Read Gullah 2 Corinth 3 Bible Online

2 Corinth 3 - Gullah bible

2 Corinth 3

¹Oona gwine tink dat we da staat fa taak ta oona gin bout wesef, ainty? Bot fa sho dat ain so. We ain fa do like some oda people haffa do. We ain haffa bring letta ta oona fa mek oona know ef we good, ainty? An oona ain haffa sen letta bout we ta oda people needa.

²Cause oona we letta wa done been write down eenside we haat fa ebrybody fa know an read.

³Oona da show fa true dat oona a letta fom Christ wa we done bring. An nobody ain tek ink fa write dis letta. God write um wid e Sperit. E ain write pon stone, bot pon people haat.

⁴We da say dem ting yah cause we know fa true dat we kin trus God shru Christ.

⁵We ain able fa do nottin by wesef, so we ain gwine say dat we able. God de one wa da mek we able fa do all ting wa we da do.

⁶Same fashion, God mek we able fa be minista ob a nyew cobnant wa e mek wid people. Dat cobnant ain no law wa been write down een a book. God Sperit mek dat cobnant wid we. Cause de law wa been write down, dat condemn people ta det, bot God Sperit da gii life.

⁷Now den, de Law wa condemn we ta det been write down pon stone. Wen God gim, e shinin glory come pon Moses. An de Israel people dem ain been able fa keep da look pon Moses face, cause e face beena shine sommuch, eben dough dat glory beena fade way.

⁸So ef de Law wa bring det come wid sommuch glory, fa sho, de wok ob God Sperit gwine be full ob eben mo glory den dat!

⁹De wok wa Moses done, wa condemn people, been full ob glory. Bot de wok wa God do wa mek all ting right twix God an e people, dat haffa be full ob glory heap mo den dat, fa true.

¹⁰Cause dat wa been a shinin glory ain got no glory tall now wen we see de glory wa come, wa great mo den all.

¹¹De ting wa ain been fa las long, e hab glory. So den dat wa gwine las faeba, dat eben mo full op wid glory.

¹²Now den, cause we know we kin look fowaad ta dat, we ain fraid tall fa taak plain fa God.

¹³We ain like Moses wa been kiba e face so dat de Israel people ain see dat de shinin glory beena fade an gone way.

¹⁴Bot fa true, jes like dat ting wa kiba Moses face, sompin been mek dem Israel people so dat dey ain git ondastandin bout dat. Eben op ta taday, dat same ting dey wa da mek um so dat dey ain ondastan wen dey da read de book dem wa taak bout de ole cobnant. Cause jes wen somebody come fa be one wid Christ, jes den dat face kiba gone an e git dat ondastandin.

¹⁵Eben op ta taday, wensoneba dey da read de Law wa God gii Moses, dey ain ondastan.

¹⁶Bot wen somebody ton ta de Lawd, God mek um git ondastandin bout dat.

¹⁷Now den, de Lawd, e de Sperit. Wehsoneba de Sperit ob de Lawd dey, de people free.

¹⁸So now dat God done moob de kiba fom we face, wensoneba people see we, dey see de glory ob de Lawd da shine fom we. An God Sperit da mek we jes like de Lawd wid mo an mo ob e glory.