Read Gullah Luke 1 Bible Online

Luke 1 - Gullah bible

Luke 1

¹Deah Theophilus, plenty people beena try fa write down all de ting dem wa we bleebe fa true, wa done happen mongst we.

²An all wa dey done write down, dis de same ting wa de people dem dat been wid Jedus wen e fus staat, dey done tell we. An dey beena preach God wod.

³So, Honorable Theophilus, A figga since A done beena study bout dem ting good fashion fom de time dey fus staat, A oughta write um down fa ya step by step fom staat ta finish.

⁴A da write fa mek ya know all de trute consaanin dem ting wa dey done laan ya, fa leh ya know dat all dis wa dey laan ya bout done happen fa true. De Angel Tell Zechariah E Gwine Hab Son

⁵Same time wen Herod been king ob Judea, one Jew priest name Zechariah been dey. E been one ob de priest dem ob Abijah group. An e wife name been Lizzybet. Lizzybet blongst ta de fambly ob de head Priest Aaron too.

⁶Zechariah an Lizzybet beena waak scraight wid God. Dey beena keep all de Law ob de Lawd an do ebryting e tell um fa do.

⁷Bot dey ain hab no chullun cause Lizzybet ain been able. An now dey bof been ole.

⁸One time wen Abijah group beena wok een God House, Zechariah beena do e wok dey, da cyaa out de priest judy.

⁹Now den, wen de priest dem wahn fa pick one ob um fa go eenside God House fa bun incense, dey write all de priest dem name down, fole de paper an pick one. Dis time yah Zechariah name come out fa bun de incense. So e gone eenside de Lawd house fa do e wok.

¹⁰Same time de incense beena bun eenside God House, de whole crowd wa been dey beena pray outside een de yaad.

¹¹Den een God House, Zechariah see a angel dat de Lawd sen. Dat angel stan fo um pon de right han side ob de alta, weh Zechariah da bun de incense.

¹²Wen Zechariah see de angel, e been opsot. E mos scaid ta det.

¹³De angel tell um say, “Mus dohn feah, Zechariah! De Lawd done yeh ya pray, an e ansa um. Ya wife Lizzybet gwine hab son. Mus name um John.

¹⁴Ya gwine be glad fa true wen e bon, an a heapa oda people gwine be glad cause e bon!

¹⁵Dat chile gwine be a great man een de Lawd eye. E mus dohn neba drink no wine or nottin wa mek a poson dronk. An e gwine be full op wid de Holy Sperit eben fo e bon.

¹⁶E gwine mek a heapa Israel people come ta de Lawd dey God.

¹⁷E gwine go head ob de Lawd an hab scrong sperit an powa, jes like de prophet Elijah, wa done tell God wod. E gwine mek de fada dem haat ton ta dey chullun. An e gwine mek de people dat ain do wa God wahn, memba God an ondastan wa right fa do. E gwine mek de Lawd people ready fa de time wen de Lawd gwine come.”

¹⁸Zechariah aks de angel say, “How A spose fa know wa ya say gwine happen? A done ole, an me wife, e ole too.”

¹⁹De angel ansa um, “A Gabriel. A da stanop fo God, da saab um. E sen me fa come tell ya dis good nyews.

²⁰Bot listen yah! Dis ting wa A done tell ya, dat how e gwine be wen de right time come. Bot cause ya ain bleebe me, ya ain gwine be able fa taak. Ya ain gwine crack ya teet til all wa A tell ya done happen.”

²¹All dat time dey, de people outside beena wait fa Zechariah. Dey wonda hoccome e stay so long eenside God House.

²²Wen e come out, e ain been able fa taak ta de people, so dey figga fa true e been hab wision eenside God House. E jes beena mek sign wid e han, an e ain able fa say nottin.

²³Wen e time been op fa wok een God House, Zechariah gone home.

²⁴Atta wile, e wife Lizzybet been speckin. An Lizzybet hide eenside e house fibe mont.

²⁵E say, “De Lawd been good ta me fa true an bless me fa be wid chile. Now e done tek way me shame so dat people ain gwine look down pon me no mo!” De Angel Tell Mary E Gwine Hab Son

²⁶Wen Lizzybet been speckin, een e six mont God sen e angel Gabriel ta Nazareth, a town een Galilee.

²⁷God sen um ta one nyoung ooman name Mary. E ain know nottin bout no man yet, bot e been gage fa marry a man name Joseph, wa been one ob King David kin people.

²⁸Dat angel come ta Mary say, “How ya da do, Mary. De Lawd done bless ya fa true! E da trabel longside ya!”

²⁹Wen Mary yeh wa de angel say, e beena trouble tommuch, an e study e head fa try fa figga wa dat mean.

³⁰De angel tell um say, “Mus dohn be scaid, Mary, cause God heppy wid ya.

³¹Ya gwine be wid chile. Ya gwine hab son. Mus gim name Jedus.

³²E gwine be great. Dey gwine call um de Son ob de Mos High God. An de Lawd God gwine mek um king fa rule jes like e ole people leada King David.

³³Jedus gwine hab tority faeba oba de fambly ob Jacob. E gwine rule oba um faeba an eba!”

³⁴Mary aks de angel say, “A ain neba been wid no man. So hoccome a gwine hab chile?”

³⁵De angel ansa um, “De Holy Sperit gwine come ta ya. De High God dat great mo den all, e gwine sen e powa pon ya fa do dis. Cause ob dat, people gwine call dis chile fom God wa ya gwine hab, de God Chile, God own Son.

³⁶Fodamo, Lizzybet, wa kin ta ya, e wid chile. Eben dough e way too ole fa hab chullun, e een e six mont. Now ebrybody tink say, Lizzybet ain able fa hab chile. Stillyet, e gwine hab son.

³⁷Cause dey ain nottin dat God ain able fa do.”

³⁸Mary tell um say, “A ready fa saab de Lawd. A ready fa saab um jes like ya done say.” Den de angel gone lef um. Mary Go fa See Lizzybet

³⁹Soon atta dat, Mary git ready. E mek hace an gone ta a town een Judea een de hill country.

⁴⁰E gone ta Zechariah house, an e hail Lizzybet.

⁴¹Wen Lizzybet yeh Mary boice, e baby eenside um jomp roun. An Lizzybet been full op wid de Holy Sperit.

⁴²E raise e boice loud, tell Mary say, “God da bless ya mo den all oda ooman, an same time e bless de chile wa ya da cyaa!

⁴³A ain feel wody fa hab dis great ting happen ta me, dat de modda ob me Lawd come wisit me.

⁴⁴Cause same time A yeh ya boice, dis chile wa A da cyaa, e jomp roun fa joy.

⁴⁵Ya bless fa true, Mary, cause ya bleebe de Lawd gwine do all dat e done tell ya!” Mary Praise de Lawd

⁴⁶Mary say,“Een me haat A da praise de Lawd.

⁴⁷God wa sabe me done mek me haat glad fa true.

⁴⁸E done memba me, e humble saabant!Fom now on, all people gwine say A been bless fa true.

⁴⁹Cause God wa got powa oba all ting, e done do great ting fa me. E name holy fa sho.

⁵⁰E da show mussy ta all dem wa feah um, fom one generation ta de nex.

⁵¹E done show de great scrent een e aam. E done scatta dem wa proud an mek um ron way.

⁵²E done pull down de mighty king dem fom off dey shrone, an gii tority ta de humble.

⁵³E done gii plenty good ting ta dem wa hongry. Bot e done sen way de rich. E ain gim nottin.

⁵⁴E done hep de Israel people, wa da saab um. E ain fagit e promise.

⁵⁵E keep e wod wa e gii ta we ole people. E show mussy ta Abraham an all e chullun faeba!”

⁵⁶Mary stay dey wid Lizzybet bout shree mont. Den e gone home. Lizzybet Hab Son John

⁵⁷De time come fa Lizzybet fa go een, an e hab son.

⁵⁸E neighba dem an e kin yeh say de Lawd done hab mussy pon Lizzybet. E gim chile. An all dem rejaice wid um.

⁵⁹Eight day atta de chile been bon, dey come togeda fa circumcise de chile. Dey been gwine gim name Zechariah, like e fada.

⁶⁰Cep e modda Lizzybet tell um say, “No! E name spose fa be John.”

⁶¹Wen Lizzybet say dat, de people tell um say, “Bot ya ain got no kin people name John!”

⁶²So dey mek sign ta e fada Zechariah fa aks um wa e wahn de chile name fa be.

⁶³Zechariah mek sign ta dem, aks fa sompin fa write pon. Den e write down say, “E name John.” All de people been stonish.

⁶⁴Same time Zechariah boice come back, an e staat fa taak. E da praise God.

⁶⁵All de neighba wa yeh Zechariah been scruck. Dey taak bout dis ting, an de nyews git roun all oba Judea een de hill country.

⁶⁶An all dem wa yeh dis ting, study bout um say, “Wa dis chile yah gwine be?” Cause fa true de Lawd powa been dey pon um. Zechariah Praise de Lawd

⁶⁷Zechariah, John fada, been full op wid de Holy Sperit, an e tell God wod. E say,

⁶⁸“Leh we praise de Lawd, de God ob de Israel people! Cause e done come fa hep e people. E done set um free.

⁶⁹E done sen we scrong poson wa gwine sabe we. An dis Poson blongst ta de fambly ob David, de ole people leada wa saab God.

⁷⁰God own prophet dem, dey promise fom way back.

⁷¹Dey say, ‘Dis poson gwine sabe we fom we enemy. E gwine sabe we fom de powa ob all dem people wa hate we.’

⁷²God hab mussy pon we, jes like e been tell we ole people. E stillyet memba de greement wa e esef done mek wid um.

⁷³E promise we ole people leada Abraham an mek a wow.

⁷⁴E say e gwine sabe we fom we enemy dem so we ain gwine be scaid fa saab um.

⁷⁵We gwine be God own people, da waak scraight fo um all de time we lib.

⁷⁶Me chile, dey gwine call ya de prophet wa taak fa de Mos High God. Cause ya gwine git de people dem ready fa de time wen de Lawd gwine come.

⁷⁷Ya gwine tell e people say God gwine paadon dey sin, an dat how e gwine sabe um.

⁷⁸Cause we God feel wa we feel, an e mussyful an do we good.E gwine mek de light ob sabation fa shine pon we like de sun ob day clean broad.

⁷⁹Dat light gwine shine pon all de people wa lib een de daak shada ob det. E gwine hep we waak a peaceable way.”

⁸⁰An wiles de chile John da grow big, e da come close ta God mo an mo. E beena lib een de wildaness til de time come fa wok mongst de Israel people.