Read Gullah 1 Corinth 1 Bible Online

1 Corinth 1 - Gullah bible

1 Corinth 1

¹A Paul, wa God call fa be postle ob Jedus Christ cause dat wa God wahn, da write dis yah letta, long wid broda Sosthenes.

²We da write ta oona, God choch dey een Corinth, oona wa Jedus Christ done clean op an call fa be God own people. An we da write too ta all dem people all oba wa pray een de name ob we Lawd Jedus Christ, cause e we Lawd an dey Lawd too.

³We pray fa God we Fada an we Lawd Jedus Christ bless oona an gii oona peace een oona haat. De Blessin Dem wa Jedus Christ Gii

⁴A da tell me God tankya all de time fa e blessin pon oona wen oona come fa be one wid Jedus Christ,

⁵cause een Christ e done mek oona rich een ebry way, een all oona say an all oona ondastan een oona haat.

⁶De Good Nyews bout Christ done come fa tek a stan een oona haat.

⁷Cause ob dat, oona ain gone dout none ob dem blessin ob de sperit, wiles oona da wait fa dat time wen de Lawd Jedus Christ gwine come back.

⁸E gwine keep on da mek oona scrong all de way ta de end, so dat God ain gwine find nottin fa condemn oona fa, wen dat day come wen we Lawd Jedus Christ come back.

⁹Oona kin trus God fa do all wa e promise. E done call oona fa folla longside e Son, we Lawd Jedus Christ. Oona Mus Gree wid One Noda

¹⁰Me Christian bredren, A da beg oona by de tority ob de name ob we Lawd Jedus Christ, oona all mus gree wid one noda een de way oona tink an een wa oona wahn fa do. Den dey ain gwine be nottin fa oona fa spute bout.

¹¹A da tell oona dis, me bredren, cause some ob de people fom Chloe house done bring me wod say, quarrellin gwine on mongst oona.

¹²Leh me splain wa A mean! One ob oona da say, “A da do wa Paul say.” Noda da say, “A da do wa Apollos say.” Some oda one ob oona da say, “A da do wa Cephas say.” An noda one da say, “A da do wa Christ say.”

¹³Christ ain teah op eenta diffunt paat, ainty? A, Paul, ain been de one wa dey done kill pon de cross fa oona, ainty? An wen oona git bactize, dey ain bactize oona een Paul name, ainty?

¹⁴A tank de Lawd dat A ain bactize none ob oona, cep fa Crispus an Gaius.

¹⁵So den, dey ain nobody kin say oona been bactize een me name.

¹⁶(A done bactize Stephanas too, an all dem wa lib een e house. Oda den dat, A ain memba ef A bactize no oda poson.)

¹⁷Christ ain sen me so A kin bactize people. E sen me so A kin go roun da tell people de Good Nyews. An A ain fa tell um wid purty wod. A da tell um plain, cause A ain wahn fa tek nottin way fom de powa ob Christ pon de cross. God Show E Powa an E Sense Shru Christ

¹⁸De trute bout de cross ain mek no sense tall ta dem wa pon dey way fa be loss faeba. Bot ta we wa God da sabe, dat show de powa ob God.

¹⁹Dey done write een God Book say,“A gwine tek de wise wod ob de people dem wa nyuse jes dey own sense, an A gwine bring um ta nottin.All de laanin dem people git fom book, A gwine chunk um out.”

²⁰Weh dem people wa hab a heapa sense? Weh de Jew Law teacha dem? Weh dem wa kin aagy good een de wol taday? God done show dat all de sense dat people got een dis wol plain foolish.

²¹God mek um so dat de people ob dis wol ain know um by dey own sense. God nyuse a foolish story fa sabe dem wa da bleebe pon um.

²²De Jew people wahn fa see miracle, an dem wa ain Jew da try fa figga ting out by dey own sense.

²³Bot now we da tell people bout Christ an how e done dead pon de cross. Dat bumfumble de Jew dem, an dem wa ain Jew, dey say dat ain mek no sense tall.

²⁴Bot ta dem wa God call fa come ta um, Jew people an dem wa ain Jew all two, we preach bout Christ, God powa an God sense.

²⁵Cause wa God do dat look like e ain mek no sense een people eye, dat mek way mo sense fa true den people sense. An wen people tink God weak, eben den e got mo powa den all de scrent ob man.

²⁶Me Christian bredren, memba wa kind ob people oona been wen God call oona. Ain many ob oona hab sense, coddin ta de people ob de wol. Ain many ob oona hab powa. Ain many ob oona bon eenta portant fambly.

²⁷Bot God pick wa people een de wol tink ain mek no sense tall fa shame dem wa got dis wol sense. E pick dem wa ain got no powa tall, fa shame dem wa scrong.

²⁸God pick dem wa people hole cheap an tink dey ain wot nottin. God do dat fa mek wa people ob de wol tink walyable mount ta nottin.

²⁹Cause ob dis, dey ain nobody kin brag bout nottin front ob God.

³⁰God de one wa mek oona come fa be one wid Jedus Christ. God gii we good sense. Christ mek all ting right tween we an God. E mek we come fa be God own people an set we free.

³¹So den, like dey write een God Book say, “Ef people wahn fa brag, leh um brag bout wa de Lawd done.”