Read Gullah Matthew 4 Bible Online

Matthew 4 - Gullah bible

Matthew 4

¹Atta dat, de Holy Sperit lead Jedus eenta de wildaness, weh de Debil try fa mek um do sompin e ain oughta do.

²Wen Jedus ain nyam nottin fa foty day an foty night, e been hongry down.

³De Debil, wa try fa mek people do ebil ting, come ta Jedus dey an tell um say, “Since ya God Son, chaage dese rock yah fa ton eenta bread.”

⁴Jedus ansa um say, “Dey done write down een God Book say, ‘E tek mo den sompin fa nyam fa mek people lib fa true. E tek ebry wod dat come outta God mout.’ ”

⁵Den de Debil cyaa Jedus ta de holy city Jerusalem. E pit um way op pontop de mos high paat ob God House.

⁶E tell Jedus say, “Since ya God Son, shrow yasef down fom yah. Cause dey done write down een God Book say,‘God gwine gii orda ta e angel dem, tell um fa tek cyah ob ya.De angel dem gwine tote ya een dey han, so dat ya ain gwine hut eben ya foot pon a rock.’ ”

⁷Jedus tell de Debil say, “Dey done write down noda ting een God Book, say, ‘Mus dohn try fa test de Lawd ya God.’ ”

⁸Atta dat, de Debil tek Jedus op ta a high place an show um all de country dem een de whole wol wid all dey powa an all dey purty ting wa dey got.

⁹De Debil tell Jedus say, “A gwine gii ya all dem ting ef ya bow down an woshup me op.”

¹⁰Jedus tell um say, “Git way fom yah, Satan! Cause dey done write down een God Book say, ‘Mus woshup de Lawd ya God an mus dohn saab nobody cep um.’ ”

¹¹Den de Debil lef Jedus, an de angel dem come fa tek cyah ob um. Jedus Staat E Wok een Galilee

¹²Wen Jedus yeh dat dey done pit John eenta de jailhouse, e gone back ta Galilee.

¹³Bot e ain gone ta Nazareth. E gone fa lib een Capernaum, one willage close ta Lake Galilee, een de arie ob Zebulun an Naphtali.

¹⁴Dis happen fa mek come true wa de prophet Isaiah done been say,

¹⁵“Een Zebulun an Naphtali lan, pon de oda side ob de Jerden Riba, an pon de way ta de great sea, een Galilee, weh dey plenty people wa ain Jew,

¹⁶dem people beena lib een de daak. Dey ain know God, bot now dey see a great light.Dey beena lib een de daak lan full ob det, bot now de light da shine pon um.”

¹⁷Fom dat time dey, Jedus staat fa tell all de people say, “Oona mus change oona sinful way an dohn do um no mo. Cause de time mos yah wen God gwine rule oba oona!” Fo Fishaman Jine Op wid Jedus fa Be E Ciple

¹⁸Jedus beena waak long de sho ta Lake Galilee wen e see two broda dey wa been fishaman. Dey name been Simon, wa dey call Peter, an e broda Andrew. Dey beena cyas dey net eenta de wata fa ketch fish.

¹⁹Jedus tell um say, “Oona mus come folla me! Oona beena ketch fish, bot tareckly, A gwine laan oona fa ketch people fa me.”

²⁰Soon as e say dat, dey lef dey fishin net an gone long wid Jedus fa folla um.

²¹Jedus gone on fom dey, an e see two oda broda name James an John. Dey Zebedee son dem. Dey been dey een dey boat wid dey fada Zebedee, da mend dey fishin net. Jedus call um fa come folla um.

²²Scraight way, James an John lef de boat an dey fada, an dey gone wid Jedus. Jedus Laan de People an Heal A Whole Heap ob Um

²³Jedus gone all shru Galilee. E beena laan de people een de Jew meetin house dem, an e tell um de Good Nyews bout how God da come fa rule. An e heal all kind ob ailment dat de people hab.

²⁴De nyews bout Jedus spread all oba Syria country, an de people come ta um. Dey come da tote all de sick people dat hab all diffunt kind ob ailment. Some dem beena suffa plenty pain an some hab ebil sperit eenside um. Some hab fits an some ob dem ain able fa eben moob. Dey all come ta Jedus, an e heal dem op.

²⁵A great big crowd ob people gone long wid Jedus. Dey come fom Galilee, fom de Ten Town, an fom Jerusalem, an Judea an de arie pon de oda side ob de Jerden Riba, an dey all folla Jedus.