Read Gullah Matthew 13 Bible Online

Matthew 13 - Gullah bible

Matthew 13

¹Dat same day dey, Jedus come outta de house weh e been an e gone seddown close ta Lake Galilee.

²An de crowd wa geda roun um been so big dat e git eenta a boat, an e seddown een de boat wiles de people dem beena stanop pon de sho.

³Den e tell de people paable fa laan um plenty ting. E say, “One faama gone ta e fiel fa plant seed.

⁴Wiles e beena scatta de seed, some fall long de pat, an de bod dem come an nyam um op.

⁵Some seed fall pontop ob groun weh dey been heapa stone, an dey ain been bot a leetle bit ob dort. De seed sprout an staat fa grow quick cause de dort ain been deep dey.

⁶Bot wen de sun git hot, e bun de leaf ob de plant dem. Dey root ain grow nuff een de groun an dey wilta.

⁷Some seed fall eenta de briah. De briah grow op an choke de plant dem til dey ain been able fa grow.

⁸An some seed fall pontop good groun, an de plant dem beah. Some plant beah a hundud, some beah sixty, an some beah tirty time mo den wa e staat wid.”

⁹An den Jedus say, “Oona got yea fa yeh, ainty? Den oona mus yeh wa A da say!” Wa Mek Jedus Tell Paable

¹⁰Jedus ciple dem come ta Jedus an aks um say, “Wa mek ya tell paable fa laan de people?”

¹¹Jedus tell um say, “God gii oona de chance fa know bout dem secret bout how e gwine rule all people, bot oda people ain got dat chance.

¹²De poson wa hab sompin, God gwine gim mo. Bot de poson wa ain hab nottin, God gwine tek way eben dat leeleetle bit wa e hab.

¹³Dis hoccome A tell um paable. A tell um so dat dey kin look, bot eben dough dey look, dey ain gwine see. Dey kin yeh, bot dey ain gwine yeh fa true, needa ondastan.

¹⁴So dey da mek wa de prophet Isaiah done been say come true,‘Oona gwine yeh an yeh, bot oona ain neba gwine ondastan.Oona gwine look an look, bot oona ain neba gwine see.

¹⁵Cause dem people git haad haat.Dey done stop op dey yea an cyahn yeh nottin, an dey done shet dey eye.Cause ob dat, dey ain able fa see wid dey eye, dey ain able fa yeh wid dey yea, dey ain able fa ondastan wid dey haat,an dey ain able fa ton ta me fa heal um.’

¹⁶“Bot oona bless fa true, cause oona eye da see an oona yea da yeh.

¹⁷A da tell oona fa true say, plenty prophet an plenty people wa waak scraight wid God been wahn fa see dem ting wa oona da see, bot dey ain shim. Dey been wahn fa yeh wa oona da yeh, bot dey ain yeh um. Wa de Paable Bout de Seed Mean

¹⁸“Now den, oona mus listen yah ta wa de paable bout de seed mean.

¹⁹De people dem wa yeh, bot ain ondastan de wod wa tell bout God rule, dey stan like de seed wa fall long de pat. De ebil one come long an tek way de wod wa been dey een dey haat.

²⁰De seed wa faddown pontop de groun wa full op wid rock, dat like people wa yeh de wod an dey glad fa bleebe um soon as dey yeh um.

²¹Bot dey ain got no root. De wod ain down deep een dey haat fa true, so dem people bleebe jes a leetle wile. Cause dey beena bleebe de wod, dey git trouble an people mek um suffa. So den dey lef tareckly.

²²Dem seed wa fall eenta de briah, dat like de people wa yeh de wod, bot dey fret bout de ting dem dey got. Dey lob plenty ting an pledja een dis wol. Dem ting choke out de wod een dey haat. Dem people ain do nottin fa God. Dey crop dohn mount ta nottin.

²³Bot de seed wa fall pon de good groun, dat like de people wa yeh de wod an ondastan um een dey haat. Dey mek good crop. Some beah a hundud, some beah sixty, an some beah tirty.” De Paable Bout de Grass

²⁴Jedus tell um noda paable say, “Wen God da rule, e stan like wen one man plant good seed een e fiel.

²⁵Bot one night wiles all de people beena sleep, dat man enemy come an plant grass mongst de good wheat seed wa de man done plant. Den e enemy gone.

²⁶Wen de plant dem grow an staat fa beah, people see de grass mix op wid de wheat plant.

²⁷Dat man wa own de fiel, e saabant dem aks say, ‘Sah, ya done plant good seed een ya fiel, ainty? Weh de grass come fom wa da grow dey?’

²⁸De man tell um say, ‘Dat been me enemy wa done dat.’ De saabant dem aks um say, ‘Ya wahn we fa go pull de grass op?’

²⁹E tell um say, ‘No, cause wen oona da pull de grass op, oona gwine pull some de wheat plant op long wid de grass.

³⁰Oona leh de wheat an de grass grow togeda til haabis time come. Den A gwine tell de haabis wokman dem say, Oona pull de grass op fus an bun um. Den oona geda de wheat an pit um eenta me baan.’ ” De Paable Bout de Mustard Seed

³¹Jedus tell um noda paable, say, “Wen God da rule, e stan like one mustard seed dat a man tek an plant een e fiel.

³²Now de mustard seed de leeleetles seed ob all, stillyet wen e grow, e git big mo den all de oda plant dem een de gyaaden. E da ton ta a tree, so dat de bod dem come an mek nes pon e limb.” De Paable Bout Yeast

³³Jedus tell um noda paable say, “Wen God da rule, e jes like yeast. A ooman tek yeast an mix um wid a big sack ob flour til de whole dough rise op.” Jedus Tell All Ting Yah een Paable

³⁴Jedus tell de crowd ob people all dem ting yah een paable. E ain tell um nottin cep een paable.

³⁵E tell um paable so dat wa de prophet done say, dat gwine happen, wen e say,“A gwine tell paable wen A da taak ta de people.A gwine tell um bout de ting dem wa dey ain been know fom de time wen de wol fus staat.” Wa de Paable Bout de Grass Mean

³⁶Den Jedus lef de crowd an gone eenta de house. E ciple dem come an aks um fa tell um wa de paable bout de grass een de fiel mean.

³⁷Jedus tell um say, “De Man wa Come fom God, e de man wa plant de good seed.

³⁸De fiel, dat de wol, an de good seed stan like de people dem wa God da rule oba. An de grass, dat dem wa blongst ta de ebil one.

³⁹De enemy wa plant de grass, e de Debil. De haabis time, dat de time wen de wol gwine end, an de haabis wokman, dat de angel dem.

⁴⁰Jes like dey pull de grass op an bun um een de fire, dat de same ting wa gwine happen wen de end time come.

⁴¹De Man wa Come fom God gwine sen e angel dem an dey gwine pull out all dem wa mek people sin, an dem wa do ebil, mongst dem wa God da rule oba.

⁴²De angel dem gwine shrow dem bad people eenta de hell fire, an dey gwine cry bitta teah an grine dey teet.

⁴³Den de people dem wa waak scraight wid God, dey gwine shine same like de sun, dey weh God da rule. Oona got yea fa yeh, ainty? Den oona fa yeh wa A say! De Paable Bout wa Dey Hide een de Fiel

⁴⁴“Wen God da rule, e stan like one walyable ting wa dey done bury een a fiel fa hide um. A man come find um, an den e bury um gin fa hide um. E so full op wid joy dat e gone an sell all e got. Den e gone back an buy dat fiel. De Paable Bout de Fine Bead

⁴⁵“Same way so, wen God da rule, e stan like one poson wa da look fa walyable bead fa buy.

⁴⁶Wen e find one wa walyable mo den mos ob um, e gone an sell all e got an e buy dat walyable bead. De Paable Bout de Fishin Net

⁴⁷“Same way so, wen God da rule, e stan like a fishin net wa people cyas eenta de wata an ketch all kind ob fish.

⁴⁸Wen de net full, de fishaman dem drag um ta de sho. Den dey seddown fa pick de good fish dem an pit um eenta dey bucket, an dey shrow way de fish wa ain no good.

⁴⁹Dat how e gwine be een de time wen de end come. De angel dem gwine come an geda op de ebil people, pick um out fom mongst dem wa waak scraight wid God.

⁵⁰An de angel dem gwine shrow dem ebil people eenta de hell fire. Dey dey gwine cry bitta teah an grine dey teet.” De Nyew an de Ole Trute

⁵¹Jedus aks um say, “Oona ondastan all dis wa A done tell oona?” Dey tell um, “Yeah!”

⁵²E tell um say, “So den, dis mean dat ebry Law teacha wa done laan de true ting bout God rule, e stan jes like a poson wa own a house an e bring ting wa walyable outta e room weh e sto um, ole ting an nyew ting too.” De People Ain Wahn Jedus Dey Wid Um

⁵³Wen Jedus been shru da tell dem paable, e lef dey.

⁵⁴E gone back ta e home town. E staat fa laan de people een dey meetin house. An de people dem wa yeh um dey been stonish. Dey say, “Weh dis man git dis sense an de powa fa do dem miracle yah?

⁵⁵Ain dis de capenta boy? Ain Mary e modda an ain James, Joseph, Simon an Judas dem e broda?

⁵⁶Ain e sista dem all dey yah wid we? Weh dis man git all dis sense an powa fa do miracle yah?”

⁵⁷So dey ain wahn fa hab nottin fa do wid um. Jedus tell um say, “De people gii hona ta a prophet ebryweh cep weh e raise op at. Een e own town an een e own fambly dey ain gim no hona.”

⁵⁸An cause de people ain bleebe een um, Jedus do jes a few miracle een dat place dey.