Read Gujarati Old Version ગણના 2 Bible Online

ગણના 2 - Gujarati Old Version bible

ગણના 2

¹અને યહોવાએ મૂસાને તથા હારુન ને કહ્યું,

²“ઇઝરાયલી લોકોમાંનો પ્રત્યેક પુરુષ પોતાના પિતાના ઘરના નિશાન સાથે પોતાની ધજાની પાસે છાવણી કરે. મુલાકાતમંડપની સામે ચારે બાજુએ તેઓ છાવણી કરે.

³અને પૂર્વની બાજુએ, સૂર્યોદય તરફ યહૂદાની છાવણીની ધજાવાળાં પોતાનાં સૈન્યો પ્રમાણે છાવણી કરે. અને આમિનાદાબનો દિકરો નાહશોન તે યહૂદાના પુત્રોનો અધિપતિ થાય.

⁴અને તેનું સૈન્ય, એટલે તેઓમાંના જેઓની ગણતરી થઈ તેઓ ચુંમોતેર હજાર ને છસો હતા.

⁵અને તેની પાસે ઇસ્સાખારનું કુળ છાવણી કરે. અને સુઆરનો દિકરો નથાનિયેલ તે ઇસ્સાખારના પુત્રોનો અધિપતિ થાય.

⁶અને તેનું સૈન્ય એટલે તેમાંના જેઓની ગણતરી થઈ તેઓ ચોપન હજાર ને ચારસો હતા.

⁷પછી ઝબુલોનનું કુળ; અને હેલોનનો દિકરો અલિયાબ તે ઝબુલોનના પુત્રોનો અધિપતિ થાય.

⁸અને તેનું સૈન્ય, એટલે તેઓમાંના જેઓની ગણતરી થઈ તેઓ સત્તાવન હજાર ને ચારસો હતા.

⁹યહૂદાની છાવણીમાં જે સર્વની ગણતરી થઈ તેઓ, પોતાનાં સૈન્યો પ્રમાણે, એક લાખ છયાસી હજાર ને ચારસો હતા. તેઓ પ્રથમ ચાલી નીકળે.

¹⁰રુબેનની છાવણીની ધજા પોતાનાં સૈન્યો પ્રમાણે દક્ષિણની બાજુએ રહે. અને શદેઉરનો દિકરો અલીસૂર તે રુબેનના પુત્રોનો અધિપતિ થાય.

¹¹અને તેનું સૈન્ય એટલે તેઓમાંના જેઓની ગણતરી થઈ તેઓ છેંતાળીસ હજારને પાંચસો હતા.

¹²અને તેની પાસે શિમયોનનું કુળ છાવણી કરે. અને સુરિશાદાઈનો દિકરો શલુમિયેલ તે શિમયોનના પુત્રોનો અધિપતિ થાય.

¹³અને તેનું સૈન્ય, એટલે તેઓમાંના જેઓની ગણતરી થઈ તેઓ ઓગણસાઠ હજાર ને ત્રણસો હતા.

¹⁴અને ગાદનું કુળ; અને દુએલનો દિકરો એલિયાસાફ તે ગાદના પુત્રોનો અધિપતિ થાય.

¹⁵અને તેનું સૈન્ય, એટલે તેઓમાંના જેઓની ગણતરી થઈ તેઓ પિસ્તાળીસ હજાર છસો ને પચાસ હતા.

¹⁶રુબેનની છાવણીમાં જે સર્વની ગણતરી થઈ તેઓ, પોતાનાં સૈન્યો પ્રમાણે, એક લાખ એકાવન હજાર ચારસો ને પચાસ હતા. અને તેઓ બીજા [અનુક્રમે] ચાલી નીકળે.

¹⁷પછી છાવણીઓની વચમાંની લેવીઓની છાવણી સાથે મુલાકાતમંડપ નીકળે. જેમ તેઓ છાવણીમાં રહે છે તેમ તેઓ પોતપોતાની જગાએ પોતાની ધજા પાસે રહીને ચાલી નીકળે.

¹⁸એફ્રાઈમની છાવણીની ધજા પોતાનાં સૈન્યો પ્રમાણે પશ્ચિમ બાજુએ રહે. અને આમિહુદનો દિકરો એલિશામા તે એફ્રાઈમના પુત્રોનો અધિપતિ થાય.

¹⁹અને તેનું સૈન્ય, એટલે તેઓમાંના જેઓની ગણતરી થઈ તેઓ ચાળીસ હજાર ને પાંચસો હતા.

²⁰અને તેની પાસે મનાશ્‍શાનું કુળ રહે. અને પદાહસૂરનો દિકરો ગમાલ્યેલ તે મનાશ્શાના પુત્રોનો અધિપતિ થાય.

²¹અને તેનું સૈન્ય, એટલે તેઓમાંના જેઓની ગણતરી થઈ તેઓ બત્રીસ હજાર ને બસો હતા.

²²પછી બિન્યામીનનું કુળ. અને ગિદિયોનીનો દિકરો અબિદાન તે બિન્યામીનના પુત્રોનો અધિપતિ થાય.

²³અને તેનું સૈન્ય, એટલે તેઓમાંના જેઓની ગણતરી થઈ તેઓ પાંત્રીસ હજાર ને ચારસો હતા.

²⁴એફ્રાઈમની છાવણીમાં જે સર્વની ગણતરી થઈ તેઓ, પોતાનાં સૈન્યો પ્રમાણે, એક લાખ આઠ હજાર ને એકસો હતા. અને તેઓ ત્રીજા [અનુક્રમે] ચાલી નીકળે.

²⁵દાનની છાવણીની ધજા પોતાનાં સૈન્યો પ્રમાણે ઉત્તર બાજુએ રહે. અને આમિશાદાઈનો દિકરો અહિયેઝેર તે દાનના પુત્રોનો અધિપતિ થાય.

²⁶અને તેનું સૈન્ય, એટલે તેઓમાંના જેઓની ગણતરી થઈ તેઓ બાસઠ હજાર ને સાતસો હતા.

²⁷અને તેની પાસે આશેરના કુળના છાવણી કરે. અને ઓક્રાનનો દિકરો પાગિયેલ તે આશેરના પુત્રોનો અધિપતિ થાય.

²⁸અને તેનું સૈન્ય, એટલે તેઓમાંના જેઓની ગણતરી થઈ તેઓ એકતાળીસ હજાર ને પાંચસો હતા.

²⁹પછી નફતાલીનું કુળ, અને એનાનનો દિકરો અહીરા તે નફતાલીના પુત્રોનો અધિપતિ થાય.

³⁰અને તેનું સૈન્ય, એટલે તેઓમાંના જેઓની ગણતરી થઈ તેઓ ત્રેપન હજાર ને ચારસો હતા.

³¹દાનની છાવણીમાં જે સર્વની ગણતરી થઈ તેઓ એક લાખ સત્તાવન હજાર ને છસો હતા. તેઓ પોતાનિ ધજાઓ સહિત સૌથી પાછળ ચાલી નીકળે.

³²ઇઝરાયલી પ્રજા જેઓની ગણતરી તેઓના પિતાઓનાં ઘર પ્રમાણે થઈ, તેઓ એ છે. છાવણીઓમાં જે સર્વની પોતપોતાનાં સૈન્યો પ્રમાણે ગણતરી થઈ તેઓ છ લાખ ત્રણ હજાર પાંચસો ને પચાસ હતા.

³³પણ યહોવાએ મૂસાને આજ્ઞા આપી હતી તે પ્રમાણે ઇઝરાયલીઓમાં લેવીઓની ગણતરી કરવામાં આવી નહોતી.

³⁴અને જે સર્વ આજ્ઞાઓ યહોવાએ મૂસાને આપી હતી તે પ્રમાણે ઇઝરાયલી લોકોએ કર્યું. તે જ પ્રમાણે તેઓએ પોતપોતાની ધજાઓની પાસે છાવણી કરી, ને તે જ પ્રમાણે તેઓ પ્રત્યેક પોતપોતાનાં કુટુંબ સાથે પોતપોતાના પિતાઓનાં ઘર પ્રમાણે ચાલી નીકળ્યા.