Read Gullah John 16 Bible Online

John 16 - Gullah bible

John 16

¹Jedus say, “A done tell oona all dis so dat oona ain gwine fall fom oona fait een me.

²De Jew people gwine dribe oona outta dey meetin house. An fodamo, de time da come wen de poson wa kill oona gwine tink dat e da do wa God wahn um fa do.

³Dey gwine do dem ting ta oona cause dey ain neba know de Fada, an dey ain neba know me needa.

⁴Bot A done tell oona dis now so dat wen de time come wen dey da do dem ting ta oona, oona gwine memba wa A done tell oona. De Holy Sperit Gwine Come Longside Oona fa Hep “A ain tell oona dis wen A fus staat fa laan oona, cause den A been dey wid oona een dat time.

⁵Bot now A da gwine back ta de one wa sen me fa come eenta de wol. Stillyet, ain none ob oona aks me weh A da gwine.

⁶Now dat A done tell oona all dis, oona haat hebby.

⁷Bot A da tell oona fa true, e mo betta fa oona ef A gone way. Cause ef A ain gone, de One wa come longside oona fa hep, e ain gwine come ta oona. Bot ef A gone way, A gwine sen um ta oona.

⁸An wen e come, e gwine mek de people een de wol know dat dey been wrong bout sin. E gwine mek um know dat dem ting wa dey tink right, dey ain right. An e gwine mek um know dat God gwine jedge all people.

⁹E gwine mek people know dat dey been wrong bout sin, cause dey ain bleebe pon me.

¹⁰E gwine mek people know dat dem ting wa dey tink right, dey ain right, cause A da gwine ta de Fada, an oona ain gwine see me no mo.

¹¹E gwine mek people know dat God gwine jedge all people, cause God done condemn de Debil, wa da rule dis wol.

¹²“A got plenty mo fa tell oona, bot dat mo den oona kin stan jes now.

¹³Bot God Sperit wa da mek people know de trute, e da come an e gwine hep oona know all ting wa true. An wa e say ain gwine come fom esef. E gwine say jes wa e yeh fom God, an e gwine tell oona bout dem ting wa gwine happen by an by.

¹⁴E gwine gii hona ta me, cause e gwine tek me wod an mek oona know wa A say.

¹⁵All wa blongst ta de Fada blongst ta me too. Dat hoccome A say de Holy Sperit gwine tek wa A gim an mek oona know wa A say. De Time da Come wen de Ciple dem Gwine Rejaice fa True

¹⁶“Atta leetle wile, oona ain gwine see me no mo. Bot den atta leetle wile mo, oona gwine see me gin.”

¹⁷Some ob e ciple dem aks one noda say, “Wa e try fa say? E say, ‘Atta leetle wile, oona ain gwine see me.’ An e say, ‘Den atta leetle wile mo, oona gwine see me gin.’ An e say too, ‘Dat so cause A da gwine ta de Fada.’

¹⁸Wa e mean wen e say ‘Atta leetle wile?’ We ain know wa e da taak bout!”

¹⁹Jedus know dat de ciple dem been wahn fa aks um bout dat, so e tell um say, “A say, ‘Atta leetle wile oona ain gwine see me, bot den atta leetle wile mo, oona gwine see me gin.’ Ain dat wa oona da aks one noda bout?

²⁰A tell oona fa true. Oona gwine weep an wail, bot de people een de wol gwine rejaice fa true. Oona gwine be burden down, bot by an by oona gwine rejaice fa true.

²¹Wen a ooman time come fa bon e chile, e burden down, cause e time done come fa suffa. Bot wen e done hab e chile, e fagit de pain wa e been suffa, cause e da rejaice dat a chile been bon eenta de wol.

²²Same fashion, oona burden down now. Bot de time da come wen A gwine see oona gin, an dat gwine mek oona rejaice fa true. An ain nobody gwine be able fa tek dat joy way fom oona.

²³“Wen dat time come, oona ain gwine aks me fa nottin. A da tell oona fa true, me Fada gwine gii oona wasoneba oona aks um fa, wen oona aks um een me name.

²⁴Til now, oona ain aks God fa nottin een me name. Aks God an e gwine gii oona wa oona aks fa. Den oona haat gwine be full op wid joy. Jedus Done Win Out oba de Wol

²⁵“A beena laan oona all dem ting yah een paable. Bot de time da come wen A ain gwine tell um een paable no mo. A gwine taak plain ta oona bout me Fada.

²⁶Wen dat time come, oona gwine aks um een me name. A ain say dat A gwine aks de Fada fa oona sake.

²⁷Cause de Fada esef lob oona. E lob oona cause oona lob me an oona bleebe A come fom de Fada.

²⁸A come fom de Fada eenta de wol, an now A da gwine fom de wol an A da gwine back ta me Fada.”

²⁹Jedus ciple dem tell um say, “See yah, ya da taak plain now. Ya ain da taak een paable.

³⁰We know now dat ya know ebryting. Ya ain haffa hab nobody aks ya queshon. Dat mek we bleebe God done sen ya.”

³¹Jedus ansa um say, “Oona bleebe me fa true now, ainty?

³²Bot de time da come, an e yah now, wen dey gwine mek all ob oona scatta. Ebrybody gwine ron way ta e own house. Oona gwine lef me all ta mesef. Stillyet, A ain gwine be lef all ta mesef fa true, cause de Fada right yah wid me.

³³A done tell oona all dem ting yah so dat oona wa come fa be one wid me kin hab peace een oona haat. Een dis wol oona gwine hab trouble pon ebry han, bot mus dohn be scaid! A done win out oba de wol!”