Read Gullah 1 Corinth 12 Bible Online

1 Corinth 12 - Gullah bible

1 Corinth 12

¹Now den, me Christian bredren, A wahn oona fa ondastan de trute bout de gif dem de Holy Sperit da gii.

²Oona know dat wen oona ain know God yet, oona git ton way fom de right road an woshup idol wa ain got no life.

³So den, A wahn oona fa ondastan dat ef de Holy Sperit tek chaage ob a poson, e ain gwine say, “Leh dey be a cuss pon Jedus.” An nobody ain able fa say, “Jedus de Lawd,” cep de Holy Sperit da tek chaage ob um.

⁴Dey plenty diffunt kind ob ting dat God Sperit da gii we, bot de same Holy Sperit da gii we um all.

⁵Dey plenty diffunt way fa saab de Lawd, bot all we da saab de same Lawd.

⁶People wa know how fa do plenty diffunt kinda wok, bot de same God da mek all people know how fa do all dem wok.

⁷God da gii ebrybody sompin fa show dat e Sperit powa da wok eenside um fa de good ob all de people.

⁸God Sperit da mek one poson able fa taak wid sense. Same time, de same Sperit da mek noda one able fa laan people.

⁹De same Sperit da gii one poson fait. E da gii oda one powa fa heal sick people.

¹⁰An de same Sperit da gii one poson powa fa do miracle. Same time, e da gii noda one powa fa taak God wod. De Sperit da mek oda one able fa know ef God Sperit or oda sperit da mek people taak wa dey da taak. God Sperit da mek oda poson able fa taak oda language. An e da mek noda one able fa tapetate dem oda language.

¹¹Dat de same Holy Sperit wa da gii ebrybody dey gif fa do wa e wahn um fa do. One Body wa Got Plenty Paat

¹²Same way a body hab all kinda paat, an all dem ting paat ob de same body, e de same say so wid Christ.

¹³De same Holy Sperit done bactize we all, an we come fa be one body. Some ob we Jew people, an oda people ain Jew. Some slabe an oda people free. An de same Sperit done come eenside all ob we.

¹⁴De body ain got jes one paat. De body got plenty paat.

¹⁵Ef de foot say, “A ain a han, so A ain blongst ta de body,” dat ain mean fa say de foot ain still paat ob de body.

¹⁶An ef de yea say, “A ain a eye, so A ain blongst ta de body,” dat ain mean fa say de yea ain still paat ob de body.

¹⁷Ef de one whole body been jes a eye, how e gwine yeh? Ef de one whole body been jes a yea, how e gwine be able fa smell ting?

¹⁸Bot fa true, God pit ebry paat yah een de body jes de way e wahn um.

¹⁹Ef all dem diffunt paat yah been jes one paat, de body ain gwine be a body tall.

²⁰Bot fa true dey plenty paat, stillyet dey mek op jes one body.

²¹So den, de eye cyahn tell de han say, “A kin do dout ya!” De head cyahn tell de foot say, “A kin do dout ya.”

²²No, we cyahn do dout dem body paat wa we tink ain got much scrent.

²³An dem paat ob de body wa we tink ain wot nottin, dey de one we tek cyah ob mo betta. An dem paat wa ain so fine fa see, we kiba dem op.

²⁴Bot we ain haffa kiba op dem paat wa fine fa see. God done pit all de paat togeda een de body een susha way so dat dem paat wa we tink ain wot sommuch git hona mo den dem oda one.

²⁵God done dis so dat dey ain gwine be no quarrellin een de body. Bot de diffunt paat fa lib een susha way dat dey hab de same cyah fa one noda.

²⁶Ef one paat da suffa, all de oda paat suffa wid um. Ef one paat git praise, all de oda paat rejaice wid um.

²⁷Now den, oona mek op Christ body. Ebry one ob oona a paat ob dat body.

²⁸Dat so e stan een de choch. God been pit all de paat dem een place. Fus, de postle dem, secon, de prophet dem, tird, de teacha dem. Den God pit dem wa da do miracle. Atta dem, e pit dem wa e gii powa fa heal, an den dem wa able fa hep oda people, den dem wa able fa lead oda people. An den, dem wa e gii de gif fa taak oda language.

²⁹Fa sho, all de people ain postle, ainty? Dey ain all prophet, an dey ain all teacha. Dey ain all got powa fa do miracle, ainty?

³⁰All ob um ain got powa fa heal. Dey ain all able fa taak oda language, an dey ain all got powa fa tapetate dem oda language.

³¹So den, set oona haat pon dem gif wa mo betta den all de res. An now A gwine show oona de bes way ob all.