Read Gullah John 15 Bible Online

John 15 - Gullah bible

John 15

¹“A de true wine, an me Fada de one wa tek cyah ob de gyaaden.

²Ebry wine branch wa been jine ta me bot e ain beah no fruit, me Fada cut um off. An ebry branch wa da beah fruit, e da trim um back so dat branch kin beah mo fruit.

³De wod wa A done tell oona done mek oona haat clean.

⁴Oona mus stay one wid me all de time, an A gwine stay one wid oona. De wine branch wa stay ta esef an ain jine ta de wine, dat branch ain able fa beah no fruit. E haffa be jine ta de wine fa beah fruit. Same way so, oona cyahn do nottin fa God cep oona stay one wid me all de time.

⁵“A de wine. Oona de branch dem. Whosoneba stay jine ta me all de time, e gwine beah a heapa fruit fa me Fada. Oona cyahn do nottin ef ya ain jine ta me.

⁶Whosoneba ain stay jine ta me all de time, e same like a wine branch wa cut off ta esef. Dey shrow um way an den e dry op. Dey gwine geda dem dead branch an chunk um eenta de fire, weh dey gwine bun.

⁷Ef ya stay jine ta me an me wod stay een ya haat, ya kin aks me Fada fa wasoneba ya wahn an e gwine gim ta ya.

⁸Ef oona beah a heapa fruit fa me Fada, oona gwine show people dat oona gii glory ta um, an oona gwine show dat oona me ciple dem.

⁹A lob oona same like me Fada lob me. Now den, oona mus lib een me lob all de time.

¹⁰Ef ya do wa A chaage oona fa do, ya gwine lib een me lob. Same fashion, A beena do wa me Fada chaage me fa do, an A da lib een de lob ob me Fada.

¹¹“A done tell oona dis so dat oona kin lib full op wid me joy.

¹²A da chaage oona fa do dis: Oona mus lob one noda same fashion A done lob oona.

¹³Ain nobody hab no mo lob den de one wa gii e life fa de sake ob e fren dem.

¹⁴Oona me fren ef oona do wa A chaage oona fa do.

¹⁵A ain da call oona me saabant no mo, cause de saabant ain know wa e massa da do. Steada dat, A da call oona me fren, cause A done tell oona all wa me Fada done laan me.

¹⁶Oona ain pick me. A de One wa done pick oona, fa go an beah a heapa fruit, fruit wa gwine las. Den de Fada gwine gii oona wasoneba oona aks um fa, ef oona tek me name wen oona aks.

¹⁷So den, dis wa A da chaage oona fa do, ‘Oona mus lob one noda.’ De People een de Wol Gwine Hate Oona

¹⁸“Ef de people een de wol hate oona, oona mus memba dat dey been hate me fo dey hate oona.

¹⁹Ef oona blongst ta de wol, den de people ob de wol gwine lob oona, same like dey lob dey own. Bot oona ain blongst ta de wol. A done pick oona fa come out fom mongst um. Cause ob dat, dey hate oona.

²⁰Mus memba wa A done tell oona say: ‘De saabant ain no mo betta den e massa.’ De people mek me suffa, an dey gwine mek oona suffa too. Some ob dem beena do wa A laan um, an dey gwine do wa oona laan um.

²¹Bot dey gwine do all dem ting ta oona cause oona done tek me name, cause dey ain know de One wa sen me.

²²Ef A ain come an taak ta um, dem people ain been fa know dey da sin. Bot now dat A done come, dey ain hab no scuse fa dey sin.

²³De one wa hate me, e hate me Fada too.

²⁴De people ain been guilty ob dey sin ef A ain beena do all dem miracle wiles A been dey wid um. Ain no oda one neba done susha miracle. Bot now dey done see dem miracle wa A done. Stillyet, dey hate me an dey hate me Fada too.

²⁵Bot dat so e haffa be, so dat dem ting kin come same like wa been write een dem people own Law say, ‘Dey hate me, bot A ain done nottin fa mek um hate me.’

²⁶“De One wa da go longside people fa hep um, e gwine come. E de Sperit wa da come fom me Fada, an e gwine mek people know de trute. A gwine sen de Sperit ta oona fom me Fada, an e gwine come an tell bout me.

²⁷An oona mus go an tell bout me too, cause oona been dey wid me fom de time wen A fus staat fa laan people.”