Read Gujarati Old Version ગીતશાસ્‍ત્ર 95 Bible Online

ગીતશાસ્‍ત્ર 95 - Gujarati Old Version bible

ગીતશાસ્‍ત્ર 95

¹આવો, આપણે યહોવાની આગળ ગાઈએ; આપણા તારણના ખડકની આગળ હર્ષનાદ કરીએ.

²આભારસ્તુતિ સાથે તેમની હજૂરમાં આવીએ, અને ગીતોથી તેમની આગળ હર્ષનાદ કરીએ.

³કેમ કે યહોવા મોટા ઈશ્વર છે, તે સર્વ દેવો પર મોટા રાજા છે.

⁴તેમના હાથમાં પૃથ્વીનાં ઊંડાણો છે; પર્વતોનાં શિખરો પણ તેમનાં છે.

⁵સમુદ્ર તેમનો છે, તેમણે તે બનાવ્યો; અને તેમના હાથોએ કોરી ભૂમિ રચી.

⁶આવો, તેમને ભજીએ તથા નમીએ; આપણા કર્તા યહોવાની આગળ ઘૂંટણિયે પડીએ.

⁷કેમ કે તે આપણા ઈશ્વર છે, આપણે તેમના ચારાના લોક તથા તેમના હાથનાં ઘેટાં છીએ. જો આજે તમે તેમની વાણી સાંભળો તો કેવું સારું!

⁸જેમ મરીબામાં, અને જેમ અરણ્યમાં માસ્સાને દિવસે,

⁹તમારા પિતૃઓએ મારી પરીક્ષા કરી, તેમ તમે તમારાં હ્રદયોને કઠણ ન કરો. તેઓએ મને પારખ્યો તથા મારું કૃત્ય જોયું.

¹⁰ચાલીસ વર્ષ સુધી હું તે પેઢીથી કંટાળી જતો હતો, “તે લોકો ભૂલકણા હ્રદયના છે, અને તેઓએ મારા માર્ગો જાણ્યા નથી.”

¹¹ માટે મેં મારા કોપમાં સમ ખાધા, “તેઓ મારા વિશ્રામમાં પેસશે નહિ.”