Read Gullah Luke 20 Bible Online

Luke 20 - Gullah bible

Luke 20

¹One day wiles Jedus beena laan de people an da preach de Good Nyews, de leada dem ob de Jew priest dem, de Jew Law teacha dem an de oda Jew leada dem come ta Jedus.

²Dey aks um say, “Tell we, wa gii ya de right fa do dem ting yah? Who dat gii ya de tority?”

³Jedus ansa um say, “Leh me aks oona one queshon too. Oona tell me,

⁴wen John wa Bactize people been come yah, who dat gim de right fa bactize. Tell me, God gim de tority, or de people gim de tority?”

⁵Dey staat fa aagy mongst deysef say, “Wa we gwine ansa um? Ef we say ‘God gii John de tority fa bactize people,’ e gwine say, ‘Well den, hoccome oona ain bleebe um?’

⁶Bot ef we say ‘People gii John dat tority,’ all dem people yah gwine chunk stone pon we, cause dey bleebe fa true dat John been a prophet.”

⁷So dey ansa Jedus, say dey ain know who dat gii John de tority fa bactize people.

⁸Jedus tell um say, “Well den, A ain needa gwine tell oona who dat gii me de tority fa do dem ting yah.” De Paable Bout de Wickity Wokman dem

⁹Jedus tell de people one paable say, “One time one man plant some grapewine pon e faam. E hire some wokman fa tek cyah ob de faam an den e gone way ta noda country, an e stay dey a long time.

¹⁰Wen de time come fa de grape haabis, de owna sen a saabant ta e faam fa fetch e share ob de haabis. Bot de wokman dem wa cyah fa e faam beat dat man wa de owna sen. Dey sen um back dout nottin.

¹¹De owna sen noda saabant fa fetch e share. Dey beat dat man too an shame um. Den dey sen um back wid nottin.

¹²De owna sen still noda man. Dem wa cyah fa de faam beat dat one til dey hut um fa true, an dey chunk um off de faam.

¹³De faam owna say, ‘Wa A gwine do now? A gwine sen me own deah son wa A lob. Dey gwine show hona ta me son.’

¹⁴Bot wen dem wa cyah fa de faam see de owna son come, dey all taak togeda say, ‘Dis de owna son. Dis propaty yah gwine be lef ta um. Leh we kill um so dat de propaty gwine come ta we.’

¹⁵Den dey chunk de owna son off de faam, an dey kill um. “Now den,” Jedus aks de people say, “Wa dat faam owna gwine do ta dem wokman?

¹⁶E gwine come an kill dem, an e gwine gii e faam ta oda wokman dem.” Wen de people yeh wa Jedus say, dey say, “Fa sho, dat mus dohn happen!”

¹⁷Jedus look scraight at um an aks um say, “Well den, oona tell me wa dey mean wen dey write een God Book say,‘De same stone dat de builda dem chunk out, dat de stone wa come fa be portant mo den all de oda res.’

¹⁸“De poson wa faddown pon dis stone yah gwine broke op all e bone dem. An wen dis stone faddown pon a poson, e gwine mash um all op.” De Queshon Bout Tax

¹⁹Now, dem Law teacha an dem priest leada ondastan dat Jedus been tell dat paable ginst dem. So dat same time, dey try fa ketch Jedus an hole um. Bot dey ain ketch um cause dey been scaid ob de people dey.

²⁰So dey beena watch Jedus fa try fa ketch um. Dey pay some man dem, sen um ta Jedus. De tell dem man fa mek like dey mean wa dey say fa true, an chaage um fa aks Jedus schemy queshon. Dey plan fa tek de wod wa Jedus ansa fa ketch um, say e taak bad ting. Den dey kin go cuse Jedus an tek um ta de Roman gobna, wa hab tority an powa fa jedge um.

²¹De man dem wa dey beena pay fa ketch Jedus come ta um fa aks um schemy queshon. Dey tell Jedus say, “Teacha, we know wa ya da say an laan we, e right fa true. We know ya da look pon all people de same. Fa true ya da teach God way.”

²²Den dey aks um say, “E right fa we fa pay tax ta de Roman rula Caesar? Wa de Jew Law say bout dat?”

²³Bot Jedus obareach um. E been know dey beena try fa ketch um een e wod. So e chaage um say,

²⁴“Show me a coin.” Wen dey show um dat money, e aks um say, “Who dat hab e face an e name pon dis coin yah?” Dey ansa Jedus say, “Dat Caesar face an name dey.”

²⁵Jedus say, “Well den, mus gii Caesar dat wa blongst ta Caesar an gii God wa blongst ta God.”

²⁶So den wid all de people dey, dem man ain been able fa ketch Jedus een none ob de wod wa e say. Wen Jedus ansa um so, dey been stonish down an dey hush op dey mout. Dem wa Lib Gin Cyahn Dead No Mo

²⁷Some Sadducee come ta Jedus. De Sadducee dem bleebe dat dead people ain gwine git op fom mongst de dead an lib gin.

²⁸Dey aks Jedus say, “Teacha, Moses write law fa we say, ‘Ef a man dead an lef e wife an ain hab no chullun, de man broda mus marry de wida ooman fa hab chullun een de name ob de man wa done pass oba.’

²⁹One time dey been seben broda. De fus one marry an e pass oba. E ain lef no chullun.

³⁰De nex broda marry e broda wida ooman. An dat broda pass oba an ain lef no chullun fa e dead broda.

³¹Den de nex broda marry de wida ooman an e pass oba. De same ting happen ta all de seben broda dem. Dey all marry dat ooman, one atta de oda, an dey all pass oba an ain hab no chullun.

³²Las ob all, de wida ooman esef pass oba.

³³All seben broda done marry dat ooman. So den, tell we, wen de time come wen de dead people gwine git op fom mongst de dead an lib gin, who dat gwine hab dat ooman fa e wife?”

³⁴Jedus ansa de Sadducee dem say, “Yah een dis wol de people da git marry op.

³⁵Bot atta dey pass oba, de people dem wa God see fit fa mek um git op fom mongst de dead an lib gin, dey ain fa be marry.

³⁶Dey gwine be like de angel dem, an dey cyahn dead no mo. Dey God chullun, cause dey done been dead bot now dey done git op fom mongst de dead an lib gin.

³⁷Moses eben show dat dem wa done dead git op fom de grabe an lib gin. E show dat dey een God Book, weh e write down bout de bush dat beena bun. Dey dey e call de Lawd ‘de God ob Abraham, de God ob Isaac, an de God ob Jacob.’

³⁸E de God ob dem wa da lib. E ain no God ob dead people. Cause ta God all people da lib.”

³⁹Some de Law teacha dem tell Jedus say, “Teacha, dat a good ansa!”

⁴⁰Atta dat, de people been scaid fa aks Jedus oda queshon. Who de Messiah Da?

⁴¹Jedus aks um say, “Hoccome people say dat de Messiah gwine be de chile ob David chullun chullun?

⁴²Cause David done write down een de book ob Psalms say,‘De Lawd tell me Lawd say, seddown yah ta me right han side

⁴³til A pit ya enemy dem ondaneet ya foot.’

⁴⁴David call de Messiah ‘Lawd.’ So den how de Messiah kin be David son?” Jedus Waan Ginst de Law Teacha Dem

⁴⁵Wiles all de people beena listen, Jedus taak ta e ciple dem.

⁴⁶E say, “Oona mus be on de watch fa de Law teacha dem. Dey like fa waak roun een dey long robe fa mek people say dey a big leada. An dey lob fa go ta de maakut place weh plenty people geda, so dat de people kin gim hona. Wen dey go ta de Jew meetin house, dey lob fa seddown een de bes seat. An wen dey go ta de feas, dey lob fa seddown een de place weh de big leada dem seddown.

⁴⁷Dem Law teacha yah tek oba wida ooman propaty an tief all dey got. An den dey stanop da pray long time so dat people kin say dey good people fa true! God gwine punish dem mo den e gwine punish oda people.”