Read Gujarati Old Version ગીતશાસ્‍ત્ર 91 Bible Online

ગીતશાસ્‍ત્ર 91 - Gujarati Old Version bible

ગીતશાસ્‍ત્ર 91

¹પરાત્પરના ગુપ્તસ્થાનમાં જે વસે છે તે સર્વસમર્થની છાયામાં રહેશે.

²હું યહોવા વિષે કહીશ, “તે મારો આશ્રય તથા કિલ્લો છે; એ જ મારા ઈશ્વર છે, તેમના પર હું ભરોસો રાખું છું.”

³કેમ કે તે પારધીના પાશથી અને નાશકારક મરકીથી તને બચાવશે.

⁴તે પોતાનાં પીછાંથી તને ઢાંકશે, અને તેમની પાંખો નીચે તને આશ્રય મળશે; તેમની સત્યતા ઢાલ તથા બખ્તર છે.

⁵રાત્રે જે ધાસ્તી લાગે છે તેથી, અથવા તો દિવસે ઊડનાર તીરથી,

⁶અંધારામાં ચાલનાર મરકીથી કે, બપોરે મહામારીથી તું બીહીશ નહિ.

⁷તારી બાજુએ હજાર અને તારે જમણે હાથે દશહજાર [માણસો] પડશે, પણ તે તારી પાસે આવશે નહિ.

⁸તું માત્ર નજરે જોશે, તું દુષ્ટોને મળેલો બદલો દેખશે.

⁹કેમ કે, હે યહોવા, તમે મારા આધાર છો! તેં પરાત્પરને તારો આશ્રય કર્યો છે;

¹⁰તારા પર કંઈ દુ:ખ આવી પડશે નહિ, મરકી તારા તંબુની પાસે આવશે નહિ.

¹¹તને તારા સર્વ માર્ગમાં સંભાળવાને માટે તે પોતાના દૂતોને આજ્ઞા આપશે;

¹² તેઓ પોતાને હાથે તને ધરી રાખશે, રખેને તારો પગ પથ્થર પર અફળાય.

¹³ તું સિંહ તથા સાપ પર પગ મૂકશે; સિંહના બચ્ચાને તથા સાપને તું છૂંદી નાખશે.

¹⁴તેણે મારા પર પોતાનો પ્રેમ બેસાડ્યો છે માટે હું તેને બચાવીશ; તેણે મારું નામ જાણ્યું છે, માટે હું તેને ઊંચો કરીશ.

¹⁵તે મને અરજ કરશે, એટલે હું તેને ઉત્તર આપીશ; હું સંકટસમયે તેની સાથે થઈશ; હું તેને છોડાવીને માન આપીશ.

¹⁶લાંબા આયુષ્યથી હું તેને તૃપ્ત કરીશ, અને તેને મારું તારણ દેખાડીશ.