Read Gullah Hebrew 10 Bible Online

Hebrew 10 - Gullah bible

Hebrew 10

¹De Jew Law show we bout dem good ting wa da come, bot e ain show we cleah bout how dey gwine be. E jes like a shada. E ain like de real ting dem. De people da offa de same kind ob sacrifice ebry yeah, oba an oba gin. Dem sacrifice ob de Jew Law ain neba gwine hab powa fa mek de people dat come ta God be all dat dey oughta be.

²Ef dem animal sacrifice been got powa fa true fa tek way de sin ob de people wa come fa woshup God, den de people ain been fa mek no animal sacrifice no mo. Cause ef de sacrifice been mek dey haat clean fom sin once an fa all time, dey ain been fa feel guilty fa dey sin no mo.

³Bot stead ob dat, de animal sacrifice wa de people da mek ebry yeah, dey da mek um memba dey sin.

⁴Cause de blood ob bull an goat ain got no powa fa tek way sin.

⁵Cause ob dat, wen Christ come eenta de wol, e tell e Fada God say,“Ya ain wahn people fa sacrifice no animal, needa offa ya gif. Bot ya done git a body ready fa me.

⁶Wen people bun op animal fa gii ya, wen dey mek sacrifice fa tek way dey sin, ya ain sattify wid dem ting.

⁷So den A say, ‘God, look pon me yah, A ready fa do wa ya wahn me fa do, jes like dey write bout me een de Book.’ ”

⁸Wen Christ say dem wod yah, fus ob all e say, “Ya ain wahn no sacrifice needa offrin. Ya ain wahn people fa bun op animal fa ya or fa mek sacrifice fa tek way dey sin. Ya ain sattify wid dem ting dey.” Christ say dem wod yah, eben dough de people beena do all dem ting dey, jes like de Jew Law say dey oughta do um.

⁹Den Christ say, “God, look pon me yah. A come fa do wa ya wahn me fa do.” So den, God pit way dat fus way ob dem sacrifice fa pay fa sin so dat e kin set op de secon way, da pit de sacrifice ob Christ een dey place.

¹⁰Cause Jedus Christ do wa God wahn um fa do, e offa op e own body as a sacrifice. Jes one time e mek dat sacrifice, an dat sacrifice got powa fa eba an eba. Dat sacrifice mek we all clean een God eye, an we God own people.

¹¹Ebry one ob de Jew priest dem da stanop an do e wok fa God, day atta day. Oba an oba gin, e offa op de same kind ob sacrifice, bot dem kind ob animal sacrifice ain neba able fa tek way people sin.

¹²Bot Christ offa op jes one sacrifice an dat sacrifice got powa fa tek way people sin faeba an eba. An wen e done offa op de sacrifice, e gone an seddown ta God right han.

¹³E da wait dey, da look fa de time wen God gwine stroy all e enemy an mek um like a footstool onda e foot.

¹⁴Cause wid jes one sacrifice wa Christ mek, e done tek de people wa e da mek holy, an e mek um all dey oughta be faeba an eba.

¹⁵De Holy Sperit, too, da show we dat dem ting yah true fa sho. Fus e say,

¹⁶“De Lawd say, atta dat time, dis de cobnant A gwine mek wid um.A gwine mek um know me law dem een dey haat, an A gwine mek um memba dem ting faeba.”

¹⁷Den de Holy Sperit say,“A gwine fagit faeba an eba de sin dey done, an how dey broke me law dem.”

¹⁸So wen God done fagib de people fa dey sin, dey ain got fa offa no sacrifice neba gin fa tek way dey sin. Leh We Come Nigh ta God

¹⁹Me bredren, cause ob Jedus blood wa e gii wen e dead pon de cross, we ain got fa be scaid eben a leetle bit. We kin go right eenta de place weh God dey.

²⁰Jedus sacrifice e body fa open op a nyew way. E body stan like de tick curtain wa hang eenside God House fa kiba de place weh God dey. (Dat tick curtain dey done teah fom top ta bottom wen Christ done dead pon de cross.)

²¹We got a priest wa mo den all de oda priest dem an e da rule oba God House.

²²So den, leh we go right een ta God. Wid all we haat leh we trus um fa true. Cause Jedus blood done clean we haat so we ain feel guilty no mo. An we e people wa done wash we body een clean wata.

²³Leh we stan scrong an neba gii op da hope dat we gwine git de ting dem wa we say we bleebe God gwine gii we. Mus dohn doubt eben a leetle bit, cause God promise we, an e gwine do wa e say, fa true.

²⁴Leh we study how we kin courage one noda fa show lob an do good.

²⁵An leh we keep on da meet togeda. We mus dohn folla some people ob de choch wa ain keep on da meet. Stead ob dat, leh we courage one noda. An leh we courage one noda mo den eba, cause we see dat de Lawd gwine come back soon.

²⁶Atta we know wa true, ef we still keep on da sin eben wen we know betta, dey ain no sacrifice no mo fa tek way we sin.

²⁷Ef a poson da sin dat way, e oughta be scaid cause e ain got nottin mo fa do bot fa wait fa God fa jedge um an fa de big fire wa gwine bun op dem wa da fight ginst God.

²⁸Ef a poson ain do wa de Law wa God gii Moses tell um fa do, an ef two or shree people gree da say dey shim wen e broke de Law, den de tority dem kill dat one dey. Dey ain hab no mussy pon um.

²⁹So den, oona oughta know, de one wa da spise de Son ob God, God gwine punish um mo fa true. Dat one dey da hole cheap Christ blood ob God cobnant wa tek way e sin, an e beena sult God Sperit wa hab mussy pon um. Dat one oughta git punish heap mo fa true, ainty dough?

³⁰Cause we know de Lawd God wa say, “A gwine punish people fa de ebil dey done. A gwine pay um back fa de bad ting dey done.” An noda time e say, “A de Lawd gwine jedge me people.”

³¹Ya haffa be scaid fa fall eenta de han ob de God wa da lib!

³²Bot memba how oona beena do, atta oona ondastan God way. Een dat time, eben dough oona beena suffa too bad, stillyet oona beena beah um an oona stanop scrong.

³³Some ob dat time dey, people beena hole oona cheap an mek oona suffa out een de open, een front ob oda people. An some oda time, oona been jine op wid oda Christian dem, da stan right side ob um wiles dey da suffa so.

³⁴Oona been saary fa de people een de jailhouse. An oona ain warry wen people tek oona propaty. Stead ob dat, oona still been joyful, cause oona know oona got sompin way mo betta den dat propaty dey. An wa oona got gwine las faeba an eba.

³⁵So den, mus dohn neba stop fa trus, cause dat gwine bring oona big blessin.

³⁶Oona haffa beah all ting, so dat oona gwine do wa God wahn, an den oona gwine git wa e promise oona.

³⁷Cause dey write een God Book say,“Jes a leetle mo time, den de one wa da come, gwine come. E ain gwine be late.

³⁸Bot de one wa da waak scraight, de one wa blongst ta me e gwine lib cause e da trus me.Bot ef e ton back an stop fa trus me, A ain gwine be heppy wid um, none tall.”

³⁹Bot we ain people wa ton back an den git stroy. We people wa trus God, so dat e sabe we.