Read Gullah John 10 Bible Online

John 10 - Gullah bible

John 10

¹Jedus say, “A da tell oona fa true, de poson wa ain go shru de gyateway fa go eenside de sheep pen, bot e climb een some oda side eenta weh de sheep dey, e a tief an a robba.

²De poson wa go shru de gyateway fa go eenside, dat de shephud, de one wa da mind de sheep fa true.

³De gyateman kin open op de gyate fa de shephud, an de sheep pay mind ta de shephud boice. De shephud call e own sheep name, an dey come ta um. E da waak head ob um, da lead um shru de gyateway outta de sheep pen.

⁴An wen de shephud done lead all ob e own sheep out shru de gyateway, e da waak head ob um. An dey da folla um, cause dey know e boice.

⁵De sheep ain neba gwine folla noda poson wa dey ain know. Fa true, dey gwine ron way fom noda poson, cause dey ain know dat poson boice.”

⁶Jedus tell dis paable ta de people, bot dey ain ondastan wa e mean fa say. Jedus de Good Shephud

⁷So Jedus tell um gin say, “A da tell oona fa true, A de gyate fa de sheep fa go shru.

⁸All dem people wa come fo me, dey tief an robba, an de sheep ain pay um no mind.

⁹A de gyate. Ebrybody wa go shru me fa go eenside, dey gwine be sabe. Dey gwine be free fa go een an come out fa go find green grass fa nyam.

¹⁰De tief jes come fa tief, fa kill an stroy. Bot A come so dat dey kin hab true life, so dat dey kin lib a life ob joy wa heap op an ron oba.

¹¹A de good shephud. De good shephud ready fa gii e life fa de sheep.

¹²De poson wa git pay fa mind oda people sheep, e ain no true shephud, an de sheep ain blongst ta um. So den, de poson wa de sheep ain blongst ta, wen e see de wolf da come, e gwine ron way an lef de sheep. Den de wolf gwine come een pon dem sheep an grab hole ta one. An de res ob de sheep gwine ron all oba de place.

¹³De poson wa de sheep ain blongst ta, e gwine ron way cause e dey fa git pay fa e wok. So e ain cyah fa true bout no sheep.

¹⁴A de good shephud. Jes like de Fada know me an A know de Fada, same way so A know me own sheep an me own sheep know me. An A ready fa gii me life fa de sheep.

¹⁶A hab oda sheep wa blongst ta me, bot dey ain een dis flock yah. A haffa bring dem too. An wen A taak ta um, dey gwine pay mind ta me too. So den, all de sheep gwine come togeda an dey gwine be one flock an hab one shephud fa mind um.

¹⁷Me Fada lob me cause A ready fa gii me life, so dat wen A shru wid dat, A gwine tek me life back op gin.

¹⁸Nobody ain gwine kill me ef A ain gree ta um. A de one wa gree fa leh um kill me. A got de powa fa gii me life, an A got de powa fa tek me life back gin. Dat wa me Fada done chaage me fa do.”

¹⁹Wen de Jew people yeh dem wod wa Jedus say, dey ain been able fa gree mongst deysef gin.

²⁰Heapa dem say, “A ebil sperit dey een dat man! E mad! Hoccome oona da listen ta um?”

²¹Bot oda dem say, “Ef a man got a ebil sperit een um, e ain gwine taak like dat! Ain no way a ebil sperit able fa mek de bline see, ainty?” De People Ton Ginst Jedus

²²Winta time come, an de people gone ta Jerusalem fa de holiday dey call de Feas ob de Dedication.

²³An Jedus been dey. E beena waak een God House, een de side dey call Solomon Piza.

²⁴De Jew people geda roun um an aks um say, “How long ya gwine mek we wait? Ya mus tell we de plain trute so we kin ondastan ef ya de Messiah dat God been promise.”

²⁵Jedus ansa um say, “A done tell oona, bot oona ain bleebe me. Dem miracle wa A da do een me Fada name, dey da show oona dat A de Messiah Christ.

²⁶Oona ain bleebe me cause oona ain me own sheep.

²⁷Me sheep pay mind ta wa A da tell um. A know um, an dey da folla me.

²⁸A gim life wa las faeba. Dey ain gwine neba dead. Ain nobody able fa tek um outta me han.

²⁹Me Fada wa gii me dem sheep, e hab powa mo bigga den all. Ain nobody able fa tek um outta me Fada han.

³⁰Me an me Fada, we one.”

³¹Wen Jedus say dat, de Jew people pick op stone gin fa stone um.

³²Jedus tell um say, “A done do plenty miracle wa oona see, an me Fada gii me powa fa do um. Wish one ob dem miracle mek oona wahn fa stone me?”

³³De Jew people ansa um say, “We ain wahn fa stone ya fa none ob dem miracle wa ya done. We wahn fa stone ya cause ya da hole God cheap. Ya jes a man, bot ya da tek yasef fa be God!”

³⁴Jedus ansa um say, “Een oona own Law, God say, ‘Oona god dem,’ ainty?

³⁵We know dat wa dey done write een God Book true all de time. An God done say ta de people wa e gii e wod ta, dat dey god dem.

³⁶Fa me own paat, me Fada done pick me fa do e wok an sen me fa come eenta de wol. So wa mek oona say A da hole God cheap wen A say A de Son ob God?

³⁷Oona mus dohn bleebe me ef A ain da do wa me Fada da do.

³⁸Bot ef A da do wa me Fada da do, eben dough oona ain bleebe me now, oona oughta bleebe cause oona see dem miracle wa A beena do. Cause ob dat, oona kin know fa sho an ondastan dat me Fada dey een me, an A mesef dey een me Fada.”

³⁹Den de people try fa grab hole ta Jedus gin, bot e git pass um.

⁴⁰Den Jedus cross back oba de Jerden Riba an gone ta de place weh John fus nyuse fa bactize people, an e stay dey.

⁴¹Heapa people gone fa meet um dey, an dey tell one noda say, “John ain neba done no miracle, bot ebryting wa e say bout dis man yah, all dem ting been true.”

⁴²An a heapa people een dat place bleebe pon Jedus.