Read Gullah John 3 Bible Online

John 3 - Gullah bible

John 3

¹Dey been one ob de Pharisee dem name Nicodemus, wa been a leada wa blongst ta de Jew Council.

²One night, Nicodemus come ta Jedus an say, “Teacha, we know ya a teacha wa God sen. Cause ain nobody able fa do dem miracle wa ya da do, ef God ain dey wid um.”

³Jedus tell um say, “A da tell ya fa true, ain nobody kin come onda God rule ef e ain bon gin.”

⁴Nicodemus aks Jedus say, “How kin a poson wa done grown git bon gin? Fa sho, a poson ain gwine git leetle an go back eenside de belly ob e modda an git bon a secon time like a leetle baby!”

⁵Jedus say, “A da tell ya fa true, ain nobody kin come onda God rule ef dat poson ain bon wid wata an wid de Holy Sperit.

⁶We fada an modda gii we we body, bot God Sperit gii we we sperit.

⁷Ya mus dohn wonda wen A tell ya say, ‘Ya mus be bon gin.’

⁸De breeze da blow wehsoneba e wahn fa blow. Ya da yeh de soun wa e mek, bot ya ain know wa side e da come fom an ya ain know wa side e da gwine. Dat de same way e happen wen de Holy Sperit gii people nyew life, an dey bon gin.”

⁹Nicodemus aks Jedus say, “How dat kin be?”

¹⁰Jedus aks um say, “Ya a big teacha een Israel an ya ain ondastan wa A da taak bout?

¹¹A da tell ya fa true, wa we know an wa we done see, we da tell oona bout. Stillyet, oona ain wahn fa bleebe wa we da tell oona.

¹²Oona ain bleebe me wen A tell oona bout dem ting wa dey een dis wol. So den, how ya gwine bleebe me wen A tell ya bout dem ting wa dey een heaben?

¹³Dey ain nobody neba gone op ta heaben cep de Man wa Come fom God, wa come down outta heaben.

¹⁴“Jes like Moses done hice de bronze snake op pon a pole dey een de wildaness, same way so, dey gwine haffa hice op de Man wa Come fom God,

¹⁵so dat ebrybody wa bleebe pon um gwine git true life wa ain gwine neba end.

¹⁶Cause God lob all de people een de wol sommuch dat e gii we e onliest Son. God sen we um so dat ebrybody wa bleebe pon um ain gwine dead. Dey gwine lib faebamo.

¹⁷God ain sen e Son eenta de wol fa condemn um. God sen e Son fa come sabe de people shru e Son.

¹⁸“Ef a poson bleebe pon God Son, God ain gwine condemn dat poson dey. Bot ef a poson ain bleebe pon God Son, God done condemn um, cause e ain bleebe pon de name ob de onliest Son ob God.

¹⁹God been mek de light ob trute come eenta de wol, bot people like de daak steada de light cause dey keep on da do ebil ting. Dat so de jedgiment stan.

²⁰Ebrybody wa da do ebil ting, dey ain like de light tall an ain gwine come eenta de light, cause dey ain wahn de light fa show de ebil ting dem wa dey da do.

²¹Bot ebrybody wa da lib coddin ta de trute ob God gwine come eenta de light, so dat de light kin show dat fa sho dey beena do wa God tell um fa do.” Jedus an John

²²Atta dat, Jedus an e ciple dem gone ta Judea lan. E stay some time wid um dey an e beena bactize people.

²³John wa Bactize beena bactize people een Aenon too, wa been dey close ta Salim, cause plenty wata been dey. People beena go ta John dey, an e beena bactize um.

²⁴(De time wen all dis beena happen, John ain been pit een de jailhouse yet.)

²⁵Some ob John ciple dem an one Jew man staat fa aagy bout de Jew Law wa say a poson mus wash een a special way ef e wahn fa be clean een God eye.

²⁶So dey gone ta John an tell um say, “Teacha, ya memba dat man wa been wid ya wen ya been dey pon de oda side ob de Jerden Riba, de one ya beena tell bout? Well, now e da bactize people een de Jerden Riba, an ebrybody da gwine ta um!”

²⁷John tell um say, “Ain nottin like dis kin happen ta a poson cep God mek um happen.

²⁸Oonasef yeh me wen A say, ‘A ain de Messiah, bot God sen me heada de Messiah, fa come mek a way fa um.’

²⁹De bride blongst ta de groom, bot de fren ob de groom da stan by da listen fa de groom, an wen e yeh de groom boice e full op wid joy. Dat so e stan fa me. A full op wid joy.

³⁰E mus come fa be mo an mo great, an A mus come fa be less an less.” De One wa Come fom Heaben, E Oba All

³¹De one wa come fom heaben, e oba all. De one wa dey een dis wol blongst ta dis wol, an e da taak bout dis wol own bidness. Bot de one wa come fom heaben, e oba all.

³²De one wa come fom heaben da taak bout wa e done see an yeh. Stillyet, ain nobody bleebe wa e say.

³³De poson wa bleebe wa e say, e show dat e been bleebe dat wa God say, e true.

³⁴De one wa God sen, e da tell people de message wa God gim, cause God da gim e Sperit, til e full op wid um.

³⁵God we Fada da lob e Son an e gim chaage oba all ting.

³⁶Ebrybody wa bleebe pon God Son, dey got de true life wa ain neba gwine end. Bot ebrybody wa ain do wa God Son say, dey ain neba gwine git de true life, an God gwine be too bex wid um faeba.