Read Gullah Hebrew 3 Bible Online

Hebrew 3 - Gullah bible

Hebrew 3

¹So den, me Christian bredren, God call oona, too, fa be e own people. Oona mus keep on da study fa true pon Jedus. E de one wa God sen fa laan we bout God, an fa be de head priest wa da go ta God fa we, fa sake ob wa we say we bleebe.

²God pick Jedus fa do dat wok, an Jedus do all wa God wahn um fa do, jes like Moses done do wa God wahn um fa do, fa all dem wa blongst ta God House.

³E right fa people fa praise an hona de one wa build a house mo den dey praise an hona de house, ainty? Same way so, God look pon Jedus, say e right fa praise an hona Jedus mo fa true den fa praise an hona Moses.

⁴Fa sho, dey ain no house dat nobody ain build, bot God de one wa build all ting.

⁵So den, Moses been a wokman, a saabant wa do wa God wahn um fa do fa all dem wa blongst ta God House. An e beena tell de people bout wa Jedus been gwine say bye an bye.

⁶Bot Christ de Son wa hab chaage oba e Fada God House, an Christ do all wa God wahn um fa do. An we de people wa blongst ta God House, ef we da hole on ta we courage an set we haat pon all dat God promise e gwine do fa we. How fa Find Res een God

⁷So den, jes like de Holy Sperit da tell we say,“Taday, ef oona yeh God boice,

⁸mus dohn hab haad haat ginst God,like oona ole people been hab haad haat wen dey ton ginst God,dat time wen dey mek op dey mind fa test God dey een de desat.

⁹Dey, oona ole people beena test me plenty time fa see how long A gwine beah wid um,eben dough dey see wa A beena do fa foty yeah.

¹⁰Cause ob dat, A been bex wid dem people, an A say ‘All de time dey haat ton ginst me, an dey ain laan me way.’

¹¹A been bex wid um, so A promise fa true say: ‘Dey ain neba gwine go eenta dat place weh A been gwine gim res!’ ”

¹²Me Christian bredren, oona mus look out! Tek cyah dat nobody mongst oona got a haat wa wickity so e ain bleebe pon Christ an e ton e back pon God, wa got life wa ain gwine neba end.

¹³Bot oona mus courage one noda ebry day, long as “Taday” still dey een God Book fa we. Mus courage one noda all de time so dat sin ain gwine ceebe none ob oona an mek um hab sinful haad haat.

¹⁴Cause we all got we paat wid Christ, bot jes ef we memba fa set we haat fa true pon um, jes like we beena do wen we fus bleebe. We all got we paat wid Christ ef we ain neba stop fa do dat.

¹⁵Like dey write een God Book say,“Taday, ef oona yeh God boice, mus dohn hab haad haat ginst um,like oona ole people been hab haad haat wen dey ton ginst God.”

¹⁶Who de people wa been yeh God boice bot stillyet ton ginst um? Fa true, dey all dem people wa been slabe een Egypt, wa Moses done been lead outta dey an set um free.

¹⁷Who de people wa God been bex wid fa foty yeah? Fa sho, God been bex wid dem people wa sin, dem wa done dead dey een de desat.

¹⁸Wen God promise fa sho, say, “Dey ain neba gwine go eenta dat place weh A been gwine gim res,” who de people wa e beena taak bout? Fa true, God beena taak bout dem people wa ton ginst um, wa ain do wa e tell um fa do.

¹⁹So den, we see dat dey ain been able fa go eenta dat place weh God been gwine gim res, cause dey ain bleebe pon um.