Read Gullah 1 Timothy 2 Bible Online

1 Timothy 2 - Gullah bible

1 Timothy 2

¹Fus off, A da beg ya dat dem wa blongst ta Christ mus pray ta God fa all people, da aks um fa hab mussy pon um an da tell um tankya fa e blessin ta we all.

²Mus pray fa de king dem an all wa hab tority, so we kin lib quiet an peaceable an lib sponsable, da waak close ta God an dohn do nottin dat gwine mek we shame.

³Dat de way we oughta pray, cause dat pray, e good an mek God, we Sabior, heppy.

⁴God wahn fa sabe all people an e wahn um fa know de trute.

⁵Cause dey ain bot one God, an dey jes one wa da lead people ta God. E de middleman tween God an people fa bring um togeda. Dat de man Jedus Christ.

⁶E done sacrifice e life fa set all people free fom sin. An dat sacrifice show all people, at de right time, dat God wahn fa sabe um all.

⁷An dat hoccome God pick me an sen me fa be e preacha an postle, fa laan dem wa ain Jew how fa bleebe pon Christ, an fa tell um de true way. A da tell ya de trute. A ain da tell no lie.

⁸A wahn man wa lib ebryweh fa pray. Dey mus be people wa done gii God dey life an wa da lib fa um. An wen dey hice op dey han fa pray, dey mus dohn be bex wid nobody an mus dohn wahn fa aagy.

⁹A ain wahn de ooman dem fa call tention ta deysef by de way dey dress. Dey mus dress sensible an deestent. Dey mus dohn weah dey hair fancy fa call tention ta deysef. An dey mus dohn weah fine gole or pearl dem or fine dress wa cost tommuch.

¹⁰Steada dat, dey oughta call tention ta deysef by dey good deed dat ooman wa woshup God oughta do.

¹¹Ooman dem mus tie op dey mout an pay mind fa true ta dem wa laan um.

¹²A ain leh no ooman teach, needa hab no tority oba de man dem. Ooman dem mus tie op dey mout.

¹³Cause fus God done mek Adam, fo e mek Eve.

¹⁴An de Debil ain ceebe Adam. Eve de one e ceebe. An Eve de one wa fall eenta sin ginst God.

¹⁵Bot ooman gwine be safe wen e da bon chile, ef e keep on da trus een Christ, an lob people, an pit God fus een e life, an ef e da lib deestent an ain call tention ta esef.