Read Gujarati Old Version ગીતશાસ્‍ત્ર 108 Bible Online

ગીતશાસ્‍ત્ર 108 - Gujarati Old Version bible

ગીતશાસ્‍ત્ર 108

¹ગાયન:દાઉદનું ગીત. હે ઈશ્વર, મારું હ્રદય દઢ છે; હું મારા ખરા અંત:કરણથી ગાયન કરીને તમારી સ્તુતિ કરીશ.

²વીણા તથા સિતાર, જાગો; પરોઢિયાને હું જાતે જગાડીશ.

³હે યહોવા, હું લોકોમાં તમારો આભાર માનીશ; પ્રજાઓમાં હું તમારાં સ્તોત્ર ગાઈશ.

⁴તમારી કૃપા આકાશ કરતાં મોટી છે, અને તમારી સત્યતા વાદળાં સુધી [પહોંચે છે].

⁵હે ઈશ્વર, તમે આકાશ કરતાં ઊંચા મનાઓ; અને તમારું ગૌરવ પૃથ્વી કરતાં પ્રૌઢ મનાઓ;

⁶તમારા પ્રિય જનોનો છૂટકો થાય, માટે તમારા જમણા હાથથી તેમનું તારણ કરીને અમને ઉત્તર અપો.

⁷ઈશ્વર પોતાની પવિત્રતાએ બોલ્યા છે, “હું હરખાઈશ; હું શખેમને વહેંચીશ, અને સુક્‍કોથનું નીચાણ વહેંચી આપીશ.

⁸ગિલ્યાદ મારું છે; મનાશ્શા પણ મારું છે; એફ્રાઈમ મારા માથાનો ટોપ છે; યહૂદિયા મારો રાજદંડ છે.

⁹મોઆબ મારો કળશિયો છે; અદોમ ઉપર હું મારો જોડો ફેંકીશ; પલિસ્તી દેશ પર હું જયજયકાર કરીશ.”

¹⁰કોટબંધ નગરમાં મને કોણ લઈ જશે? અદોમમાં મને કોણ દોરી જશે?

¹¹હે ઈશ્વર, તમે શું અમને તજી દીધા નથી? હે ઈશ્વર, તમે અમારાં સૈન્યોની સાથે નીકળતા નથી.

¹²શત્રુઓની સામે અમને સહાય કરો, કેમ કે માનવીની સહાય મિથ્યા છે.

¹³ઈશ્વરની સહાયથી અમે પરાક્રમ કરીશું. કેમ કે તે જ અમારા શત્રુઓને છૂંદી નાખશે.