Read Gujarati Common Language Bible - પવિત્ર બાઇબલ C.L. ગણના 33 Bible Online

ગણના 33 - Gujarati Common Language Bible - પવિત્ર બાઇબલ C.L. bible

ગણના 33

¹મોશે અને આરોનની આગેવાની નીચે ઇજિપ્તમાંથી નીકળ્યા પછી ઇઝરાયલીઓએ તેમની મુસાફરીમાં જે જે ઠેકાણે પડાવ નાખ્યો તેની યાદી નીચે મુજબ છે.

²મોશેએ પ્રભુની આજ્ઞા પ્રમાણે મુસાફરીમાં પ્રત્યેક પડાવના સ્થળનાં નામ નોંધી લીધાં હતાં, જે આ પ્રમાણે છે:

³ઇઝરાયલીઓ પ્રથમ મહિનાને પંદરમે દિવસે ઈજિપ્તમાં રામસેસથી ચાલી નીકળ્યા. પ્રથમ પાસ્ખાપર્વ પછીના દિવસે બધા ઈજિપ્તીઓના દેખતાં તેઓ નીડરપણે ચાલી નીકળ્યા.

⁴તે વખતે ઈજિપ્તીઓ પ્રભુએ મારી નાખેલા તેમના પ્રથમજનિત સંતાનોને દફનાવતા હતા. આમ, પ્રભુએ ઈજિપ્તના દેવો કરતાં પોતે શક્તિશાળી છે તે પુરવાર કર્યું હતું.

⁵ઇઝરાયલીઓએ રામસેસથી નીકળીને સુક્કોથમાં પડાવ નાખ્યો.

⁶ત્યાર પછી સુક્કોથથી નીકળી તેમણે રણપ્રદેશને કિનારે આવેલા એથામમાં મુકામ કર્યો.

⁷એથામથી નીકળીને પાછા બઆલ-સફોનની પૂર્વે આવેલા પીહાહીરોથમાં આવ્યા અને ત્યાં તેમણે મિગ્દોલની સામે મુકામ કર્યો.

⁸તેઓ પીહાહીરોથથી નીકળ્યા અને સમુદ્રમાં થઈ રણપ્રદેશમાં પહોંચ્યા.

⁹પછી એથામના રણપ્રદેશમાં ત્રણ દિવસની મજલ કાપી તેમણે મારામાં પડાવ નાખ્યો. મારાથી નીકળી તેઓ એલીમ આવ્યા. ત્યાં પાણીના બાર ઝરણાં અને ખજૂરીનાં સિત્તેર વૃક્ષ હતાં. ત્યાં તેમણે પડાવ નાખ્યો.

¹⁰એલીમથી નીકળીને તેમણે સૂફ સમુદ્ર પાસે મુકામ કર્યો.

¹¹સૂફ સમુદ્રથી નીકળીને તેમણે સીનના રણપ્રદેશમાં મુકામ કર્યો,.

¹²સીનના રણપ્રદેશમાંથી નીકળીને તેમણે દોફ્ફામાં પડાવ નાખ્યો. દોફ્ફાથી નીકળીને તેમણે આલૂશમાં મુકામ કર્યો.

¹³આલૂશથી નીકળીને તેમણે રફીદીમમાં પડાવ નાખ્યો. આ જગ્યાએ તેમને માટે પીવાને પાણી ન હતું.

¹⁵રફીદીમથી હોર પર્વત જતાં સુધી તેમણે નીચેનાં સ્થળોએ પડાવ નાખ્યો: સિનાઈનો રણપ્રદેશ, કિબ્રોથ-હાત્તાવાહ, હસેરોથ, રિથ્મા, રિમ્મોન-પેરેસ, લિબ્ના, રિસ્સા, કહેલાથા, શેફેર પર્વતની તળેટી, હરાદા, માકહેલોથ, તાહાથ, તેરા, મિથ્કા, હાશ્મોના, મોસેરોથ, બની-યાઅકાન, હોર-હાગિદગાદ, યોટબાથા, આબ્રોના, એસ્યોન-ગેબેર, સીનનો રણપ્રદેશ (એટલે કાદેશ). કાદેશથી નીકળી તેમણે અદોમની સરહદે આવેલા હોર પર્વત પાસે પડાવ નાખ્યો.

³⁸પ્રભુની આજ્ઞાથી આરોન હોર પર્વત પર ગયો. ઇઝરાયલીઓએ ઇજિપ્ત છોડયું ત્યાર પછીના ચાલીસમાં વર્ષે, પાંચમાં મહિનાને પ્રથમ દિવસે એક્સોને ત્રેવીસ વર્ષની ઉંમરે તે મરણ પામ્યો.

⁴⁰કનાનની દક્ષિણે નેગેબમાં આવેલા અરાદના કનાની રાજાને ખબર પડી કે ઇઝરાયલીઓ આવી રહ્યા છે.

⁴¹હોર પર્વતથી મોઆબના મેદાન સુધી ઇઝરાયલીઓએ નીચેનાં સ્થળોએ પડાવ નાખ્યો: સાલ્મોના, પૂનોન, ઓબોથ, મોઆબની સરહદ પર આવેલાં અબારીમનાં ખંડેરો, દિબોન-ગાદ, સાલ્મોન- દિબ્લાથાઈમ, અને ત્યાંથી નબો પર્વત પાસે આવેલા અબારીમ પર્વત પાસે છાવણી કરી. અબારીમ પર્વતથી નીકળીને તેઓએ યરીખોની સામે યર્દન નદીને સામે કિનારે બેથ-યશીમોથ અને આબેલ- શિટ્ટીમની વચ્ચે મોઆબના મેદાનોમાં પડાવ નાખ્યો.

⁵⁰મોઆબના મેદાનોમાં યર્દન નદીને પૂર્વ કિનારે યરીખોની પાસે પ્રભુએ મોશેને કહ્યું,

⁵¹“તું ઇઝરાયલીઓને આ પ્રમાણે કહે: જ્યારે તમે યર્દન નદી ઓળંગીને કનાન દેશમાં પ્રવેશ કરો

⁵²ત્યારે તમારે તે દેશમાં બધા વતનીઓને હાંકી કાઢવા. તેમની પથ્થરની અને ધાતુઓની મૂર્તિઓનો નાશ કરવો અને તેમનાં બધાં ઉચ્ચ ભક્તિસ્થાનો તોડી પાડવાં.

⁵³તમારે તે દેશનો કબજો લઈને તેમાં વસવાટ કરવો; કારણ, મેં તે દેશ તમને આપ્યો છે.

⁵⁴તમારે પાસા નાખીને એ દેશના ભાગ કુટુંબ અને કુળ પ્રમાણે વહેંચી લેવા; મોટાં કુટુંબને મોટો ભાગ અને નાનાં કુટુંબને નાનો ભાગ મળે.

⁵⁵જો તમે તે દેશના વતનીઓને નહિ હાંકી કાઢો, તો જેઓ બાકી રહી જશે તેઓ તમારી આંખમાં કણીની જેમ અને તમારા પડખામાં કાંટાની જેમ ખૂંચશે અને તમને હંમેશા પરેશાન કરશે.

⁵⁶જો તમે તેમને હાંકી નહિ કાઢો તો તેમની જે દુર્દશા કરવાનું મેં ધાર્યું હતું તે તમારી થશે.”