Read Gujarati Old Version રાજાઓનું પહેલું પુસ્તક 16 Bible Online

રાજાઓનું પહેલું પુસ્તક 16 - Gujarati Old Version bible

રાજાઓનું પહેલું પુસ્તક 16

¹હવે બાશા વિરુદ્ધ હનાનીના દીકરા યેહૂ પાસે યહોવાનું વચન એવું આવ્યું,

²“મેં તને ધૂળમાંથી ઊંચી પદવીએ ચઢાવીને મારા ઇઝરાયલ લોક પર અધિકારી ઠરાવ્યો. પણ તું યરોબામને માર્ગે ચાલ્યો છે, ને તેં મારા ઇઝરાયલ લોક પાસે પાપ કરાવીને તેમનાં પાપથી મને રોષ ચઢાવ્યો છે.

³માટે જો, હું બાશાને તથા તેના કુટુંબને છેક ઝાટકી કાઢીશ, અને હું તારા ઘરને નબાટના દીકરા યરોબામના ઘર જેવું કરી નાખીશ.

⁴બાશાનો જે માણસ નગરમાં મરશે તેને કૂતરા ખાશે; અને તેનો જે માણસ ખેતરમાં મરશે તેને વાયુચર પક્ષીઓ ખાશે.”

⁵હવે બાશાના બાકીના કૃત્યો, તથા તેણે જે કંઈ કર્યું તે તથા તેનું પરાક્રમ, એ સર્વ ઇઝરાયલના રાજાઓનાં કાળવૃતાંતના પુસ્તકમાં લખેલાં નથી શું?

⁶અને બાશા પોતાના પિતૃઓ સાથે ઊંઘી ગયો, ને તેને તિર્સામાં દાટવામાં આવ્યો, અને તેના દીકરા એલાએ તેની જગાએ રાજ કર્યું.

⁷વળી બાશાએ યહોવાની ર્દષ્ટિમાં જે બધી દુષ્ટતા કરી, ને યરોબામના કુટુંબના જેવો થઈને, પોતાના હાથોના કામથી યહોવાને રોષ ચઢાવ્યો તેને લીધે, તેની વિરુદ્ધ તથા તેના કુટુંબની વિરુદ્ધ યહોવાનું વચન હનાનીના દીકરા યેહૂ પ્રબોધક મારફતે [ઉપર પ્રમાણે] આવ્યું હતું.

⁸યહૂદિયાના રાજા આસાને છવ્વીસમે વર્ષે બાશાનો દીકરો એલા તિર્સામાં ઇઝરાયલ પર રાજ કરવા લાગ્યો. [તેણે] બે વર્ષ [રાજ કર્યું].

⁹તેનો ચાકર ઝિમ્રી, જે તેના રથોના અર્ધા ભાગ પર નાયક હતો, તેણે એલાની વિરુદ્ધ બંડ કર્યું. હવે તે તિર્સામાં હતો, ને તિર્સામાંના તેના ઘરનો કારભારી આર્સા નામે એક જણ હતો; તેના ઘરમાં પીને રાજા ચકચૂર થયો હતો.

¹⁰અને યહૂદિયાના રાજા આસાને સત્તાવીસમે વર્ષે ઝિમ્રીએ અંદર જઈને રાજાને મારીને તેનો પ્રાણ લીધો, ને તેની જગાએ રાજ કર્યું.

¹¹તે રાજ કરવા લાગ્યો, ત્યારે તે પોતાના રજ્યાસન પર બેઠો કે તરત એમ થયું કે તેણે બાશાનાં કુટુંબનાં સર્વને મારી નાખ્યાં. તેણે તેના સગાંનો કે, તેના મિત્રોનો એકે પુત્ર તેને માટે રહેવા દીધો નહિ.

¹²એમ બાશાનાં સર્વ પાપ તથા તેના દીકરા એલાનાં પાપ જે તેઓએ કરીને, ને જે વડે તેઓએ ઇઝરાયલ પાસે પાપ કરાવીને પોતાની વ્યર્થતાઓથી ઇઝરાયલના ઈશ્વર યહોવાને રોષ‍ ચઢાવ્યો,

¹³તેને લીધે યહોવા પોતાનું વચન યેહૂ પ્રબોધક દ્વારા બાશાની વિરુદ્ધ બોલ્યા હતા, તે પ્રમાણે ઝિમ્રીએ બાશાના આખા કુટુંબનો નાશ કર્યો.

¹⁴હવે એલાનાં બાકીનાં કૃત્યો, તથા તેણે જે કંઈ કર્યું તે સર્વ ઇઝરાયલના રાજાઓનાં કાળવૃતાંતના પુસ્તકમાં લખેલાં નથી શું?

¹⁵યહૂદિયાના રાજા આસાને સત્તાવીસમે વર્ષે ઝિમ્રીએ તિર્સામાં સાત દિવસ રાજ કર્યું. હવે લોકોએ પલિસ્તીઓનાં ગિબ્બથોનની સામે છાવણી નાખી હતી.

¹⁶છાવણીમાંના લોકોએ સાંભળ્યું કે, ઝિમ્રીએ બંડ કર્યું છે, ને રાજાને પણ મારી નાખ્યો છે; તેથી સર્વ ઇઝરાયલીઓએ તે જ દિવસે છાવણીમાં સેનાપતિ ઓમ્રીને ઇઝરાયલ પર રાજા ઠરાવ્યો.

¹⁷ઓમ્રીએ તથા તેની સાથે સર્વ ઇઝરાયલીઓએ ગિબ્બથોન આગળથી ઊપડી જઈને તિર્સાને ઘેરો કર્યો.

¹⁸અને ઝિમ્રીએ જોયું કે નગર સર કરવામાં આવ્યું છે, ત્યારે એમ થયું કે રાજાના મહેલના કિલ્લામાં તે ભરાઈ ગયો, ને મહેલને આગથી સળગાવી મૂકીને પોતે અંદર બળી મૂઓ.

¹⁹યરોબામના માર્ગમાં, તથા ઇઝરાયલની પાસે પાપ કરાવીને જે પાપ તેણે કર્યું તેમાં‍ ચાલવાથી યહોવાની ર્દષ્ટિમાં જે ભૂંડું હતું તે કરીને તેણે જે જે પાપ કર્યા, તેને લીધે [તે મર્યો].

²⁰હવે ઝિમ્રીનાં બાકીનાં કૃત્યો, તથા તેણે કરેલો રાજદ્રોહ, તે ઇઝરાયલના રાજાઓના કાળવૃતાંતના પુસ્તકમાં લખેલાં નથી શું?

²¹આ સમયે ઇઝરાયલ લોકમાં બે પક્ષ પડ્યાં. અડધા ભાગના લોક ગિનાથના દીકરા તિબ્નીને રાજા ઠરાવવા માટે તેની મદદે ગયા; અને અર્ધા ભાગના ઓમ્રીની મદદે ગયા.

²²પણ ઓમ્રીની મદદે ગયેલા લોકે ગિનાથના દીકરા તિબ્નીની મદદે ગયેલા લોકો પર જીત મેળવી. એમ તિબ્ની મરણ પામ્યો, ને ઓમ્રીએ રાજ કર્યું.

²³યહૂદિયાના રાજા આસાને એકત્રીસમે વર્ષે ઓમ્રી ઇઝરાયલ પર રાજ કરવા લાગ્યો. [તેણે] બાર વર્ષ [રાજ કર્યું]. તિર્સામા તેણે છ વર્ષ રાજ કર્યું.

²⁴તેણે શેમેર પાસેથી સમરુન પર્વત બે તાલંત રૂપું આપીને ખરીદ કર્યો, અને તે પર્વત પર તેણે [નગર] બાંધ્યું; પોતે બાંધેલા નગરનું નામ તેણે તે પર્વતના માલિક શેમેરના નામ પરથી સમરુન પાડ્યું.

²⁵ઓમ્રીએ યહોવાની ર્દષ્ટિમાં જે ભૂંડું હતું તે કર્યું, ને તેની અગાઉના સર્વ કરતાં તે વિશેષ દુષ્ટતાથી વર્ત્યો.

²⁶કેમ કે નબાટના દીકરા યરોબામના સર્વ માર્ગમાં તથા તેનાં જે પાપ વડે તેણે ઇઝરાયલ પાસે પાપ કરાવીને તેઓની વ્યર્થતાઓથી ઇઝરાયલના ઈશ્વર યહોવાને રોષ ચઢાવ્યો, તેમાં તે ચાલ્યો.

²⁷હવે ઓમ્રીનાં કરેલાં બાકીનાં કૃત્યો, તથા તેણે જે પરાક્રમ બતાવ્યું તે સર્વ ઇઝરાયલના રાજાઓનાં કાળવૃતાંતના પુસ્તકમાં લખેલાં નથી શું?

²⁸અને ઓમ્રી પોતાના પિતૃઓની સાથે ઊંઘી ગયો, ને તેને સમરુનમાં દાટવામાં આવ્યો, અને તેને સ્થાને તેના દીકરા આહાબે રાજ કર્યું.

²⁹યહૂદિયાના રાજા આસાને આડત્રીસમે વર્ષે ઓમ્રીનો દીકરો આહાબ ઇઝરાયલ પર રાજ કરવા લાગ્યો. અને ઓમ્રીના દીકરા આહાબે સમરુનમાં ઇઝરાયલ પર બાવીસ વર્ષ રાજ કર્યું.

³⁰અને ઓમ્રીના દીકરા આહાબે તેની પહેલાંના સર્વ [રાજાઓ] કરતાં યહોવાની ર્દષ્ટિમાં જે ભૂંડું હતું તે કર્યું.

³¹અને એમ થયું કે નબાટના દીકરા યરોબામનાં પાપને માર્ગે ચાલવું એ તો જાણે તેને માટે એક નજીવી બાબત હોય તેમ તે સિદોનીઓના રાજા એથ્બાલની દીકરી ઇઝબેલ સાથે પરણ્યો, ને તેણે જઈને બાલની સેવા કરીને તેની ભક્તિ કરી.

³²તેણે સમરુનમાં બાલનું જે મંદિર બાંધ્યું હતું, તેમાં તેણે બાલને માટે વેદી ઊભી કરી.

³³વળી આહાબે અશેરા [મૂર્તિ] બનાવી. અને આહાબે તેની અગાઉના ઇઝરાયલના સર્વ રાજાઓ કરતાં ઇઝરાયલનાં ઈશ્વર યહોવાને રોષ ચઢે એવું હજીયે વિશેષ કર્યું.

³⁴તેના દિવસોમાં બેથેલી હીએલે યરીખો બાંધ્યું. તેણે તેના જ્યેષ્ઠ પુત્ર અબીરામના ભોગે તેનો પાયો નાખ્યો. અને તેના સૌથી નાના દીકરા સગૂબના ભોગે તેણે તેના દરવાજા ઊભા કર્યા. યહોવા પોતાનું જે વચન નૂનના દીકરા યહોશુઆ મારફતે બોલ્યા હતા, તે પ્રમાણે [થયું].