Read Gullah Mark 3 Bible Online

Mark 3 - Gullah bible

Mark 3

¹One oda day, Jedus gone ta de Jew meetin house, an one man been dey wa hab e han cripple op.

²Some people dey been wahn fa cuse Jedus, so dey watch um all de time fa see ef e gwine heal dat man wa hab e han cripple op pon de Woshup Day.

³Jedus tell de man wa hab e han cripple op say, “Come stanop yah ta de front ob we.”

⁴Den Jedus aks de people say, “Tell me, coddin ta we Law, wa oona say we kin do pon de Woshup Day? E right fa do good, or fa do bad? Fa sabe man life, or fa stroy um?” Bot de people ain ansa um. Dey ain crack e teet.

⁵Wiles Jedus look pon um e bex een e haat. Bot same time, e pity um cause dey head been so haad an wrong. E say ta de man, “Scretch out ya han.” De man scretch e han out an dat han git well like nyew.

⁶De Pharisee dem gone outta de Jew meetin house. Dey gone meet right way wid some ob King Herod people fa see how dey gwine kill Jedus. Heapa People Come Folla Jedus

⁷Jedus an e ciple dem wa alltime trabel longside um, dey gone way ta Lake Galilee. An a heapa people come fom Galilee an folla longside Jedus.

⁸Wen dey yeh bout all wa Jedus beena do, a heapa people come fom Judea lan, fom Jerusalem city an Idumea lan. Dey come fom oba ta de side de Jerden Riba an dem town roun Tyre an Sidon.

⁹De people been so many dat Jedus tell e ciple dem fa draw op a boat, bring um close ta de sho ready fa um fa go eenta, ef de people crowd um tommuch.

¹⁰Cause Jedus done beena heal plenty sick people, so all de people wa sick beena crowd um fa try fa tetch um.

¹¹Wensoneba people wa hab ebil sperit een um see Jedus, dey faddown pon de groun een front ob um. Dem ebil sperit holla say, “Ya God Son!”

¹²Bot wensoneba dey say dat, Jedus waan dem, chaage um say, “Mus dohn tell nobody who A da.” Jedus Pick Tweb Postle

¹³Jedus gone op one high hill an e call out de man dem wa e wahn fa come, an dey gone fa meet um.

¹⁴Jedus pick tweb man fa e be e postle. E pick um fa trabel long wid um an fa go tell people God wod.

¹⁵An e gim powa fa dribe de ebil sperit dem outta people.

¹⁶Dese been de tweb man wa Jedus done pick. One been Simon wa Jedus gii de name Peter.

¹⁷Dey been James an e broda John, dem wa been Zebedee son. Jedus call dem Boanerges, dat mean “Man wa git bex tommuch an mek nise like tunda.”

¹⁸An e pick Andrew, Philip, Bartholomew, Matthew, Thomas, James wa been Alphaeus son, Thaddaeus, an Simon wa been call de Patrot.

¹⁹An e pick Judas Iscariot, wa been gwine han Jedus oba ta e enemy dem. De Jew Law Teacha dem Say Beelzebub Hab Powa Oba Jedus

²⁰Den Jedus an e ciple dem gone ta a house fa stay. A crowd come geda roun um gin, so dey ain hab chance fa nyam.

²¹Wen Jedus fambly yeh bout dat, dey gone fa tek um outta dey, cause people beena say, “E da mek like e outta e head.”

²²Some Jew Law teacha wa come outta Jerusalem say, “Beelzebub, de leada ob de ebil sperit dem, dey eenside Jedus, tell um wa fa do! E gim de powa fa dribe out ebil sperit fom people.”

²³So Jedus call de people an laan um. E tell um one paable say, “Fa sho, dat poson wa Satan hab powa oba ain gwine dribe out Satan, ainty?

²⁴Same like ef people een de same country da fight mongst deysef, dat country ain gwine las.

²⁵An ef people een de same house da fight mongst deysef, dey gwine scatta.

²⁶Same way so, ef Satan da fight ginst e own wokman dem, dey gwine wide op e powa. Satan ain gwine rule oba um no mo.

²⁷“Fa true, ain nobody gwine go eenside scrong man house an tief e propaty, lessin e fus tie dat scrong man op. Den e kin tek all de scrong man propaty.

²⁸A da tell oona fa true, God gwine paadon all kinda ebil ting people do, an all de ebil ting dem dey da taak bout me.

²⁹Bot God ain neba gwine paadon nobody wa say ebil ting ginst de Holy Sperit. Dat sin gwine stay dey pon dat poson faeba.”

³⁰Jedus say dat cause some people beena say, “Ebil sperit dey eenside Jedus.” Jedus Fambly

³¹Jedus modda an e broda dem come find um. Dey beena stan outside de door, an dey sen somebody fa call um.

³²De crowd wa beena geda, da seddown roun Jedus, tell um say, “Look, ya modda an ya broda dem right outside de door. Dey wahn fa see ya.”

³³Jedus ansa um say, “Who dat me modda, an me broda dem?”

³⁴E ton look roun pon de people wa beena seddown roun um an say, “Oona wa dey yah, oona me modda an me broda dem!

³⁵De poson wa da do wa God wahn, dat poson me broda, me sista an me modda.”