Read Gullah John 9 Bible Online

John 9 - Gullah bible

John 9

¹Wen Jedus beena waak long, e see a bline eye man wa been bon bline.

²De ciple dem aks Jedus say, “Teacha, who dat sin wa mek dis man yah bon bline? Dat man sin, or e modda an e fada?”

³Jedus ansa say, “De bline wa oona see een dis man eye yah ain got nottin fa do wid e own sin, needa e modda an e fada sin. E bline so dat people kin see de wok wa God gwine do een e life.

⁴Long as de daytime las, we haffa do de wok wa de one wa sen me gii we fa do. Cause de night time da come, an dey ain nobody gwine be able fa wok den.

⁵Wiles A dey yah een de wol, A de light ob de wol.”

⁶Atta Jedus say dat, e spit pon de groun. Den e mek mud wid de spit an e rub de mud pon de bline man eye.

⁷E tell de man say, “Mus go wash ya face een de wata ta de Pool ob Siloam.” (Siloam mean “De one wa dey sen.”) So de man gone. An atta e wash e face dey een de wata, jes den e able fa see. E gone back ta e house, e see ebryting.

⁸E neighba dem an de people wa beena shim wen e nyuse fa beg, dey say, “Ain dis de man wa nyuse fa seddown an beg?”

⁹Some people ansa say, “Dat de man.” Bot oda people say, “No, dat ain de man. E jes fabor um.” So den de man esef say, “A de man wa nyuse fa beg.”

¹⁰So de people aks um say, “Hoccome ya kin see now?”

¹¹De man ansa um, “De man dey call Jedus mek mud wa e rub pon me eye. Den e tell me say, ‘Mus go wash ya face een de wata ta de Pool ob Siloam.’ So A gone, an atta A wash me face, A been able fa see.”

¹²Dey aks um say, “Weh Jedus dey?” De man say, “A ain know weh e dey.” De Pharisee dem Quizzit de Man wa Jedus Heal

¹³Den de people tek de man wa been bon bline an gone ta de Pharisee dem.

¹⁴Now den, Jedus been mek de mud an heal dat bline eye man pon de Woshup Day.

¹⁵So de Pharisee dem aks de man noda time hoccome e able fa see. De man tell um say, “E rub mud pon me eye an A wash me face, an now A able fa see.”

¹⁶Some de Pharisee dem say, “De man wa done dis ain come fom God, cause e ain do wa de Law say we fa do pon de Woshup Day.” Bot some oda Pharisee aks say, “Hoccome a man wa da sin able fa do miracle like dem yah?” Dem Pharisee ain gree bout um.

¹⁷So de Pharisee dem aks de man gin say, “Ya de one dat man mek able fa see. So den, wa ya say bout um?” De man wa been bon bline say, “Dat man a prophet.”

¹⁸Stillyet, de Jew leada dem ain bleebe de man been bline an now e kin see, til wen dey sen fa e modda an e fada.

¹⁹Dey aks um say, “Dis man oona chile? Oona say e bon bline. Well, hoccome e able fa see now?”

²⁰De man modda an fada ansa um say, “We know dis we chile, an we know e been bline wen e bon.

²¹Bot we ain know hoccome e able fa see now. An we ain know who dat heal e eye. Oona mus aks um. E ole nuff. E kin taak fa esef!”

²²De man modda an e fada say dat cause dey been scaid ob dem Jew leada. De Jew leada dem done beena gree dat ebrybody wa say e bleebe Jedus de Messiah Christ, dem leada gwine chunk um fom outta de Jew meetin house.

²³Dat wa mek de man modda an e fada say, “Oona mus aks um. E ole nuff. E kin taak fa esef!”

²⁴De Jew leada dem call de man wa been bline fa come back, an dey tell um say, “Ya mus sweah fo God dat ya gwine tell we de trute! We know dat dis man wa heal ya eye got sin een e life.”

²⁵De man ansa um say, “A ain know ef e got sin or ef e ain got sin een e life. One ting A know fa sho. A been bline, bot now A da see.”

²⁶Dey aks um gin say, “Wa de man do ta ya fa heal ya eye?”

²⁷De man ansa um say, “A done tell oona, bot oona ain listen. Wa mek oona wahn me fa tell oona gin? Oona wahn fa be e ciple too?”

²⁸Wen dem Pharisee yeh dat, dey shrow slam at de man an say, “Ya dat man ciple, ainty! We Moses ciple.

²⁹We know God done taak ta Moses, bot dis man yah, we ain eben know weh e come fom.”

³⁰De man ansa say, “Dat sho nuff scrange! Oona ain eben know weh dis man come fom, bot e done heal me eye.

³¹We know God ain yeh wa no sinna say ta um. Bot God yeh all de people wa woshup um fa true an do wa e tell um fa do.

³²Fom wen God fus mek de wol, nobody ain neba yeh say dat somebody done heal a poson wa been bon bline.

³³Ef dis man ain been come fom God, e ain been able fa do nottin.”

³⁴Den dem Jew leada ansa say, “Ya done bon wid sin all roun ya. Ya da try fa laan we?” Den dey shrow de man outta de meetin house. Dem wa Bline fa True

³⁵Jedus yeh say dey been chunk de man out, so e gone an find de man an e aks um say, “Ya bleebe pon de Man wa Come fom God?”

³⁶De man ansa say, “Sah, tell me who dis Man wa Come fom God, so A kin bleebe pon um!”

³⁷Jedus say, “Ya done shim. E da taak ta ya.”

³⁸De man say, “Lawd, A bleebe ya!” An e kneel down fo Jedus an e woshup um.

³⁹Jedus say, “A come eenta dis wol fa jedge, so dat bline eye people kin see, an dem wa see kin ton out fa be bline.”

⁴⁰Some Pharisee been dey wid Jedus an dey yeh wa e say. Dey aks Jedus, “Ya ain mean fa say we bline too, ainty?”

⁴¹Jedus tell um say, “Ef oona been bline, oona ain been guilty fa none ob oona sin. Bot now dat oona say oona ain bline, dat mean dat oona guilty stillyet.”