Read Hadiyya Qooccanchi Kitaaba 12 Bible Online

Qooccanchi Kitaaba 12 - Hadiyya bible

Qooccanchi Kitaaba 12

¹Waa'i Abraamina «Ki uulliinsii ki qarmanniinsii kiyyanni miniinsii annanni ikkaa an kiina moo'isoommi uulla mare.

²Ki shumo'o fikkaannisoommo; lobakat minaadabam issoommo; maasse'oommome; ki summam lonsoommo; mulli minaadabinam at maassi ikkootto.

³Keese maasse'llam keeno anim maasse'oommo; keese duuntam keenom duumoommo; uullanne yoo minaadab hundim ki mashka'inne maasse'amookko» yukko.

⁴Abraamim Waa'i ixxena yukkisam Kaaraaniinsi firaa marukko. Ee ammane ixxek umur lamarayyee onti hiinchoo ihaa hee'ukko; Looxim Abraaminne maqirem marukko.

⁵Abraam, ixxi meentichcho Saaraayyee ixxi abbaayyi beet Looxii Kaaraananne hee'llu'uuyyi siiddo'i amaxxaa awwaadaanoo hundam amadda'a Kana'aana matto'o. Ixxuwwi Kana'aana affo'i ammanenne

⁶Abraam Seekeemanne yoo More yakkam hujuphphi haqqichchi beyyi afeebe'e marukko; ee ammane Kana'aa'n uulli manni ee uullanne hee'llo'o.

⁷Waa'i Abraamina moo'amaa «Ki shumo'ina ka uulla uwwoommo» yukko; ixxim moo'amu Waa'ina kiti'm beyyo baxukko.

⁸Ee lasage Beteeliinsi eelliinchi firoo kollonne yoo duunaam uullanne firukko; Beeteelaa eelliinchi aagoo kollonne Aay beero'om eelliinchi firoo kollonne issaa dukkaana kaasukko; ee beyyonnem Waa'ina kitima hincaa'akkam beyyo axisaa Waa'ina otossukko.

⁹Abraamim ee beyyiinsi ki'aa Neegeeba[6] marukko.

¹⁰Ihukkaarem Kana'aa'n uullanne qaanne'i aagu bikkina Abraam ee qaanne'i ammane higiseena qee'llaa woroo'n qararanne yoo Gibxi uulla marukko.

¹¹Abraam Gibxi uulla afeena hincaakkoohaannonne ixxi are Saaraayyena «At lobakata danaam meentichchotti ikkittisa an la'oommo.

¹²Gibxi uulli manni at i aretti ikkittisa laqqo'aare ki dano moo'lla'a eese shita'a keese uttamo.

¹³Ee bikkina ki mashka'inne eese shitambee'isinaa iinam eroomma issitamisinaa at ixxuwwina ‹An ixxena aayyatte› yihe» yukko.

¹⁴Abraam Gibxi uulla afu ammane Gibxi uulli manni ixxi are lobakata danaamotte ikko'isa moo'llo'o.

¹⁵Fari'oon gassaan Abraam are danaamotte ikko'isa moo'lla'a Fari'oon illagenne bitto'o. Meentichchoomam Fari'oon mine massito'o.

¹⁶Ise massu mashka'inne gereebba, laro, halla, gaameela'a, goon agidoo meenti agidoo uwwimminne Faari'oon Abraamina lobakat eroomma issukko.

¹⁷Ihukkaarem Abraam are Saaraayyi mashka'inne Waa'i Faari'oonannee ixxi gassaa'nnaannonnee jor jabbo eebukko.

¹⁸Ee lasage Saaraayye Abraam aretti ikko'isa la'aa Faari'oon Abraama weeshisaa «At eesenne ka kee'mmaalli luwwa mahina issitto? Ise ki arette ikko'isa mahina iinniinsi maaxxitto?

¹⁹At iina mahina «Ise iyyaayyatte» yitaa kuttitto? Anim ise i aroomina massona mahina cawwitto? Otto'o, ki are amaxxitaa mare» yukko.

²⁰Ee lasage Fari'oon Abraama, ixxi aree ixxena yoo luwwaa hundam ixxi gassaan geegeesoo'isina ijaajukkaare oo manni geegeesukko.