Read Gullah Philemon 1 Bible Online

Philemon 1 - Gullah bible

Philemon 1

¹A, Paul, wa een de jailhouse fa sake ob Jedus Christ, an we broda Timothy, da write ya, Philemon, we deah Christian broda wa da hep we een de wok.

²A da write too ta ya, Apphia, we sista, an ta Archippus, wa da wok long wid we een de fight. An A da write ta de bredren wa da meet dey een ya house.

³We da pray dat God we Fada an we Lawd Jedus Christ bless oona an gii oona peace een oona haat. De Lob an Trus ob Philemon

⁴All de time wen A da pray fa ya, A da tell me God tankya fa ya.

⁵Cause A yeh say ya lob all God people an ya da trus een de Lawd Jedus.

⁶A da pray dat de fait dat oona hab een de Lawd Jedus gwine hep oda people fa ondastan mo an mo bout de blessin dat God da gii we, wen we one een Christ.

⁷Wen A yeh how ya lob God people, A been full op wid joy an A tek courage fa true. Cause me Christian broda, ya done mek God people haat glad. Paul Aks Philemon fa Gii Onesimus Haaty Welcome

⁸So den, eben dough A got de tority fa chaage ya fa do wa ya oughta do, cause A Christ postle,

⁹stillyet, cause ob ya lob, A ain gwine do dat. A jes da aks ya, eben dough A Paul done ole an now A een de jailhouse fa sake ob de wok dat A beena do fa Jedus Christ.

¹⁰A da aks ya fa sake ob Onesimus, wa God done mek me own chile een Christ. Cause wiles A been een de jailhouse yah, A bring um fa trus een Christ.

¹¹Onesimus ain been no hep ta ya, bot now e able fa hep ya, an e kin hep me too.

¹²A da sen um back ta ya. A lob um sommuch dat e jes like me haat da gwine wid um.

¹³A been wahn fa keep um wid me yah fa hep me now wen ya ain wid me, wiles A een de jailhouse fa sake ob de Good Nyews ob God.

¹⁴Bot A ain keep um wid me yah, cause A ain know ef ya been fa gree fa um fa stay wid me. A ain wahn fa mek ya hep me een dis. A wahn ya fa hep me jes ef ya wahn fa hep me.

¹⁵Maybe God leh Onesimus lef ya fa leetle wile, so dat ya kin hab um back faeba.

¹⁶An e ain gwine come back ta ya jes like a slabe no mo. E mo den dat now. E ya deah Christian broda wa da come back ta ya. A lob um fa true, bot fa sho, ya gwine lob um mo den me now. Cause e da wok fa ya, an mo den dat, e ya deah broda een de Lawd.

¹⁷So den, since ya know we one een Christ, da wok togeda, ya oughta gii Onesimus haaty welcome, jes like ya been fa gii me haaty welcome.

¹⁸Ef e done do ya wrong or ef e owe ya sompin, chaage me fa dat.

¹⁹A Paul da write dis yah wid me own han. A gwine pay ya back wasoneba Onesimus da owe ya. A ain gwine taak bout de debt dat ya owe me. Ya owe me eben ya own sef.

²⁰Yeah, me broda, do me dis fabor, fa sake ob we Lawd. A ya Christian broda. Mek me haat glad.

²¹Wiles A da write ya dis, A sho dat ya gwine do wa A aks ya fa do. A know ya gwine do eben mo den wa A aks ya fa do.

²²One oda ting, A wahn ya fa git a room ready fa me. A da look fowaad, cause ob de pray dat oona all da pray ta God fa me, dat e gwine git me outta dis jailhouse so dat A gwine be able fa come ta oona gin. De Las Greetin

²³Epaphras, wa longside me een de jailhouse yah fa sake ob Jedus Christ, e tell oona hey.

²⁴Mark, Aristarchus, Demas an Luke, wa all da wok togeda longside me, dey tell oona hey too.

²⁵A pray dat de Lawd Jedus Christ gwine bless all ob oona.