Read Gujarati Old Version અયૂબ 13 Bible Online

અયૂબ 13 - Gujarati Old Version bible

અયૂબ 13

¹મારી આંખોએ [એ] બધું જોયું છે, મારા કાનોથી એ સાંભળીને હું સમજ્યો છું.

²તમે જે જાણી છો, તે હું પણ જાણું છું; હું તમારાથી કંઈ કાચો નથી.

³નિશ્ચે સર્વશક્તિમાનની સાથે બોલવા હું ઇચ્છું છું, અને ઈશ્વરની સાથે વાદ કરવા હું માગું છું.

⁴પણ તમે જૂઠી વાતો જોડી કાઢનારા છો, તમે બધા ઊંટવૈદ છો.

⁵તમે છેક છાના રહ્યા હોત તો કેવું સારું! કેમ કે એમાં તમારું ડહાપણ જણાત.

⁶હવે મારી દલીલો સાંભળો, અને મારા મુખની અરજ પર લક્ષ આપો.

⁷શું તમે ઈશ્વરનો પક્ષ રાખીને અન્યાયથી બોલશો, અને તેમના પક્ષના થઈને ઠગાઈ ભરેલી વાત કરશો?

⁸શું તમે તેમનો વગવસીલો રાખશો? શું તમે ઈશ્વરના પક્ષમાં બોલશો?

⁹શું તે તમારી ઝડતી લે તો સારું? અથવા જેમ માણસ માણસને ઠગે, તેમ શું તમે તેમને ઠગશો?

¹⁰જો તમે ગુપ્ત રીતે આંખની શરમ રાખતા હશો, તો તે નિશ્ચે તમને ઠપકો આપશે.

¹¹શું તેમનો પ્રતાપ તમને નહિ ડરાવે, અને તેમનો ભય તમારા પર નહિ આવે?

¹²તમારી [મશહૂર] કહાણીઓ રાખ જેવી છે; તમારી દલીલો માટીના કિલ્લાઓ જેવી છે.

¹³છાના રહો, મને નિરાંતે બોલવા દો, અને મારા પર જે વીતવાનું હોય તે છો વીતે.

¹⁴ગમે તે થાય, હા, મારો જીવ જાય, તોપણ હું ડરતો નથી.

¹⁵તે મને મારી નાખે, તોપણ હું તેમની રાહ જોઈશ; પરંતુ મારી વર્તણૂક [નિર્દોષ છે એમ] હું તેમની આગળ સાબિત કરીશ.

¹⁶એ જ મારું તારણ પણ થઈ પડશે; કેમ કે અધર્મી માણસથી તેમની આગળ આવી શકાય નહિ.

¹⁷મારું બોલવું ધ્યાનથી સાંભળો, અને મારું કહેવું બરાબર સાંભળી રાખો.

¹⁸હવે જુઓ, મારો મુકદ્દમો મેં નિયમસર ગોઠવ્યો છે; હું જાણું છું કે હું નેક છું.

¹⁹મારી સામે પ્રતિવાદ કરે એવો કોણ છે? [જો કોઈ હોય] તો હું છાનો રહીશ અને પ્રાણ છોડીશ.

²⁰ફક્ત બે બાબતોથી તમે મને મુક્ત કરો, તો હું તમારી આગળ મારું મુખ સંતાડું નહિ:

²¹તમારો હાથ મારા પરથી દૂર ખેંચી લો; અને તમારા ભયથી મને ન ગભરાવો.

²²ત્યારે તો તમે મને બોલાવો કે, હું ઉત્તર આપું; અથવા હું બોલું, ને તમે મને પ્રત્યુત્તર આપો.

²³મારા અન્યાયો તથા પાપો કેટલાં છે? મારા અપરાધો તથા મારું પાપ મને જણાવો.

²⁴શા માટે તમે તમારું મુખ છુપાવો છો, અને મને તમારો શત્રુ ગણો છો?

²⁵શું તમે પવનથી ઘસડાતા પાંદડાને હેરાન કરશો? અને સૂકા ખૂંપરાનો પીછો પકડશો?

²⁶કેમ કે તમે મારી વિરુદ્ધ સખત [ઠરાવ] લખો છો, અને મારી યુવાવસ્થાના અન્યાયનો મને બદલો આપો છો;

²⁷તમે મારા પગ હેડમાં પૂરો છો, અને મારા સર્વ રસ્તાઓ ધ્‍યાનમાં રાખો છો; તમે મારાં પગલાં આંકો છો;

²⁸જો કે હું નાશ પામતી સડેલી વસ્તુના જેવો તથા ઊધઈએ ખાઈ નાખેલા વસ્ત્ર જેવો છું, તો પણ.