Read Gullah Ephesus 5 Bible Online

Ephesus 5 - Gullah bible

Ephesus 5

¹So den, oona mus try fa be like God, cause oona e chullun wa e lob fa true.

²Oona life mus be full op wid lob een all dat oona do, jes like Christ lob we an done gii e life op fa we. E offa op e life as a sweet smellin offrin ta God, a sacrifice wa sattify God.

³Oona God people, so e ain right fa none ob oona fa eben taak bout da lib a loose life or da ramify roun. E ain right needa fa oona fa eben taak bout da git de big eye, all de time da wahn wa oda people hab.

⁴An e ain right fa oona taak bad, foolish, or dorty wod. Steada dat, oona oughta tell God tankya.

⁵Oona kin know fa sho dat dey ain nobody wa da lib a loose life, nobody wa ramify roun, nobody wa hab de big eye, all de time da wahn wa oda people hab (cause a poson wa do dat, e da woshup idol), none ob dem neba gwine go ta de place weh Christ an God da rule.

⁶Mus dohn leh nobody ceebe oona, da taak lyin wod wa ain mek no sense. All dese ting yah wa A da taak bout, dem mek God bex fa true wid people wa ain do wa e tell um fa do.

⁷Oona mus dohn hab nottin fa do wid dem kind ob people yah.

⁸Oona done been loss een sin, daak like de daak ob de night. Bot now oona come fa be light. Oona de Lawd own people. So den, oona mus lib like people wa blongst ta de light.

⁹Cause ebryting wa good an wa right an wa true da come fom de light.

¹⁰Try fa find out wa de Lawd wahn oona fa do.

¹¹Mus dohn hab nottin fa do wid dem ting wa people do wa ain wot nottin. Dem ting daak wid sin like de daak ob de night. Bot oona mus bring um ta de light, an mek people know wa dem daak ting be like fa true.

¹²Ef somebody eben taak bout de bad ting wa people do wen nobody shim, e da shame esef.

¹³Bot wen de light da shine pon sompin, den people able fa see fa true wa dat ting da. Cause all wa de light shine pon, we eye kin see. Cause de light mek we see ebryting.

¹⁴Dat wa mek um write say,“Ya wa da sleep, wake op. Git op fom mongst de dead people an lib gin!An Christ gwine gii ya light.”

¹⁵Oona mus tek cyah how oona da lib oona life. Mus dohn lib like people wa ain got no sense. Mus lib like dem wa got sense.

¹⁶Ebry chance oona git fa do good, oona mus do all dat oona able fa do. Cause dis time yah a ebil time.

¹⁷So den, mus dohn do nottin foolish, bot ondastan wa de Lawd wahn oona fa do.

¹⁸Mus dohn be dronka, full op wid wine til oona do bad ting wa gwine dribe oona ta ruint. Steada dat, oona mus lib full op wid de Holy Sperit eenside oona.

¹⁹Wen oona da taak wid one noda, oona oughta nyuse de wod ob de psalms an hymn an speritual. Oona oughta sing um wid all oona haat fa praise de Lawd.

²⁰Oona mus tell we Fada God tankya all de time fa all ting, een de name ob we Lawd Jedus Christ. How Husban an Wife Oughta Lib

²¹Oona mus obey one noda, cause oona hona Christ.

²²Wife, ya mus obey ya husban, jes like ya obey de Lawd.

²³Cause de husban de head ob de wife. E got tority oba e wife jes like Christ got tority oba de choch. An Christ de Sabior ob de choch, e body.

²⁴Jes like de choch mus obey Christ, same way so de wife mus obey e husban een all ting.

²⁵Husban, ya mus lob ya wife, jes like Christ lob de choch an done gii op e life fa um.

²⁶E gii e life fa de choch fa mek um God own, da mek e choch clean wen e wash um wid wata by e wod.

²⁷Christ do all dat so dat wen e bring de choch fa stanop fo um, de choch gwine be too purty. De choch ain gwine hab nottin bad or wrong bout um. E gwine blongst ta um fa true, an e ain gwine hab eben one bad spot or wrinkle, nottin fa tek way fom e beauty.

²⁸Een dat same way, de husban mus lob e wife jes like de husban lob e own body. De man wa da lob e wife, e da lob esef.

²⁹Fa sho, ain nobody neba hate e own body. Steada dat, e da feed e body an tek cyah ob um, an dat jes like Christ tek cyah ob de choch.

³⁰Cause we all blongst ta Christ body.

³¹Dey write een God Book say, “Cause ob dis, a man gwine lef e fada an e modda, an e gwine marry a wife. Dey gwine jine togeda, an de man an e wife gwine be one.”

³²Dis wa A jes write show we a great ting wa true fa sho, a ting wa been haad fa ondastan. Bot A tell oona say dis wod da taak bout Christ an de choch.

³³Bot dis same wod da taak bout oona too. Ebry husban mus lob e wife jes like e lob esef an ebry wife mus hona e husban.