Read Gullah Luke 2 Bible Online

Luke 2 - Gullah bible

Luke 2

¹Een dat time, Caesar Augustus been de rula ob de Roman people. E mek a law een all de town een de wol weh e hab tority, say, “Ebrybody haffa go ta town fa count by de head an write down e name.”

²Dis been de fus time dey count by de head, jurin de time Quirinius de gobna ob Syria country.

³So den, ebrybody gone fa count by de head, ta e own town weh e ole people been bon.

⁴Now Joseph same fashion gone fom Nazareth town een Galilee. E trabel ta de town name Betlem een Judea, weh de ole people leada, King David, been bon. Joseph gone dey cause e blongst ta David fambly.

⁵E gone fa count by de head, an Mary gone long wid um. E gage fa marry um. An Mary been speckin.

⁶Same time wen dey been dey, time come fa Mary gone een.

⁷E hab boy chile, e fusbon. E wrop um op een closs wa been teah eenta scrip an lay um een a trough weh dey feed de cow an oda animal dem. Cause Mary an Joseph beena stay weh de animal sleep. Dey ain been no room fa dem eenside de bodin house. De Shephud Dem Go fa See de Chile Jedus

⁸Now some shephud been dey een de fiel dat night. Dey beena stay dey, da mind dey sheep.

⁹Den one angel ob de Lawd appeah ta um. De night time done lightnin op jes like day clean broad. Cause ob dat, de shephud mos scaid ta det.

¹⁰Bot de angel tell um say, “Mus dohn feah! A hab good nyews wa gwine mek ebrybody rejaice.

¹¹Cause A come fa tell oona, ‘Right now, dis day, a Sabior done bon fa oona. E Christ de Lawd. An e bon een David town!’

¹²A gwine tell oona wa oona gwine see dey. Cause ob dat, oona gwine know A done tell oona de trute. Oona gwine find de chile wrop op een closs wa been teah eenta scrip, an e been leddown een a trough.”

¹³All ob a sudden, a heapa oda angel fom heaben been longside dat angel. Dey all da praise God, say,

¹⁴“Leh we gii glory ta God een de mos high heaben.Leh dey be peace ta dem een de wol wa hab God fabor!”

¹⁵Den de angel lef um an gone back ta heaben. An de shephud dem say ta one noda, “Leh we go ta Betlem fa see dis ting wa happen oba dey. De Lawd esef done sen e angel fa tell we.”

¹⁶So de shephud dem mek hace an gone ta Betlem fa look. Wen dey git dey, dey find Mary an Joseph an de chile. An dat chile been leddown een a trough.

¹⁷Atta de shephud shim, dey done tell ebrybody bout de chile. Dey tell um all wa de angel done say consaanin um.

¹⁸An all de people wa de shephud dem tell been stonish.

¹⁹Mary memba all dis ting an study bout um.

²⁰De shephud dem gone back ta dey fiel. Dey da praise God. Dey da rejaice tommuch fa all dey done see an yeh. All wa de angel done tell um, e stan jes like e say. Dey Name de Chile Jedus

²¹Eight day atta de chile bon, e been time fa circumcise um. Dey name um Jedus, jes like de angel done been gim fo e modda Mary been speckin. Dey Offa Jedus Op ta de Lawd

²²De time come fa Joseph an Mary fa go ta God House fa do dem ting wa gwine mek um clean een God eye, like de Law wa God gii Moses say dey mus do. Den dey cyaa de chile ta Jerusalem ta God House fa offa um ta de Lawd.

²³Cause de Law ob de Lawd say, “Ebry fusbon son gwine blongst ta de Lawd fa do God wok.”

²⁴An Joseph an Mary gone too fa gii God two tottledob or two nyoung pigeon. Dey gim ta de Jew priest fa mek sacrifice ta God cause de Law ob de Lawd say fa do dat.

²⁵Dat time dey, one man name Simeon lib een Jerusalem. Dis man beena waak scraight fa do all wa God wahn, an e lob God. E beena wait fa de time wen God gwine sabe de Israel people. An de Holy Sperit beena lib een um.

²⁶Dat Holy Sperit done tell um say, “Fa sho, ya gwine see de Messiah. God gwine sen um fo ya pass oba.”

²⁷An God Sperit tell Simeon fa go eenta God House. Wiles e been dey, Joseph an Mary cyaa een de chile Jedus fa offa um op ta de Lawd an do dem ting wa God Law say.

²⁸Simeon tek de chile een e aam, an e praise God say,

²⁹“Lawd, A ya saabant. Ya done do wa ya promise me. So now leh me pass oba een peace.

³⁰Cause wid me own eye A done see de one wa gwine sabe all people een de wol.

³¹Ya done mek um ready een de open weh all people kin shim.

³²E de light wa gwine mek dem dat ain Jew know ya trute, an bring glory ta ya Israel people.”

³³Ebryting dat Simeon say bout de chile Jedus stonish e fada an modda.

³⁴Simeon aks God fa bless um, an e tell Mary, e modda, say, “Fa true, God done pick dis chile fa come. Wen dey shim, plenty Israel people gwine be stroy cause dey ain bleebe um. An plenty oda Israel people gwine bleebe um, an God gwine sabe dem. God sen Jedus fa sho we wa God wahn we fa do. Bot a heapa people gwine taak ginst um.

³⁵Dat how dey gwine show ebrybody wa dey beena tink, wa nobody ain been know. An wen all dis happen, Mary, ya own haat gwine hut tommuch, gwine hut like a sode been jook een um.”

³⁶One prophet ooman been dey. E name Anna, an e fada been Phanuel wa blongst ta Asher kin people. Now Anna been a ole ooman. E husban done been dead long time. Fom de time wen Anna marry, e been jes seben yeah fo e husban pass oba.

³⁷An now Anna been a wida ooman eighty-fo yeah ole. All de time e beena come ta God House. Day an night e been dey dey, da woshup God an fast an pray.

³⁸Now den, Anna come ta God House de same time Joseph an Mary come da bring Jedus een dey. An Anna tank God fa de chile Jedus. E taak bout um ta all dem wa beena wait fa see God set de people een Jerusalem free. Joseph an Mary Go Back ta Nazareth

³⁹Wen Joseph an Mary done do all de ting wa de Law ob de Lawd say, dey gone back ta dey own town, Nazareth, een Galilee.

⁴⁰An de chile Jedus da grow big an scrong. An e been git plenty sense. An God been heppy wid um. De Boy Jedus een God House

⁴¹Ebry yeah Joseph an Mary, Jedus fada an modda, gone ta Jerusalem fa de Jew holiday feas dey call de Passoba.

⁴²Wen Jedus been een e tweb yeah, e gone long wid um ta de Passoba feas, like all de Israel people beena do.

⁴³Atta de feas done oba, dey staat fa home, cep de boy Jedus ain gone long wid um. E stay dey een Jerusalem. An Mary an Joseph ain know.

⁴⁴Dey beena tink Jedus gone long een de crowd. Dey done trabel all day, an den dey find out dat e ain been dey. Dey saach fa um mongst dey fambly an dey fren.

⁴⁵Bot dey ain find um. So dey gone back ta Jerusalem fa saach fa um.

⁴⁶Atta shree day done gone, dey find Jedus een God House, da seddown mongst de Jew teacha dem. An e beena listen ta wa dem teacha say, an e beena aks um plenty ting too.

⁴⁷All de people wa yeh Jedus been stonish cause de chile hab sommuch sense an mek ansa ta de queshon.

⁴⁸Wen e modda an e fada shim, dey been stonish down. An e modda aks um say, “Me son, wa mek ya do we like dis? Ya fada an me beena saach ebryweh fa ya. An wen we ain see ya, we beena fret tommuch.”

⁴⁹Jedus ansa um say, “Hoccome oona beena saach fa me? Ain oona know dat A been spose fa be yah een me Fada house fa tek cyah ob e bidness?”

⁵⁰Bot dey ain hab de ondastandin fa know wa e da taak bout.

⁵¹Den Jedus gone back wid um ta Nazareth, an e pay um mind. E modda memba all dem ting een e haat, an e study bout um.

⁵²Jedus beena grow een e mind an een e body. An God an de people been heppy wid um.