Read Gullah Revelation 15 Bible Online

Revelation 15 - Gullah bible

Revelation 15

¹Den op een heaben A see noda sign wa stonish me an mek me wonda. Seben angel been dey an dey come da bring seben bad ting fa tek ta de people ob de wol. Dem ting gwine mek people suffa too bad. Dey de las ting dem dat God gwine tek fa show people dat e bex too bad wid um.

²Den A see sompin wa look like a sea wa dey tek glass fa mek an mix op wid fire wa da bun eenside um. An da stan close ta de sea, A see dem people wa done been win out oba de beast an oba e statue an oba de numba ob e name. An dem people been hole haap wa God done gim.

³Dey beena sing de song wa Moses, wa da wok fa God, been sing an de song wa de Lamb been sing. De song say,“Lawd God wa got powa mo den all oda, ya wok dem big, an dey da stonish we.Ya de King wa da rule faeba an eba. Ya do wa right. Ya taak true all de time.

⁴Lawd, ain nobody wa ain gwine gii ya hona, Ain nobody wa ain gwine praise ya name.Ya de one true God. Dey ain no oda.All people ob all nation gwine come an woshup ya,Cause all people done see dat ya do right fa true.”

⁵Wen dem people done sing, A look an A see God House een heaben wid de place weh dey keep de cobnant wa God mek wid e people open op.

⁶Den outta dey come dem seben angel wa da bring de seben bad ting wa gwine mek people suffa. Dey been weah clean linen cloes wa beena shine. An gole sash been tie roun dey chest.

⁷Den one ob de fo ting dem wa got life gii de seben angel seben gole bowl. All de seben bowl dem been full op wid de wine wa da show dat God, wa da lib faeba an eba, been too bex wid um.

⁸God House been full op wid smoke wa show God powa an glory. An nobody ain been able fa go eenside dat place til de seben bad ting wa de angel dem been bring, done been done.