Read Gullah 1 Thessalonica 5 Bible Online

1 Thessalonica 5 - Gullah bible

1 Thessalonica 5

¹Now den, we bredren, dey ain no need fa we fa write oona bout, wa time or wa day dem ting gwine happen.

²Cause oona know fa true dat de Lawd gwine come back wen people ain da look fa um. Dat day ob de Lawd gwine come sudden, jes like tief kin come een de night.

³Wiles people say, “All ting gwine fine an peaceable. Dey ain nottin fa be scaid ob,” jes den, all ob a sudden, bad bad trouble gwine come down pon um. Ebrybody gwine suffa. Nobody ain gwine know fohan. E gwine be like wen bad pain come sudden pon a ooman wen e bon e chile.

⁴Me Christian bredren, oona ain een de daak. So den, dat day ob de Lawd ain oughta come pon ya like a tief.

⁵Oona all people wa blongst ta de light an ta de day. We ain blongst ta de night. We ain like dem wa da lib een de daak.

⁶So den, we mus dohn sleep, da lib a life ob sin like de oda res wa da sleep. Leh we stay wake an tink scraight.

⁷Cause een de night time people sleep, an een de night time people git dronk.

⁸Bot we blongst ta de day, an so we mus tink scraight bout how we da lib. We da pit on fait an lob same way de sodjaman da pit on e breastplate. We da pit on de sabation we know God da gii we, same way a sodjaman da pit on e helmet.

⁹God ain pick we fa mek we suffa e jedgiment. E pick we fa gii we sabation shru we Lawd Jedus Christ.

¹⁰Cause Jedus done dead fa we sake, so dat we kin go lib togeda wid um. Ain mek no nebamind weza we done dead, needaso ef we ain dead yet, wen e come back.

¹¹So cause ob dat, oona mus keep on da courage one noda an hep one noda fa be mo scronga een de Lawd, jes like oona beena do. Paul Tell Um How fa Lib fa God

¹²We bredren, we beg oona fa hona oona leada dem, wa da wok haad dey mongst oona. Dey de one dem dat God done pick fa tell oona wa fa do, an fa laan oona how oona oughta lib.

¹³Oona mus preciate um fa true, an lob um cause ob de wok dey da do. An oona mus lib peaceable wid one noda.

¹⁴We bredren, we beg oona fa waan de people wa ain wahn fa do no wok. Courage dem wa scaid. Hep dem wa ain scrong een de fait, an beah wid ebrybody.

¹⁵Mek sho dat nobody ain pay back ebil wid ebil. Mus try all de time fa do good ta one noda an ta all people.

¹⁶Rejaice all de time.

¹⁷Neba stop da pray.

¹⁸Ain mek no nebamind wa happen, oona mus tell God tankya fa ebryting. Cause dat how God wahn oona fa lib, oona wa done come fa be one een Jedus Christ.

¹⁹Mus dohn stop de Holy Sperit fom do e wok eenside oona.

²⁰Wen people da taak wod wa God pit een dey haat, oona mus dohn hole um cheap. Mus listen ta um.

²¹Mus look at ebryting good fashion fa mek sho weza e fom God fa true. Den ef e good, oona mus hole fast ta um.

²²Mus stay way fom ebry kind ob ebil.

²³We da pray dat de God wa da gii we peace gwine mek oona like esef, holy an good een ebry way. An we pray dat e gwine keep oona sperit, soul an body clean fom sin so dat wen we Lawd Jedus Christ come back, e ain gwine find no fault een oona.

²⁴God wa call oona fa be e own gwine do dat fa oona, cause e da do all dat e promise.

²⁵We bredren, oona mus pray fa we too.

²⁶Tell all de bredren hey een Christian lob.

²⁷A da tell oona, by de tority ob de Lawd, fa read dis letta ta all de bredren.

²⁸We pray dat we Lawd Jedus Christ gwine bless all ob oona.