Read Gullah Mark 6 Bible Online

Mark 6 - Gullah bible

Mark 6

¹Jedus lef dat place an gone back ta e town, an e ciple dem gone long wid um.

²Wen de Jew Woshup Day come, Jedus gone ta de Jew meetin house an staat fa laan de people bout God. Heapa dem wa yeh um beena stonish, say, “Weh dis man git dis sense? Who dat gim dis sense yah? E eben do miracle!

³Dis man jes de capenta, ainty? Ain e Mary son? An James, Joseph, an Judas an Simon dem e broda, ainty? An e sista dem yah wid we, ainty?” So dat how de people beena taak ginst Jedus.

⁴Jedus tell um say, “People da gii hona ta a prophet ebryweh cep weh e raise op at. Een e own town an mongst e own kinfolk dey ain gim no hona.”

⁵Dey een e own town, Jedus ain been able fa do miracle, cepin e lay e han pon shree, fo people head an heal um.

⁶Jedus beena stonish cause de people dey ain bleebe pon um. Jedus Sen Out E Tweb Ciple fa Tell de Good Nyews

⁷E call e tweb ciple dem togeda an tell um fa go out ta de willage dem roun bout dey. E sen um out two by two an e gim powa fa dribe out ebil sperit.

⁸An dis yah how e tell um fa go. E chaage um say, “Mus dohn tote nottin wid oona cepin jes a waakin stick. Mus dohn tote food or a grip an no money een oona pocket.”

⁹E tell um fa weah sandal, bot dey ain fa tote extry cloes.

¹⁰An Jedus tell um say, “Wen oona da gwine eenta a town, de fus house weh dey gree fa leh ya stay, oona mus stay oba wid um til oona lef dat town.

¹¹Ef oona go eenta any town weh de people ain welcome oona, an dey ain gwine yeh wa oona say, oona mus lef dat town. An wen oona come out, mus shake de duss off ya foot fa show de people dat dey done ebil.”

¹²So de ciple dem gone all oba, da tell people dey mus change dey sinful way an dohn do um no mo.

¹³De ciple dem dribe out a heapa ebil sperit, an dey pit oll pon de head a heapa sick people an mek um well. Dey Kill John wa Bactize

¹⁴De nyews bout Jedus spread all oba til King Herod, wa beena rule een Galilee, yeh bout um. Some people say, “Dis yah John wa Bactize. E done dead bot now e da lib gin, come outta e grabe. Dat wa gim powa fa do miracle.”

¹⁵Oda people say, “No, dat dey Elijah.” An some oda beena say, “No, e one a dem prophet same like way back dey.”

¹⁶Bot wen King Herod yeh bout all wa Jedus beena do, e say, “Dat dey John wa Bactize! A done mek dem cut e head off, bot now e da lib gin!”

¹⁷King Herod say dat cause fo dat time e done been mek dem ketch John an pit um een de jailhouse. E done dat fa sake ob Herodias, wa e done marry eben dough Herodias been e broda Philip wife.

¹⁸John done beena tell Herod say, “Ain fittin fa ya fa marry ya broda Philip wife!”

¹⁹Herodias been hab bad taste een e mout fa John, an e been wahn fa kill um, bot e ain been able.

²⁰King Herod beena scaid ob John cause e know John waak scraight an e been God own man. So Herod done all e able fa do fa keep John safe. Wensoneba e yeh John tell bout God, Herod warry, warry, bot spite a dat, e glad fa yeh um.

²¹Now de time reach wen Herodias git de chance fa do wa e wahn ta John. One day, King Herod been mek paaty fa e birsday. De king call all de big leada dem wa wok fa e gobment, de aamy offisa an dem oda leada een Galilee fa come ta e feas.

²²Den Herodias daughta come an dance fa de paaty. E dance so fine dat King Herod an de people wa ta de paaty been too heppy fa um. So de king tell dat gyal say, “Mus aks me fa anyting ya wahn. A gwine gii ya um.”

²³De king promise de gyal say, “A tell ya da trute. A gwine gii ya anyting ya aks fa. Ef ya wahn, A gwine eben wide op dis country A da rule eenta two paat an gii ya one paat.”

²⁴So den, dat gyal gone fa aks e modda say, “Wa A oughta aks um fa gii me?” E modda ansa say, “Tell um fa gii ya de head ob dat John wa Bactize.”

²⁵So de gyal mek hace, gone back fa tell de king say, “A wahn ya fa gii me de head ob dat John wa Bactize pon a big plate right now.”

²⁶Den King Herod been too saary, bot e ain been wahn fa broke de promise e done been mek. Cause e done promise de gyal, an de people een de paaty done been yeh wa e say.

²⁷De king sen sodja fa go bring um John head. So de sodja gone ta de jailhouse an e cut off John head.

²⁸E pit de head pon a big plate an bring um, gim ta de gyal. De gyal tek um, gii e modda Herodias.

²⁹Wen John ciple dem yeh bout dat, dey gone an tek way John body, pit um een a tomb. Jedus Feed A Heapa People

³⁰De postle dem come back, meet wid Jedus. Dey tell um all dey done an wa dey been laan people.

³¹Now, so many people beena gwine een an out dey, dat Jedus an e ciple dem ain been git chance eben fa nyam. So Jedus tell e ciple dem say, “Leh we gone way ta some quiet place an oona kin res a bit.”

³²So dey gone out een a boat by deysef fa cross oba ta a place weh nobody lib.

³³Bot plenty people done shim wen dey da gwine, an dey know right way who dey da. So dem people gone out fom all de town. Dey ron ta de place weh Jedus an e ciple dem beena gwine fo Jedus dem reach dey.

³⁴Wen Jedus git outta de boat, e see dis big crowd ob people da wait fa um dey. Jedus been too saary fa dem, cause dey been like sheep wa ain got no shephud fa mind um. So den Jedus staat fa laan dem people plenty ting.

³⁵Wen de sun staat lean fa down, Jedus ciple dem come ta um say, “Lawd, ain nobody lib een dis place yah, an de sun da lean fa down.

³⁶Ya oughta sen de people ta dem willage an faam close by fa buy sompin fa nyam.”

³⁷Bot Jedus ansa um say, “Oonasef mus gim sompin fa nyam.” Dey tell Jedus say, “Dat gwine tek all de money one man kin mek een eight mont time, ainty? Ya wahn we fa buy nuff bread fa feed dat crowd?”

³⁸Jedus aks um say, “Hommuch loaf ob bread oona hab? Go look.” Wen dey find out, dey tell Jedus say, “We hab fibe loaf ob bread, an two fish too.”

³⁹Jedus tell e ciple dem, “Chaage all de people fa seddown by group pon de green grass.

⁴⁰Some group ob bout a hundud head an oda group ob fifty head.”

⁴¹Jedus tek de fibe loaf ob bread an de two fish. E look op ta heaben an tell God say, “Tankya fa de ration.” Den e broke op de bread loaf eenta heapa piece an gim ta e ciple dem fa saab de crowd ob people. E broke op de fish too an gim ta all dem.

⁴²All de crowd nyam til dey been sattify.

⁴³Wen de ciple dem done geda op wa been lef oba, dey hab tweb basket full ob bread an fish.

⁴⁴Dey been a whole heapa people wa done nyam de bread an de fish. Jes de man dem been fibe tousan. Jedus Waak Pontop Wata

⁴⁵Jes atta dat, Jedus chaage ciple dem fa git eenta de boat an cross oba de lake, go head ob um ta Bethsaida town. Wiles de ciple dem beena gwine, Jedus tell de crowd fa go back home.

⁴⁶Atta e done lef de people, Jedus gone op one hill fa pray ta God.

⁴⁷Wen night time come, de ciple dem been een de boat out een de middle ob de lake. Same time, Jedus been by esef pon de lan.

⁴⁸De ciple dem beena row ginst de wind. An Jedus see dat dey beena hab haad time fa mek de boat go long cross de wata ginst de wind. So late een de night, sometime atta shree o’clock, Jedus gone out ta dem. E beena waak pontop de wata, an e mek like e plan fa pass de ciple dem by.

⁴⁹Wen dey shim da waak pontop de wata, dey tink one haant da come by. So dey holla loud,

⁵⁰cause dey all been too scaid wen dey shim. Jedus speak op fast. E tell um say, “Mus dohn be scaid! Dis me! Study yasef.”

⁵¹Den Jedus git eenta de boat wid um, an de wind stop. De ciple dem been too stonish.

⁵²Cause dey still ain been ondastan fa true bout Jedus powa, eben wen dey shim tek de bread an feed a big crowd ob people. De ciple dem haat been haad like rock. Jedus Mek de Sick People Well een Gennesaret

⁵³Jedus an e ciple dem done cross oba de wata ta Gennesaret town, weh dey tie op de boat.

⁵⁴Wen dey git outta de boat, de people know Jedus soon as dey shim.

⁵⁵So dem people gone quick all oba de countryside. Wehsoneba dey yeh say dat Jedus dey, de people come ta um, da tote sick people pon dey bed.

⁵⁶Een ebry town an willage an settlement weh Jedus gone, de people come da tote dey sick ta um. Dey bring um ta dey maakut place, an dey beg Jedus fa jes leh dey sick tetch de hem ob e cloes. An all dem wa tetch e cloes, same time dey ain been sick no mo.