Read Gullah Hebrew 8 Bible Online

Hebrew 8 - Gullah bible

Hebrew 8

¹Now de ting wa we da tell oona mo den all, dat we got susha head man ob de priest dem, jes like we beena taak bout. E Jedus, de one wa seddown at de right han side ob God shrone een heaben.

²Jedus da wok as head priest een de Mos Holy Place weh God dey. Dat de real tent ob woshup fa true, de tent wa de Lawd God pit op. No man ain pit um op.

³Ebry head man ob de priest dem, e been pick so dat e kin offa gif an sacrifice ta God. Same way so, we head man too mus hab sompin fa offa ta God.

⁴Ef Jedus been een dis wol now, e ain been fa be a priest tall, cause de priest dem een dis wol wa da offa gif ta God jes like de Jew Law say.

⁵De wok wa dem priest do, dat ain de real ting. Dat a shada wa da show wa op dey een heaben een de real woshup place weh God dey. Dat hoccome wen Moses been ready fa build de tent ob woshup weh dem priest been gwine do dey wok, God tell um say, “Ya mus be sho fa mek all ting jes de same way A been show ya wen ya been dey pon Mount Sinai.”

⁶So now we see dat God pick Jedus Christ fa do de wok ob a priest, an dat wok betta fa true, mo betta den de wok wa dem oda priest da do. Same way so, de cobnant wa Jedus mek tween God an people stan betta fa true, mo betta den de ole cobnant. Cause een dis nyew cobnant, God mek promise wa mo betta fa true den een dat ole cobnant.

⁷Ef dat fus cobnant been able fa do wa e need fa do, dey ain oughta been no need fa noda cobnant.

⁸Bot God been tell de people say, dey ain been do wa de fus cobnant say. Dat mek de Lawd God say,“De time da come wen A gwine mek a nyew cobnant wid de people ob Israel an wid de people ob Judah.

⁹Dis nyew cobnant ain gwine be like de cobnant A been mek wid de ole people, wen A tek um by de han fa lead um outta Egypt lan.Dem people ain do wa de cobnant A been mek wid um say dey oughta do, so A lef um an leh um go dey own way.”

¹⁰De Lawd say,“Wen de time come, dis de cobnant A gwine mek wid de people ob Israel.A gwine mek um study pon me law dem an mek um know um fa true een dey haat.A gwine be dey God, an dey gwine be me people.

¹¹De people ain gwine haffa laan dey neighba, needa dey broda no mo, fa say, ‘Ya mus come fa know de Lawd.’Cause dey all gwine know me. Dem wa low an dem wa high op dey all gwine know me.

¹²A gwine fagib dem ebil ting wa dey done. A ain gwine memba dey sin no mo.”

¹³Wen God say dis yah a nyew cobnant, dat mean fa say God done mek de fus cobnant too ole. An we know dat wasoneba done ole an ain fa be nyuse no mo, purty soon dat done done.