Read Gujarati Old Version અયૂબ 41 Bible Online

અયૂબ 41 - Gujarati Old Version bible

અયૂબ 41

¹શું તું મગરને ગલથી ખેંચી કાઢી શકે? અથવા દોરીથી તેની જીભને દબાવી શકે?

²શું તું તેના નાકમાં નાથ નાખી શકે? કે આંકડાથી તેનું જડબું વીંધી શકે?

³શું તે તારી આગળ કરગરશે? કે તે તારી આગળ નમ્ર વચનો બોલશે?

⁴શું તે તારી સાથે એવો કરાર કરશે કે, તું તેને હમેશને માટે ચાકર રાખે?

⁵પક્ષી સાથે તું રમે છે તેમ તેની સાથે તું રમશે શું? અથવા તારી કુમારિકાઓને માટે તેને તું બાંધશે?

⁶શું [માછીઓ] તેનો વેપાર કરશે? શું તેઓ તેને વેપારીઓમાં વહેંચી આપશે?

⁷શું તેની ચામડીને પાંખવાળાં ભાલોડાંથી કે તેના માથાને મચ્છી મારવાના ભાલાથી ભરી શકે છે?

⁸તારો હાથ તેના ઉપર મૂકી જો; [ત્યારે જે] યુદ્ધ થાય તેનું સ્મરણ કરીને તું ફરી એવું ન કરીશ.

⁹તે વિષેની આશા નિષ્ફળ છે; શું તેને જોઈને જ કોઈના હાંજા ગગડી ન જાય?

¹⁰તેને છંછેડીને ઉઠાડવાની હિંમત ધરે એવો કોઈ શૂરવીર નથી; તો મારી આગળ ઊભો રહી શકે એવો કોણ છે?

¹¹તેની સાથે યુદ્ધ કરીને કોણ ફતેહ પામ્યો છે? આખા આકાશ નીચે એવો કોઈ નથી.

¹²તેના અવયવો, તેનું અજબ બળ, તથા તેની સુંદર રચના વિષે હું ચૂપ રહીશ નહિ.

¹³તેનું ઉપલું વસ્ત્ર કોણ ઉતારી શકે? તેના બેવડા દાંતના જડબામાં કોણ પેસી શકે?

¹⁴તેનું મોઢું કોણ ઉઘાડી શકે? તેના દાંત ભયંકર છે.

¹⁵[તેનાં] મજબૂત ભીંગડાંનું [તેને] અભિમાન છે, તેઓ એકબીજા સાથે સજડ જકડાઈ ગયાં છે.

¹⁶એટલે એકબીજાની સાથે એવાં જોડાએલાં છે કે તેમની વચ્ચે હવા પણ દાખલ થઈ શકે નહિ.

¹⁷તેઓ એકબીજાની સાથે ભીડાયેલાં છે; તેઓ એકબીજા સાથે એવાં ચોંટેલા છે કે તેમને છૂટાં પાડી શકાય નહિ.

¹⁸તે છીંકે છે ત્યારે પ્રકાશ ચમકે છે, અને તેની આંખો પ્રભાતની આંખનાં પોપચાં જેવી છે.

¹⁹તેના મુખમાંથી બળતી મશાલો નીકળે છે, અને અગ્નિની ચિનગારીઓ નીકળે છે.

²⁰તેનાં નસકોરાંમાંથી ઊકળતા પાણીની વરાળ તથા બળતી મશાલોના ધુમાડા જેવું નીકળે છે.

²¹તેના શ્વાસથી કોયલા સળગી ઊઠે છે, અને તેના મુખમાંથી ભડકા નીકળે છે.

²²તેની ગરદનમાં બળ છે, અને તેની આગળ [જાનવરો] ત્રાસથી થરથરી ઊઠે છે.

²³તેના માંસના લોચા એકબીજા સાથે ચોંટેલા છે; તેઓ તેના અંગ પર એવા સજડ બંધાયેલા છે કે, તેઓને હલાવી પણ શકાય નહિ.

²⁴તેનું કલેજું પથ્થર જેવું કઠણ છે; ઘંટીના નીચલા પડ જેવું સખત છે.

²⁵જ્યારે તે ઊઠે છે, ત્યારે બળવાનો ડર છે; ગભરાટથી તેઓ ભાન ભૂલી જાય છે.

²⁶જો કોઈ તેને તરવારથી ઝટકા મારે, તો તેમાં તેનું કંઈ વળે નહિ; તેમ જ ભાલો, તીર કે તીક્ષ્ણ બરછીનું પણ [કંઈ વળે નહિ].

²⁷તે લોઢાને પરાળ જેવું, [અને] પિત્તળને કોહેલા લાકડા જેવું ગણે છે.

²⁸બાણ તેને નસાડી શકે નહિ; ગોફણના ગોળા તો તેની નજરમાં ખૂંપરા બની જાય છે.

²⁹ડાંગો પણ ખૂંપરામાં લેખાય છે; ભાલાના ઘસારાને તે હસી કાઢે છે.

³⁰તેના નીચેના ભાગ કઠણ ઠીકરાં જેવા છે; તે કાદવ પર [જાણે કે] મસળવાનો જેંસલો ફેરવે છે.

³¹તે ઊંડાણને હાંલ્લાની જેમ ઉકાળે ચઢાવે છે, તે સમુદ્રને રગડા જેવો કરે છે.

³²તે પોતાની પાછળ ચળકતો શેરડો પાડે છે; ત્યારે કોઈ ધારે કે સમુદ્ર ભૂરો છે.

³³પૃથ્વી પર બીજું કોઈ પ્રાણી તેના સરખું નિર્ભય સૃજાયેલું નથી.

³⁴તે સર્વ ઊંચી વસ્તુઓને જુએ છે; તે સર્વ ગર્વિષ્ઠ પ્રાણીઓનો રાજા છે.”