Read Gujarati Old Version અયૂબ 23 Bible Online

અયૂબ 23 - Gujarati Old Version bible

અયૂબ 23

¹ત્યારે અયૂબે ઉત્તર આપ્યો,

²“આજ પણ મારી ફરિયાદ કષ્ટમય છે; મારા કણવા કરતાં મારો ઘા ભારે છે.

³મને તે ક્યાં જડે એ હું જાણતો હોત તો કેવું સારું, કેમ કે [ત્યારે તો] હું છેક તેમને આસને જઈ પહોંચત!

⁴હું મારો દાવો તેમની આગળ અનુક્રમે રજૂ કરત, અને દલીલોથી મારું મોં ભરત.

⁵તેમના ઉત્તરમાં જે શબ્દો તે મને કહેત તે હું જાણી લેત, અને તે મને જે કહેત તે હું સમજત.

⁶શું તે પોતાની સત્તાના મહત્વમાં મારી સાથે વિવાદ કરત? નહિ; પણ તે મારું કહેવું તેમના લક્ષમાં લેત.

⁷ત્યાં પ્રામાણિક માણસ તેમની સાથે વાદવિવાદ કરી શકે છે. તેથી હું હમેશને માટે મારા ન્યાયાધીશથી છૂટી જાત.

⁸હું આગળ જાઉં છું, પણ તે [ત્યાં] નથી; અને પાછળ [જાઉં છું] , પણ હું તેમને જોઈ શકતો નથી.

⁹ડાબે હાથે તે કામ કરે છે, ત્યારે હું તેમને નિહાળી‍ શકતો નથી; જમણે હાથે તે એવા ગુપ્ત રહે છે કે, હું તેમને જોઈ શકતો નથી.

¹⁰પરંતુ મારી ચાલચલગત તે જાણે છે; મને તે પરખશે ત્યારે હું સોના જેવો નીકળીશ.

¹¹મારો પગ તેમનાં પગલાંને વળગી રહ્યો છે; મેં તેમનો માર્ગ પકડી રાખ્યો છે, અને આડોઅવળો ગયો નથી.

¹²તેમના હોઠોની આજ્ઞાથી હું પાછો હઠયો નથી; મારા આવશ્યક ખોરાક કરતાં તેમના મુખના શબ્દો મેં વિશેષ આવશ્યક ગણીને તેને સંઘરી રાખ્યા છે.

¹³પણ તે એક એવા છે કે તેમને કોણ ફરવી‍ શકે? તેમનો આત્મા જે ઈચ્છે છે તે જ તે કરે છે.

¹⁴કેમ કે મારે માટે જે નિર્માણ કરેલું છે તે જ તે અમલમાં લાવે છે; અને એવાં એવાં ઘણાં કામ તેમના હાથમાં રહેલાં છે.

¹⁵માટે તેમની આગળ હું ગભરાઈ જાઉં છું; જ્યારે હું તેમના વિષે વિચાર કરું છું ત્યારે મને તેમનો ડર લાગે છે.

¹⁶કેમ કે ઈશ્ચરે મારું હ્રદય નિર્ગત કર્યું છે, અને સર્વશક્તિમાને મને ગભરાવ્યો છે;

¹⁷કેમ કે અંધકાર [મારા પર આવ્યા] ને લીધે, ઘોર અંધકારે મારું મોં ઢાંકી દીધું.