Read Gullah 3 John 1 Bible Online

3 John 1 - Gullah bible

3 John 1

¹A John, de elda een de choch, da write ta me deah fren Gaius, wa A lob fa true.

²Me deah fren, A da pray say ya keep well an dat all ting da gwine fine fa ya, jes like all ting fine wid ya soul.

³A been too heppy wen some Christian broda dem come an tell me how faitful ya been ta de trute, jes like ya da waak een de true way.

⁴Ain nottin mek me mo heppy den fa yeh say me chullun da waak een de true way. We Oughta Hep We Christian Bredren

⁵Me deah fren, ya faitful fa true een wa ya da do fa de Christian bredren, eben wen ya ain neba been see dem.

⁶Dey beena tell de choch people bout hommuch ya lob um. E gwine be a good ting fa ya fa hep um git ready fa go on dey journey gin een de way dat mek God heppy.

⁷Cause dem bredren done set out pon dey journey fa sake ob Christ name, fa do e wok, an dey ain tek nottin fom dem wa ain bleebe pon God.

⁸So den, we wa trus een Christ oughta hep people like dem bredren yah. Cause dat way we da wok wid um fa de true way. Diotrephes an Demetrius

⁹A done write ta de choch, bot Diotrephes wa lob fa pit esef head ob de res ob de choch people, e ain pay no mind tall ta wa A tell um.

¹⁰So den, ef A come, A gwine taak bout wa e da do, da shrow slam at we. Bot dat ain nuff fa um. Wen Christian bredren come, e ain welcome um. An wen oda people wahn fa welcome um, e stop um, an e dribe dem wa wahn fa hep outta de choch.

¹¹Me deah fren, mus dohn folla de ebil way. Jes folla de good. De one wa da do good, e God chile, bot de one wa da do ebil, e ain neba see God.

¹²Ebrybody da taak, say Demetrius da do good. De trute esef tell we dat e do good. We da say e good too, an oona know we da taak de trute. De Las Wod een Dis Letta

¹³A got plenty ting fa write oona, bot A ain wahn fa set all dem down wid pen an ink.

¹⁴A hope fa come ta oona an see oona soon, an we gwine taak face ta face.

¹⁵Peace be pon ya. We fren dem yah da tell ya hey. An tell all we fren dey hey fa we, ebry one ob dem.