Read Gullah 1 John 5 Bible Online

1 John 5 - Gullah bible

1 John 5

¹De one wa bleebe dat Jedus, e de Messiah Christ, dat one God chile. An de one wa lob de fada gwine lob e chile too.

²Wen we lob God an do wa e chaage we fa do, dat how we know we lob God chullun.

³Cause we lob fa God mean dat we do all wa e chaage we fa do. An wa e chaage we fa do ain haad fa we fa beah.

⁴Cause de one wa God chile, e da win out ginst de wol. Fa true, we win out ginst de wol cause we bleebe pon Jedus.

⁵Who dat kin win out ginst de wol? De people wa bleebe dat Jedus God Son, dey de onliest one dem wa win out ginst de wol. De Witness Bout Jedus Christ

⁶Jedus Christ, e de one wa come by wata an by blood. E ain come jes by wata. E come by wata an blood, all two. God Sperit, e de witness. E mek we know wa true, cause de Sperit de trute.

⁷Dey shree witness [dey een heaben: de Fada, de wod an de Holy Sperit. All shree dem, dey one.]

⁸[An dey be shree witness een de wol]: God Sperit, de wata an de blood. All shree dem taak de same ting, da gree pon um.

⁹We wahn fa bleebe wa people say. Bot wa God say, dat way mo greata den wa people say. An God de witness, da say dis bout Jedus e Son.

¹⁰Ebrybody wa bleebe een Jedus God Son, dey got dat trute dey een dey haat. Bot ef somebody ain bleebe wa God say, dat one dey da say God ain taak de trute, cause dat one ain bleebe wa God say bout e Son.

¹¹De ting wa God say, e dis: God gii we de true life wa ain gwine neba end. An dis life een e Son.

¹²De one wa hab God Son een e haat, e got dis true life. Bot de one wa ain hab God Son een e haat, e ain got dat life. De Life wa Ain Gwine Neba End

¹³A da write dis ta oona wa bleebe pon de name ob God Son. A da write oona fa mek oona know, oona hab de true life wa ain gwine neba end.

¹⁴We trus God an bleebe dat wen we aks God fa sompin, e da yeh we.

¹⁵An wen we know e da yeh we wen we aks um fa sompin, we know e da gii we dat ting.

¹⁶Ef somebody see e broda sin, an dat sin ain a sin wa fa true gwine mek de sinna dead, e oughta pray fa dat broda, an God gwine gim life. Bot dey a sin wa gwine mek de sinna dead. A ain da tell oona fa pray ta God bout dat.

¹⁷Wasoneba people do wa ain right, e sin, bot dey a kind ob sin wa ain haffa mek de sinna dead.

¹⁸We know, no chile ob God da sin, cause God Son da keep um safe, an de ebil one cyahn do um no haam.

¹⁹We know we God own chullun, an de ebil one da rule oba all de wol.

²⁰An we know dat de Son ob God done come an mek we know de true God. We da lib een de God wa true, een e Son, Jedus Christ. Dis de true God an de life wa ain gwine neba end.

²¹Me deah chullun, mus dohn hab nottin fa do wid no idol.