કહ્યું, “પ્રભુએ મોશેને ફરમાવ્યું છે તે પ્રમાણે વીસ કે તેથી વધુ ઉંમરના બધા ઇઝરાયલીઓની વસતી ગણતરી કરો.” ઇજિપ્તમાંથી નીકળી આવેલા ઇઝરાયલીઓ નીચે પ્રમાણે છે.

⁴

⁵ઇઝરાયલના સૌથી મોટા પુત્ર રૂબેનના કુળના કુટુંબો: હનોખનું કુટુંબ, પાલ્લૂનું કુટુંબ,

⁶હેસરોનનું કુટુંબ અને કાર્મીઓનું કુટુંબ.

⁷રૂબેનના કુળનાં આટલાં કુટુંબો હતાં. તેમની કુલ સંખ્યા 43,730ની હતી.

⁸પાલ્લૂના વંશજો: એલિયાબ,

⁹અને એલિયાબના પુત્રો: નમુએલ, દાથાન તથા અબિરામ. (આ દાથાન અને અબિરામને સમગ્ર સમુદાયે પસંદ કર્યા હતા અને કોરા અને તેના જુથ સાથે ભળી જઈને મોશે અને આરોનની સામા થઈને જેમણે પ્રભુની વિરુધ બળવો કર્યો હતો તે જ તેઓ હતા.

¹⁰તે સમયે ધરતી પોતાનું મોં ઉઘાડી તેમને ગળી ગઈ હતી. તેઓ કોરા અને તેના જૂથ સાથે મરણ પામ્યા હતા. તે સમયે અઢીસો માણસોને અગ્નિ ભરખી ગયો હતો. આ કિસ્સો લોકોને ચેતવણીરૂપ બની ગયો હતો.

¹¹પણ કોરાનાં બધાં સંતાનો માર્યાં ગયાં નહોતાં.)

¹²શિમયોનના કુળનાં કુટુંબો: નમુએલનું કુટુંબ, યામીનનું કુટુંબ, યાખીનનું કુટુંબ,

¹³ઝેરાનું કુટુંબ અને શાઉલનું કુટુંબ શિમયોનના કુળનાં આટલાં કુટુંબો હતાં.

¹⁴તેમની કુલ સંખ્યા 22,200ની હતી.

¹⁵ગાદના કુળનાં કુટુંબો: સફોનનું કુટુંબ, હાગ્ગીનું કુટુંબ, શૂનીનું કુટુંબ,

¹⁶ઓઝનીનું કુટુંબ,

¹⁷એરીનું કુટુંબ, અરોદનું કુટુંબ અને આરએલીનું કુટુંબ, ગાદના કુળનાં આટલાં કુટુંબો હતાં.

¹⁸તેમની કુલ સંખ્યા 40,500ની હતી.

¹⁹યહૂદાના કુળનાં કુટુંબો: શેલાનું કુટુંબ, પેરેસનું કુટુંબ, ઝેરાહનું કુટુંબ, પેરેસના પુત્રો હેસરોનનું કુટુંબ અને હામુલનું કુટુંબ (યહૂદાના બે પુત્રો એર અને ઓનાન કનાનમાં મરણ પામ્યા હતા).

²⁰

²¹

²²યહૂદાના કુળનાં આટલાં કુટુંબો હતાં. તેમની કુલ સંખ્યા 76,500 ની હતી.

²³ઇસ્સાખારના કુળનાં કુટુંબો: તોલાનું કુટુંબ, પૂઆનું કુટુંબ.

²⁴યાશૂબનું કુટુંબ, શિમ્રોનનું કુટુંબ, ઇસ્સાખારના કુળના આટલાં કુટુંબો હતાં.

²⁵તેમની કુલ સંખ્યા 64,300ની હતી.

²⁶ઝબુલૂનના કુળનાં કુટુંબો: સેરેદનું કુટુંબ, એલોનનું કુટુંબ, આહલેએલનું કુટુંબ, ઝબુલૂનના કુળનાં આટલાં કુટુંબો હતાં.

²⁷તેમની કુલ સંખ્યા 60,500ની હતી.

²⁸યોસેફના બે પુત્રો મનાશ્શા અને એફ્રાઈમ તેમનાં કુળ પ્રમાણે:

²⁹મનાશ્શાના કુળનાં કુટુંબો: માખીરનું કુટુંબ, માખીરનો પુત્ર ગિલ્યાદ હતો. ગિલ્યાદના વંશમાં આટલાં કુટુંબો ગણવામાં આવે છે: ઈએઝેરનું કુટુંબ, હેલકનું કુટુંબ,

³⁰

³¹આસરિયેલનું કુટુંબ, શખેમનું કુટુંબ.

³²શમીદાનું કુટુંબ, હેફેરનું કુટુંબ,

³³હેફેરના પુત્ર સલોફહાદને પુત્રો નહોતા. તેને ફક્ત પુત્રીઓ જ હતી. તેમનાં નામ આ પ્રમાણે છે: માહલા, નોઆ, હોગ્લા, મિલ્કા અને તિર્સા.

³⁴મનાશ્સાના કુળનાં આટલાં કુટુંબો હતાં. તેમની કુલ સંખ્યા 52,700ની હતી.

³⁵એફ્રાઈમના કુળનાં કુટુંબો: શૂથેલાનું કુટુંબ, બેખેરનું કુટુંબ, તાહાનનું કુટુંબ.

³⁶શૂથેલાના વંશજો: એરાનનું કુટુંબ.

³⁷એફ્રાઈમના કુળનાં આટલાં કુટુંબો હતાં. તેમની કુલ સંખ્યા 32,500ની હતી. આ બધાં યોસેફના કુળનાં કુટુંબો છે.

³⁸બિન્યામીનના કુળનાં કુટુંબો: બેલાનું કુટુંબ, આશ્બેલનું કુટુંબ, અહિરામનું કુટુંબ.

³⁹શફૂફામનું કુટુંબ, હૂફામનું કુટુંબ.

⁴⁰બેલાને બે પુત્રો હતા: આર્દનું કુટુંબ અને નામાનનું કુટુંબ.

⁴¹બિન્યામીનના કુળનાં આટલાં કુટુંબો હતાં. તેમની કુલ સંખ્યા 45,600ની હતી.

⁴²દાનના કુળનાં કુટુંબો: શૂહામનું કુટુંબ, દાનના કુળમાં આ એક જ કુટુંબ હતું.

⁴³શૂહામના કુટુંબની કુલ સંખ્યા 64,400ની હતી.

⁴⁴આશેરના કુળનાં કુટુંબો: યિમ્નાનું કુટુંબ, ઈશ્વીનું કુટુંબ, બરિયાનું કુટુંબ.

⁴⁵બરિયાના પુત્રો: હેબરનું કુટુંબ, અને માલ્કીએલનું કુટુંબ.

⁴⁶આશેરની દીકરીનું નામ સેરા હતું.

⁴⁷આશેરના કુળનાં આટલાં કુટુંબો હતાં. તેમની કુલ સંખ્યા 53,400ની હતી.

⁴⁸નાફતાલીના કુળનાં કુટુંબો: યાહસએલનું કુટુંબ, ગૂનીનું કુટુંબ.

⁴⁹યેસેરનું કુટુંબ, શિલ્લેમનું કુટુંબ.

⁵⁰નાફતાલીના કુળનાં આટલાં કુટુંબો હતાં. તેમની કુલ સંખ્યા 45,400ની હતી.

⁵¹નવી ગણતરી પ્રમાણે ઇઝરાયલની કુલ સંખ્યા 6,01,730ની હતી.

⁵²પ્રભુએ મોશેને કહ્યું, “તમારે બધાં કુળો વચ્ચે દરેક કુળની સંખ્યા પ્રમાણે દેશ વહેંચી આપવાનો છે. દેશના વિભાગો પાડવામાં આવે. જેમની સંખ્યા મોટી છે, તેમને વધારે જમીન આપવાની છે અને જેમની સંખ્યા નાની છે તેમને ઓછી જમીન આપવાની છે. દરેકને નોંધાયેલી સંખ્યા પ્રમાણે જમીન વહેંચવાની છે. જમીનની વહેંચણી પાસા નાખીને કરવામાં આવે. દરેક કુળને તેમના વંશજોની થોડી કે વત્તી સંખ્યા પ્રમાણે પાસા નાખીને જમીન આપવાની છે.”

⁵³

⁵⁴

⁵⁵

⁵⁶

⁵⁷લેવીકુળનાં કુટુંબોની ગણતરી થઈ તે આ પ્રમાણે છે: ગેર્શોનનું કુટુંબ, કહાથનું કુટુંબ, મરારીનું કુટુંબ.

⁵⁸લેવીઓના બીજા પેટા કુટુંબો આ પ્રમાણે છે: લિબ્નીનું કુટુંબ, હેબ્રોનનું કુટુંબ, માહલીનું કુટુંબ, મુશીનું કુટુંબ, કોરાનું કુટુંબ. કહાથના પુત્રનું નામ આમ્રામ હતું.

⁵⁹આમ્રામની પત્નીનું નામ યોખેબેદ હતું. તે લેવીકુળની હતી અને ઇજિપ્તમાં જન્મી હતી. આમ્રામને તેનાથી આરોન, મોશે અને મિર્યામ જન્મ્યાં હતાં.

⁶⁰આરોનના પુત્રો આ છે: નાદાબ, અબીહૂ, એલાઝાર અને ઈથામાર.

⁶¹તેમાંથી નાદાબ અને અબીહૂ પ્રભુની સમક્ષ અપવિત્ર અગ્નિ ચડાવવાને લીધે માર્યા ગયા હતા.

⁶²એક માસ અને તેથી વધારે ઉંમરના લેવીકુળના નર બાળકો નોંધાયા હતા. તેમની કુલ સંખ્યા 23,000 ની હતી. તેમની ગણતરી બીજા ઇઝરાયલીઓ સાથે કરવામાં આવી નહોતી. કારણ, ઇઝરાયલીઓ મધ્યે તેમને કોઈ જમીન મળી નહોતી.

⁶³મોશે અને એલાઝારે મોઆબના મેદાનોમાં, યર્દન નદીને સામે કિનારે યરીખો પાસે ઇઝરાયલીઓની વસતી ગણતરી કરી ત્યારે આટલાં માણસો નોંધાયા હતા.

⁶⁴મોશે અને આરોને સિનાઈના રણપ્રદેશમાં ઇઝરાયલીઓની પ્રથમ વસતી ગણતરી કરી. તેમાંનો કોઈ આ ગણતરીમાં નોંધાયો ન હતો.

⁶⁵કારણ, પ્રભુએ તેમને વિષે કહ્યું હતું કે બધા લોકો રણપ્રદેશમાં મરણ પામશે, અને યફૂન્‍નેહના પુત્ર કાલેબ અને નૂનના પુત્ર યહોશુઆ સિવાયના અન્ય બધા મરણ પામ્યા.