Read Gujarati Old Version ગણના 4 Bible Online

ગણના 4 - Gujarati Old Version bible

ગણના 4

²“લેવીઓના દિકરાઓમાંથી કહાથના પુત્રોની ગણતરી તેઓનાં કુટુંબો પ્રમાણે તથા તેઓના પિતૃઓનાં ઘર પ્રમાણે કરો,

³એટલે ત્રીસ વર્ષથી પચાસ વર્ષ સુધીની ઉમરના જે સર્વ મુલાકાતમંડપનું કામ કરવાને સેવકપદમાં દાખલ થાય છે તે બધાની [ગણતરી કરો].

⁴મુલાકાતમંડપમાં પરમપવિત્ર વસ્તુઓના સંબંધમાં કહાથના પુત્રોનું કામ આ છે:

⁵અને છાવણી ઊપડતી વખતે હારુન તથા તેના દિકરા અંદર જઈને ઓથાનો પડદો ઉતારે, ને તેને કરારકોશ ઉપર ઓઢાડે.

⁶અને તે પર સીલ [માછલા] ના ચામડાનું આચ્છાદન નાખે, ને તેના પર એક તદ્દન નીલ રંગનું કપડું પાથરે, ને તેના દાંડા તેમાં નાખે.

⁷અને અર્પેલી રોટલીની મેજ પર નીલ રંગનું કપડું પાથરે, ને તેના ઉપર થાળીઓ તથા ચમચા તથા પ્યાલા તથા તર્પણને માટે વાટકા મૂકે; અને નિત્યની રોટલી તેના ઉપર રહે.

⁸અને તેઓના ઉપર તેઓ કિરમજી કપડું પાથરે, ને સીલના ચામડાના આચ્છાદનથી તેને ઢાંકી દઈને તેનાં દાંડા તેમાં નાખે.

⁹અને તેઓ નીલ રંગનું કપડું લઈને રોશનીના દીપવૃક્ષ તથા તેના દીવા તથા ચીમટા, તથા તબકડીઓ તથા તેને લગતું કામ કરવાનાં સર્વ તેલપાત્રોને ઢાંકે.

¹⁰અને તેઓ તે તથા તેની સર્વ સામગ્રી સીલના ચામડાના આચ્છાદનમાં નાખીને ભૂગળ ઉપર મૂકે.

¹¹અને સોનાની વેદી પર તેઓ નીલ રંગનું કપડું પાથરે ને સીલના ચામડાના આચછદનથી તેને ઢાંકી દઈને તેના દાંડા તેમાં નાખે.

¹²અને તેઓ સેવાની સર્વ સામગ્રી જે વડે તેઓ પવિત્રસ્થાનમાં સેવા કરે છે તે લે, ને નીલ રંગના કપડામાં તે મૂકે, ને સીલના ચામડાના આચ્છાદનથી તે ઢાંકી દિઇને ભૂંગળ પર તે મૂકે.

¹³અને તેઓ વેદી પરથી રાખ કાઢી નાખીને તેના ઉપર જાંબુડા રંગનું કપડું પાથરે.

¹⁴અને તેના ઉપર તેઓ તેને લગતું કામ કરવાની સર્વ સામગ્રી એટલે સગડીઓ, તથા ત્રિશૂળો, તથા પાવડા, તથા તપેલીઓ, એટલે વેદીનાં સર્વ પાત્રો મૂકે. અને તેના ઉપર તેઓ સીલના ચામડાનું આચ્છાદાન નાખે, ને તેના દાંડા તેમાં નાખે.

¹⁵અને છાવણી ઊપડવાની હોય ત્યારે હારુન તથા પવિત્રસ્થાનના સર્વ સરસામાનને ઢાંકી રહે, ત્યાર પછી કહાથના પુત્રો તેને ઊંચકવાને આવે. પણ તેઓ કોઈ પવિત્ર વસ્તુનો સ્પર્શ ન કરે, રખેને તેઓ માર્યા જાય. મુલાકાતમંડપના સંબંધમાં કહાથના દિકરાઓને ઊંચકવાનું તે એ છે.

¹⁶અને હારુન યાજકના પુત્ર એલાઝારનુમ કામ આ છે: એટલે રોશનીને માટે તેલ, તતા સુવાસિત સુગંધી, તથા નિત્યનું ખાદ્યાર્પણ, તથા અભિષેકને માટે તેલ, ને મંડપ તથા તેમાંનું બધું, પવિત્રસ્થાન તથા તેના સરસામાનની સંભાળ રાખવાનુ.”

¹⁷અને યહોવાએ મૂસાને તથા હારુનને કહ્યું,

¹⁸“લેવીઓમાંથી કહાથીઓનાં કુટુંબોના કુળને બાતલ ન કરો.

¹⁹પણ તેઓ પરમપવિત્ર વસ્તુઓની પાસે જઈને માર્યા ન જાય પણ જીવતા રહે, માટે તમે એમ કરો કે હારુન તથા તેના દિકરા અંદર પ્રવેશ કરીને તે સર્વને પોતપોતાનું કામ તથા જવાબદારી ઠરાવી આપે.

²⁰પણ તેઓ પવિત્ર વસ્તુઓને જોવાને એક પળ પણ અંદર ન જાય, રખેને તેઓ માર્યા જાય.”

²¹અને યહોવાએ મૂસાને કહ્યું,

²²“ગેર્શોનના દિકરાના પિતૃઓનાં ઘર પ્રમાણે, તેઓનાં કુટુંબો પ્રમાણે, તેઓની કુલ સંખ્યા પણ કાઢ.

²³ત્રીસ વર્ષથી પચાસ વર્ષ સુધીની ઉમરના જે સર્વ અંદર જઈને મુલાકાતમંડપમાં કામ કરવાને સેવામાં હાજર રહે છે તેઓની ગણતરી કર.

²⁴સેવા કરવામાં તથા ભાર ઊંચકવામાં ગેર્શોનીઓનાં કુટુંબોનું કામ આ છે.

²⁵એટલે તેઓ મંડપના પડદા તથા મુલાકાતમંડપ, તેનું આચ્છાદન તથા તે ઉપરનું સીલના ચામડાનું આચ્છાદન, તથા મુલાકાતમંડપના દ્વારનો પડદો;

²⁶તથા આંગણાના પડદા, તથા મંડપની પાસેના તથા વેદીની આસપાસના આંગણાના દરવાજાના બારણાનો પડદો, તથા તેઓની દોરીઓ, તથા તેઓના કામને લગતાં સર્વ ઓજારો, તથા જે કંઈ તેઓથી બને તે તેઓ ઊંચકી લે, ને એના સંબંધમાં તેઓ સેવા કરે.

²⁷ગેર્શોનીઓના પુત્રોનું ભાર ઊંચકવાનું તથા સર્વ સેવાનું બધું કામ હારુન તથા તેના પુત્રોની આ પ્રમાણે થાય અને તમે તેઓને ઊંચકવાના બધા ભાર ઠરાવીને તેમને સોંપો.

²⁸મુલાકાતમંડપમાં ગેર્શોનના પુત્રોનાં કુટુંબોની સેવા આ છે: અને હારુન યાજકના દિકરા ઇથામારના હાથ તળે તેમનું કામ રહે.

²⁹અને મરારીના દિકરાઓની, તેઓના પિતૃઓનાં ઘર પ્રમાણે, તેઓનાં કુટુંબો પ્રમાણે, તું ગણતરી કર.

³⁰ત્રીસ વર્ષથી પચાસ વર્ષ સુધીની ઉમરના જે સઘળા અંદર જઈને મુલાકાતમંડપમાં કામ કરવાને સેવામાં હાજર રહે છે તેઓની ગણતરી તું કર.

³¹અને મુલાકાતમંડપમાં તેઓની સર્વ સેવાના સંબંધમાં તેઓને સોપેલું ભાર ઊંચકવાનું કામ આ છે: એટલે મંડપનાં પાટિયાં તથા તેની ભૂંગળો તથા તેના સ્તંભો તથા તેની કૂંભીઓ

³²તથા આંગણાંની આસપાસ સ્તંભો તથા તેનતથા તેઓની મેખો, તથા તેઓની દોરીઓ, તેઓનાં સર્વ ઓજારો સહિત, તથા તેઓને લગતી બધી સામગ્રી સહિત. અને તમે તેઓને સોંપેલા ભારનાં ઓજારોનાં નામ દિઇને તથા તેઓને ગણીને સોંપો.

³³મરારીના પુત્રોનાં કુટુંબોનું કામ, એટલે તેમની બધી સેવા પ્રમાણે, મુલાકાતમંડપમાં, હારુન યાજકના પુત્ર ઇથામારના હાથ નીચે જે કામ તે એ છે.”

³⁴અને મૂસાએ તથા હારુને તથા પ્રજાના અધિપતિઓએ કહાથના દિકરાઓની ગણતરી તેઓનાં કુટુંબો પ્રમાણે તથા તેઓના પિતૃઓનાં ઘર પ્રમાણે કરી.

³⁵એટલે ત્રીસ વર્ષથી પચીસ વર્ષ સુધીની ઉમરના જે પ્રત્યેક મુલાકાતમંડપમાં કામ કરવાને સેવકપદમાં દાખલ થયા હતા,

³⁶તેઓની ગણતરી તેઓનાં કુટુંબો પ્રમાણે બે હજાર સાતસો ને પચાસની થઈ.

³⁷કહાથીઓનાં કુટુંબોમાંના જેઓની ગણતરી થઈ, એટલે જે સર્વ મુલાકાતમંડપમાં સેવા કરતા હતા, તથા જેઓની ગણતરી મૂસાની હસ્તક અપાયેલી યહોવાની આજ્ઞા પ્રમાણે મૂસાએ તથા હારુને કરી તે એ છે.

³⁸અને ગેર્શોનના પુત્રોમાંના જેઓની ગણતરી તેઓનાં કુટુંબો પ્રમાણે, તેઓના પિતૃઓનાં ઘર‍ પ્રમાણે થઈ,

³⁹એટલે ત્રીસ વર્ષથી પચાસ વર્ષ સુધીની ઉંમરના જે પ્રત્યેક મુલાકાતમંડપમાં કામ કરવાને સેવકપદમાં દાખલ થયા હતા,

⁴⁰તેઓની ગણતરી તેઓનાં કુટુંબો પ્રમાણે, તેઓના પિતૃઓનાં ઘર પ્રમાણે, બે હજાર છસો ને ત્રીસની થઈ.

⁴¹ગેર્શોનના દિકરાઓનાં કુટુંબોમાંનાં જેઓની ગણતરી થઈ, એટલે જે સર્વ મુલાકાતમંડપમાં સેવા કરતા હતા, તથા જેઓની ગણતરી મૂસાએ તથા હારુને યહોવાની આજ્ઞા પ્રમાણે કરી, તેઓ એ છે.

⁴²અને મરારીના પુત્રોનાં કુટુંબોમાંના જેઓની ગણતરી તેઓનાં કુટુંબો પ્રમાણે, તેઓના પિતૃઓનાં ઘર પ્રમાણે થઈ,

⁴³એટલે ત્રીસ વર્ષથી પચાસ વર્ષ સુધીની ઉમરના જે પ્રત્યેક મુલાકાતમંડપમાં કામ કરવાને સેવકપદમાં દાખલ થયા હતા,

⁴⁴તેઓની ગણતરી, તેઓનાં કુટુંબો પ્રમાણે, ત્રણ હજાર ને બસોની થઈ.

⁴⁵મરારીના પુત્રોનાં કુટુંબોમાંના જેઓની ગણતરી થઈ, એટલે જેઓની ગણતરી મૂસાની હસ્તક અપાયેલી યહોવાની આજ્ઞાપ્રમાણે મૂસાએ તથા હારુને કરી, તેઓ એ છે.

⁴⁶લેવીઓમાંના જે બધાની ગણતરી મૂસાએ તથા હારુને તથા ઇઝરાયલના અધિપતિઓએ તેઓનાં કુટુંબો પ્રમાણે, તેઓનાં પિતૃઓનાં ઘર પ્રમાણે કરી,

⁴⁷એટલે ત્રીસ વર્ષથી પચાસ વર્ષ સુધીની ઉમરના જે પ્રત્યેક મુલાકાતમંડપમાં સેવાનું કામ તથા બોજો ઊંચકવાનું કામ કરવા માટે દાખલ થયા હતા,

⁴⁸તેઓની ગણતરી આઠ હજાર પાંચસો ને એંસીની થઈ.

⁴⁹તેઓમાંના પ્રત્યેકની ગણતરી તેના કામ પ્રમાણે તથા તેના ઊંચકવાના બોજા પ્રમાણે મૂસાની હસ્તક, યહોવાની આજ્ઞા પ્રમાણે થઈ. જેમ યહોવાએ મૂસાને આજ્ઞા આપી હતી તેમ તેણે તેઓની ગણતરી કરી.