Read Hadiyya Qooccanchi Kitaaba 11 Bible Online

Qooccanchi Kitaaba 11 - Hadiyya bible

Qooccanchi Kitaaba 11

¹Uulli hundannem luxxeka hee'u minaadabina xale'i mat suum hee'u bikkina manni hundim matem sagara wocam hee'ukko.

²Ixxuwwim eelliinchi firoo kolliinsi ki'lla'a mattu'uuyyi mat biir beyyo Sanaa'oor uullanne siidda'a eekke'enne afuutto'o.

³Ixxuwwina'i ixxuwwim «Waallehe; mine baximmina awwaadoo xuuba hariinsi banxaa giirinne shokkiinsona» yaqqanto'o; ee'isinne mine baxxam xuuba siiddo'o; mat issita'a amaxxansitam leeyyam siiddo'o.

⁴Odim «Waallehe mat beero'o banxona; ee beyyonnem lud iimane afoo mine banxaa beero'i issinaa ni summa weeshinsona bagaan neese uulli hundannem binninoone» yito'o.

⁵Ee lasage Waa'i oo manni hananenne baxu iimane afoo minee beero'oo moo'eena diillukko.

⁶Waa'im «Kabadem ihukkaare ku minaadab hundim mat shumo'i ikko'i bikkinaa matem suumem woccam bikkinaa ixxuwwi mixxo'i luwwi hundam baximmina luxxaneme; ka'isinne baxxeena sawwito'i luwwi hundam issimma hooggamoyyo.

⁷Ee bikkina «Waallehe, neese dillinaa mat mullaannika sagara laqqambee'isa ixxuwwi suume hamaaransinona» yukko.

⁸Ee lasage Waa'i ixxuwwa uulli hundannem binnaa'ukko; ee beero'om baximma utto'o.

⁹Ee beyyonne minaadaphphi suume Waa'i hamaaransaa ee beyyiinsi uulli hundannem ixxuwwa binnaa'u bikkina ee beero'ik summi «Baabiloona»[4] yamamookko.

¹⁰Seem shumo'i kane. Bichchi wo'iinsi la'm hiinchi lasage Seem xibbi hiincho hee'aa Arfaakisaada yakkam beeto qarukko.

¹¹Ee lasage Seem onti xibbi hiincho hee'aa mulli ooso goonaa landaa qarukko.

¹²Arfaakisaadim sadee onti hiinchoo hee'aa lasage Saala'a qarukko.

¹³Ee lasage soor xibbee sas hiinchoo hee'aa mulli ooso goonaa landaa qaraa lehukko.

¹⁴Saala'am Sad hiincho hee'aa Eeboora qarukko.

¹⁵Ixxim ee lasage soor xibbee sas hiinchoo hee'aa mulli ooso goonaa landaa qaraa lehukko.

¹⁶Eeboor sadee soor hiinchoo hee'aa Faaleeqa qarukko.

¹⁷Ee lasage ixxim soor xibbee sad hiinchoo hee'aa mulli ooso goonaa landaa qaraa lehukko.

¹⁸Faaleeq sad hiincho hee'aa Ra'u qarukko.

¹⁹Ee lasage ixxim lam xibbee honsi hiinchoo hee'aa mulli ooso goonaa landaa qaraa lehukko.

²⁰Ra'u'um ixxek umur sadee lam hiinchoo ihaakkoohaannonne Saruuga qarukko.

²¹Ee lasage lam xibbee lamar hiinchoo hee'aa lehukko; mulli keenom goon oosoo landaa qarukko.

²²Saruug sad hiincho hee'aa Naakkoora qarukko.

²³Ee lasage lam xibbi hiincho hee'aa mulli ooso goonaa landaa qaraa lehukko.

²⁴Naakoor lamiyyee honsi hiinchoo hee'aa Taara'a qarukko.

²⁵Ee lasage ixxim mat xibbee tommoo honsi hiinchoo hee'aa mulli ooso goonaa landaa qaraa lehukko.

²⁶Taara'am lamarayyi hiincho hee'aa Abraama, Naakooraa Haaraanaa qarukko.

²⁷Taara'i shumo'i kane. Taara'a Abraama, Naakkooraa Haaraanaa qarukko; Haaraanim Looxa qarukko.

²⁸Haaraan qaramu uullannem Kalaawde'i [5] uullanne Uur beero'onne anniinsi gaassaa lehukko.

²⁹Abraamii Naakoorii meento eebbo'o; Abraam soora'a eebukko; Naakoorim Haaraan landichcho Milka'a eebukko; Haaraanim Yuskaaninaa Milka'anaa anni hee'ukko.

³⁰Soora'a alceennatte hee'llo'o; ee bikkina isena oos hee'ukkoyyo.

³¹Taara'a ixxi beet Abraamaa ixxi beetina beet hee'u Haaraan beet Looxaa ixxi beet Abraamina arette hee'llo'i Soora'aa amadaa ixxuwwinne maqirem Kana'aana mareena Kalaawde'i uulli Uura yakkam beero'iinsi firukko. Kaaraanannem afuurukko.

³²Taara'am lam xibbee onti hiinchoo hee'aa Kaaraananne lehukko.