Read Gujarati Old Version ગીતશાસ્‍ત્ર 89 Bible Online

ગીતશાસ્‍ત્ર 89 - Gujarati Old Version bible

ગીતશાસ્‍ત્ર 89

¹ એથાન એઝ્રાહીનું માસ્કીલ. હું નિરંતર યહોવાની કૃપા વિષે ગાઈશ; હું મારે મુખે પેઢી દરપેઢી તમારું વિશ્વાસુપણું પ્રગટ કરીશ.

²કેમ કે મેં કહ્યું, “કૃપા સદાને માટે બાંધવામાં આવશે; આકાશોમાં જ તમે તમારું વિશ્વાસુપણું સ્થાપન કરશો.”

³તમે કહ્યું, “મેં મારા પસંદ કરેલાની સાથે કરાર કર્યો છે, મેં મારા સેવક દાઉદ સાથે સમ ખાધા છે,

⁴‘તારા સંતાનને હું સદા કાયમ રાખીશ, અને વંશપરંપરા હું તારું રાજ્યાસન સ્થિર રાખીશ.’”

⁵હે યહોવા, આકાશો તમારા ચમત્કારોની સ્તુતિ કરશે; વળી સંતોની મંડળીમાં તમારું વિશ્વાસુપણું [વખાણવામાં આવશે].

⁶આકાશમાં એવો કોણ છે કે જેની સરખામણી યહોવાની સાથે થાય? ઈશ્વરદૂતોમાં યહોવાના જેવો કોણ છે?

⁷સંતોની સભામાં તે ઘણા ભયાવહ ઈશ્વર છે, જેઓ તેમની આસપાસ છે તે બધાના કરતાં તે વધારે ભયાવહ છે.

⁸હે સૈન્યોના ઈશ્વર યહોવા, હે યાહ, તમારા જેવો પરાક્રમી કોણ છે? તમારી આસપાસ તમારું વિશ્વાસુપણું છે.

⁹તમે સમુદ્રના ગર્વ પર અધિકાર ચલાવો છો; તેનાં મોજાંઓ ઊછળે છે ત્યારે તેઓને તમે શાંત પાડો છો.

¹⁰મારી નંખાયેલાની જેમ તમે રાહાબને છૂંદી નાખ્યો છે; તમારા બાહુબળથી તમે તમારા શત્રુઓને વિખેર્યા છે.

¹¹આકાશો તમારાં છે, પૃથ્વી પણ તમારી છે; જગત તથા તેના સર્વસ્વને તમે સ્થાપન કર્યાં છે.

¹²ઉત્તર તથા દક્ષિણ તમારાથી ઉત્પન્ન થયેલાં છે; તાબોર અને હેર્મોન તમારે નામે હર્ષનાદ કરે છે.

¹³તમને બળવાન બાહુ છે; તમારો હાથ મજબૂત તથા તમારો જમણો હાથ ઊંચો છે.

¹⁴ન્યાયીપણું તથા ઇનસાફ તમારા રાજ્યાસનનો પાયો છે; તમારી હજૂરમાં કૃપા તથા સત્યતા હોય છે.

¹⁵આનંદદાયક નાદને જાણનાર લોકોને ધન્ય છે; હે યહોવા, તેઓ તમારા મુખના પ્રકાશમાં ચાલે છે.

¹⁶તેઓ આખો દિવસ તમારે નામે હર્ષ કરે છે; અને તમારા ન્યાયીપણાથી તેઓને ઊંચા કરવામાં આવે છે.

¹⁷તમે તેઓના સામર્થ્યનો મહિમા છો; તમારી પ્રસન્નતાથી અમારું શિંગ ઊંચું કરવામાં આવશે.

¹⁸અમારી ઢાલ તો યહોવા છે; ઇઝરાયલના પવિત્ર અમારા રાજા છે.

¹⁹ત્યારે તમે દર્શનમાં તમારા ભક્તોને કહ્યું, “જે પરાક્રમી છે તેને મેં સહાય કરી છે; અને લોકોમાંથી પસંદ કરેલાને મેં ઊંચો કર્યો છે.

²⁰ મારો સેવક દાઉદ મને મળ્યો છે; મારા પવિત્ર તેલથી મેં તેને અભિષિક્ત કર્યો છે.

²¹તેના પર મારો હાથ હંમેશાં રહેશે; મારો બાહુ તેને સામર્થ્ય આપશે.

²²શત્રુ તેનું નુકસાન કરી શકશે નહિ, અને દુષ્ટો તેને દુ:ખ દેશે નહિ.

²³તેની આગળ હું તેના વૈરીઓને પાડી નાખીશ, અને તેના દ્વેષીઓને મારી નાખીશ.

²⁴પણ તેની સાથે મારું વિશ્વાસુપણું તથા મારી કૃપા ચાલુ રહેશે; મારે નામે તેનું શિંગ ઊંચું કરવામાં આવશે.

²⁵હું સમુદ્ર પર તેનો હાથ, અને નદીઓ પર તેનો જમણો હાથ સ્થાપન કરીશ.

²⁶તે મને વિનંતી કરીને કહેશે, ‘તમે મારા પિતા, મારા ઈશ્વર તથા મારા તારણના ખડક છો.’

²⁷વળી હું તેને મારો જયેષ્ઠ પુત્ર, પૃથ્વીના રાજાઓમાં શ્રેષ્ઠ બનાવીશ.

²⁸હું તેના ઉપર મારી કૃપા સદા કાયમ રાખીશ. અને તેની સાથે મારો કરાર દઢ રહેશે.

²⁹તેનાં સંતાન સદા રહે, એવું પણ હું કરીશ. આકાશના દિવસોની જેમ તેનું રાજ્ય [સદા ટકશે].

³⁰જો તેના દીકરાઓ મારા નિયમનો ત્યાગ કરે, અને મારા ઠરાવો પ્રમાણે ન ચાલે;

³¹જો તેઓ મારા વિધિઓ તોડે, અને મારી આજ્ઞાઓ ન પાળે;

³²તો હું સોટીથી તેઓનાં ઉલ્લંઘનોને, અને ફટકાથી તેઓના અન્યાયને જોઈ લઈશ.

³³પરંતુ હું તેની પાસેથી મારી કૃપા છેક લઈ લઈશ નહિ, અને હું મારું વિશ્વાસુપણું ખૂટવા દઈશ નહિ,

³⁴મારો કરાર હું તોડીશ નહિ, અને મારા હોઠોથી નીકળેલી વાત ફેરવીશ નહિ.

³⁵એકવાર મેં મારી પવિત્રતાના સમ ખાધા છે; હું દાઉદ સાથે જૂઠું બોલીશ નહિ.

³⁶તેનાં સંતાન સર્વકાળ ટકશે, અને મારી આગળ સૂર્યની જેમ તેનું રાજ્યાસન [ટકશે].

³⁷ચંદ્રની જેમ તે સદા અચળ રહેશે, અને આકાશમાંના વિશ્વાસુ સાક્ષી જેવું [થશે].” (સેલાહ)

³⁸પણ તમે તમારા અભિષિક્તને તજીને તથા તેને તુચ્છ ગણીને તેના પર કોપાયમાન થયા છો.

³⁹તમે તમારા સેવક સાથે કરેલા કરારથી કંટાળ્યા છો; તમે તેનો મુગટ ભોંય પર [નાખીને] ભ્રષ્ટ કર્યો છે.

⁴⁰તમે તેની બધી વાડો તોડી પાડી છે; તમે તેના કિલ્લાઓનો નાશ કર્યો છે.

⁴¹માર્ગે જનારા બધા તેને લૂંટી લે છે; તે પોતાના પડોશીઓથી અપમાન પામે છે.

⁴²તમે તેના વૈરીઓનો જમણો હાથ ઊંચો કર્યો છે; તમે તેના સર્વ શત્રુઓને હર્ષ પમાડયો છે.

⁴³હા, તેની તરવારની ધાર તમે વાળી દો છો, અને તમે તેને યુદ્ધમાં ઊભો રાખ્યો નથી.

⁴⁴તમે તેનું તેજ લઈ લીધું છે, અને તેનું રાજ્યાસન જમીનદોસ્ત કરી નાખ્યું છે.

⁴⁵તમે તેની જુવાનીના દિવસ ટૂંકા કર્યા છે; તમે તેને લાજથી ઢાંકી દીધો છે. (સેલાહ)

⁴⁶હે પ્રભુ, તે ક્યાં સુધી? શું તમે સદાકાળ સંતાઈ રહેશો? તમારો કોપ [ક્યાં સુધી] અગ્નિની જેમ બળ્યા કરશે?

⁴⁷મારું આયુષ્ય કેટલું ટૂંકું છે, તે સંભારો; તમે માણસજાતને કેવી વ્યર્થતાને માટે ઉત્પન્ન કરી છે!

⁴⁸એવો કોણ છે કે જે જીવશે ને મરણ જોશે નહિ? કોણ પોતાનો આત્મા શેઓલના કબજામાંથી છોડાવશે? (સેલાહ)

⁴⁹હે પ્રભુ, જેને વિષે તમે તમારા વિશ્વાસુપણાએ દાઉદ પ્રત્યે સમ ખાધા, તે તમારી આગલી કૃપા ક્યાં છે?

⁵⁰હે યહોવા, તમારા સેવકોનું અપમાન સંભારો; હું કેવી રીતે મારા હ્રદયમાં બધા પરાક્રમી લોકોનો [તિરસ્કાર] સહન કરું છું;

⁵¹હે યહોવા, તમારા શત્રુઓએ અપમાન કર્યું છે, તેઓએ તમારા અભિષિક્તનાં પગલાંનું અપમાન કર્યું છે [તે પણ તમે સંભારો].

⁵²યહોવા સદાકાળ માટે સ્તુત્ય હો. આમીન તથા આમીન.