Read Gullah Luke 24 Bible Online

Luke 24 - Gullah bible

Luke 24

¹Aaly een de maanin de fus day ob de week, fo day clean, de ooman dem tek de spice wa dey done been mix op an gone ta Jedus tomb.

²Wen dey git ta de tomb, dey see dat de stone wa beena kiba de door ta de tomb done been roll back.

³So dey gone eenside, bot dey ain find de Lawd Jedus body.

⁴Dey beena wonda bout wa done happen, wen all ob a sudden dey see two man da stanop dey wa hab on bright cloes wa da shine.

⁵De ooman dem been too scaid, an dey bow dey head down ta de groun. Bot de man dem tell um say, “Oona ain oughta look yah mongst de dead people fa a man wa da lib, ainty?

⁶Jedus ain yah. E done git op fom mongst de dead, an e da lib gin! Oona memba wa e been tell oona wen e been dey wid oona een Galilee.

⁷E say, ‘Dey gwine grab hole ta de Man wa Come fom God an han um oba ta wickity people wa gwine kill um pon a cross. Atta shree day e gwine git op fom mongst de dead an lib gin.’ ”

⁸Den de ooman dem memba all dat wa Jedus been tell um.

⁹Dey lef de tomb an gone back ta town an tell de leben postle dem an all de oda people wa beena waak wid Jedus, bout all wa done happen.

¹⁰Dem ooman been Mary Magdalene, Joanna, an Mary, James modda. Dem an de oda ooman dem wa been dey wid um tell de postle dem wa done happen.

¹¹Bot de postle dem ain bleebe dem ooman, cause wa dey say ain mek no sense ta um.

¹²Bot Peter git op an ron ta de tomb. Wen e git dey, e bend down an e look eenside. E jes see de linen grabe cloes wa dey been nyuse fa wrop op Jedus body dey, nottin mo. Den Peter gone back home, da wonda wa been happen. Jedus Waak ta Emmaus wid Two ob Dem wa Beena Folla Um

¹³Dat same day, two man wa beena folla Jedus, dey beena gwine ta a settlement name Emmaus. Fom Jerusalem ta dat settlement been bout seben mile.

¹⁴De two man beena taak bout all dem ting wa jes happen een Jerusalem.

¹⁵Wiles dey beena taak, Jedus esef come nigh ta um an waak longside um.

¹⁶Dey shim, bot dey ain recognize who e been.

¹⁷Jedus aks dem say, “Wa oona da taak bout togeda wiles oona da waak long?” De two man stop an stan still, an dey look too sad.

¹⁸One dem wa name Cleopas ansa Jedus say, “Ya mus be de onliest man wa da lib een Jerusalem an ain know wa been happen dey een dem day wa jes gone, ainty?”

¹⁹Jedus aks dem say, “Wa ting?” Dey say, “Dem ting wa happen ta Jedus fom Nazareth. E been a great prophet. E hab powa fa do miracle an fa taak great ting. E hab fabor wid God an wid all de people too.

²⁰De leada dem ob de Jew priest dem an we rula dem done tek Jedus an han um oba ta de Roman Gobna Pilate fa condemn um fa dead. An de sodja dem nail um ta de cross an kill um.

²¹We been tink dat Jedus been gwine free de Israel people! Pontop ob dat, taday mek shree day since all dat happen.

²²An pontop ob all dat, some we ooman dem stonish we tommuch. Dey gone ta de tomb aaly dis maanin,

²³bot dey ain find Jedus body dey een de tomb. Wen dey come back, de ooman dem tell we dat dey been see a wision ob angel fom God dey. De angel dem tell um dat Jedus da lib.

²⁴Den some we people dat been wid we gone ta de tomb, an dey find um jes like de ooman dem beena tell we. Bot dey ain see Jedus.”

²⁵Jedus tell um say, “Oona ain got no sense. Een oona haat oona ain wahn fa bleebe all dat de prophet dem done say!

²⁶De Messiah haffa suffa dem ting an den go ta heaben an hab e paat een God glory, ainty?”

²⁷An Jedus splain ta de two man dem. E staat wid Moses an all de prophet dem, da laan um wa dey been write bout um. Jedus laan um fom all God Book bout esef.

²⁸Wen de two man done git close ta de settlement weh dey beena gwine, Jedus mek like e been gwine on.

²⁹So de man dem beg um fa stay wid um. Dey tell um say, “Stay yah wid we, cause de day mos gone an de night da come soon.” So Jedus gone fa stay wid um.

³⁰Wen e git ta de table fa nyam wid um, Jedus tek de loaf ob bread an tank God fa um. Den e broke op de bread an gim dey piece.

³¹Same time Jedus do dat, e been like de man dem eye been open op, an dey recognize dat Jedus esef dey wid um. Bot den Jedus jes disappeah an dey ain shim.

³²De two man dem say ta one noda, “Wiles e beena taak ta we, wen we beena waak long de road, dat been like a fire wa da bun een we haat, ainty? We been too glad wen e beena splain God Book ta we.”

³³Same time, dey git op an gone back ta Jerusalem. Dey find de leben ciple dem an some de oda people geda togeda.

³⁴Dem people tell de two man dem say, “De Lawd done git op fom mongst de dead an e da lib gin fa true! E done appeah ta Simon!”

³⁵Den de two man dem tell de people wa happen ta dem wiles dey beena waak long de road ta Emmaus. Dey tell um how dey been recognize dat e been de Lawd Jedus dey wid um wen e broke op de bread fa um. Jedus Appeah ta E Ciple Dem

³⁶Dat same time dey, wen dey beena taak bout dat, Jedus esef stanop mongst um dey. E tell um say, “Hab peace een oona haat!”

³⁷Dey been scaid mos ta det. Dey tink dey beena see a haant.

³⁸Jedus tell um say, “Oona ain oughta be scaid. Oona ain oughta wonda wa oona da see.

³⁹Look pon me han an me foot. See, A mesef fa true! Oona mus tetch me an look pon me good fashion. Den oona gwine know dat A ain no haant. A haant ain hab no body needa no bone like oona see dat A hab.”

⁴⁰Wen Jedus done say dat, e show um e han an e foot.

⁴¹Dey beena wonda an dey still ain know wa fa tink, cause wa dey see mek um so full op wid joy. Jedus aks um say, “Oona hab sompin fa nyam yah?”

⁴²Dey gim some roas fish an some honeycomb.

⁴³E tek de fish an honey an nyam um dey fo dey eye.

⁴⁴Jedus tell um say, “Wen A been dey wid oona, A done tell oona bout dis. A tell oona dat all ting wa Moses been write down een de Law bout me, an wa dem prophet write down, an all dey write down een de Psalms bout me, dey all haffa happen fa true.”

⁴⁵Jedus mek um able fa ondastan wa been write dey een God Book.

⁴⁶E tell um say, “Een God Book dey write dis down: Dey tell we dat de Messiah haffa suffa an dead. An atta shree day, e gwine git op fom mongst de dead an lib gin.

⁴⁷God Book tell we too dat een Christ name, e ciple dem mus tell all people say, ‘Mus change oona way an do wa God wahn oona fa do. Den God gwine paadon oona.’ Oona mus tell um dat een Jerusalem an den all oba de wol.

⁴⁸Oona done see all dem ting yah, an oona mus tell people bout dem.

⁴⁹An A gwine sen oona wa me Fada done promise. Bot fo oona go, oona mus wait een de city til oona git dat Holy Sperit powa wa gwine come outta heaben an come down pon oona.” Jedus Go Op eenta Heaben

⁵⁰An Jedus waak wid um outta Jerusalem ta Bethany. Wen dey git dey, e raise e han op an e bless um.

⁵¹Wiles e beena bless um, Jedus lef um. God tek um op eenta heaben.

⁵²De people wa bleebe een Jedus woshup um op, an den dey gone back ta Jerusalem. Dey been full op wid joy.

⁵³An dey been een God House all de time, da praise God.