Read Hadiyya Qooccanchi Kitaaba 13 Bible Online

Qooccanchi Kitaaba 13 - Hadiyya bible

Qooccanchi Kitaaba 13

¹Abraam ixxi aree ixxena yoo luwwaa hundam amadaa Gibxi uulliinsi firaa Neegeeba yakkam uulla marukko; Looxim ixxenne maqirem marukko.

²Abraam lobakat horaa biraa worqaa goddaanchi hee'ukko.

³Ixxim Neegeebiinsi ki'aa beyyiinsi beyyo marukkuuyyi Beetee'l kollonne marukko; ixxim Beetee'l lambe'ennee Aay lambe'ennee yoo beyyo afukko; oo beyyim ixxi kanniinsi illageen dukkaana kaasaa wiiddanu beyyoo

⁴Moollannina kiti'm beyyo axisaa hee'u beyyoo hee'ukko; ee beyyonnem Waa'ina otossukko.

⁵Abraaminne maqirem Loox marukko; Looxinam lobakat hor, abaroosii baxaanii hee'ukko.

⁶Abraaminaa Looxinaa lobakat diinaxxi allaachchi hee'u bikkina lamim mateeyyoominne afuutteena xanto'oyyo; mashka'oomim ixxuwwi diinate mateeyyoominne allaattam beyyi hee'ukkoyyo.

⁷Ee mashka'inne Abraam diinate allaaraa'n lambe'ennee Loox diinate allaaraa'n lambe'ennee woc firukko. Ee ammane Kana'aa'n mannii Ferize'i mannii ee uullanne affutta'a hee'llo'o.

⁸Ee lasage Abraam Looxina «Neese abbaayyuwwi inkummi bikkina ki lambe'ennee i lambe'ennee odim i allaaraa'n lambe'ennee ki allaa'raa'n lambe'ennee joranchi hee'immi hasisooyyo.

⁹Ee bikkina annanni inkaa hee'nnummaare erane; ka uulliinsi doo'llitti kollo aa'llaa mat kollonne mare; anim mat kollonne maroommo» yukko.

¹⁰Loox Yoordaanoos daajji gadanonne yoo hixii wo'ii wo'mmaakkoo danaam qaala'i uulla asi'mmaa moo'ukko. Oo uullim Zoo'aa'l beero'onne afeebe'e Waa'i kaasu gannattisa te'im Gibxi uullisa wo'i wo'mmaakkoohan ihukkisa moo'ukko; eekkam moo'ukkok Waa'i Soddo'm beero'oo Gomo'l beero'oo bi'iseena illageenette.

¹¹Ee bikkina Loox Yoordaanoos daajji gadanonne yoo qaala'i uulla hundam ixxi gagina doo'llaa annanni ihaa eelliinchi firoo kollonne marukko; ee'isinne Looxii Abraamii annanni ikko'o.

¹²Abraam Kana'aa'n uullanne afuurukko. Ihukkaarem Loox qaala'anne yoo beero'uwwi lambe'enne afuurukko. Soddo'm beero'i gadanonnem dukkaana kaasukko.

¹³Ee doollenne Soddo'm manni Waa'ina ijaajantambee'i boqquwwaa baaxiilaanoo hee'llo'o.

¹⁴Loox annanni ihaa maraa lasage Waa'i Abraamina «Ka beyyiinsi ki'issaa hundem kollom danaamisa qoxxissaa moo'e.

¹⁵At moo'lloo uulli hundam an kiinaa ki shumo'inaa uwwoommo; doolli hundinam ki'nnuwwan ihookko.

¹⁶Ki shumo'o uulli shashsha'llisa dutisoommo; uulli shashshara ayyim xigeena xanoobee'isam ki shumo'im ee'isam xigakkeena xanakambee'an ihookko.

¹⁷Uullikam uullichchaa midaadoo taakke'llaa moo'e; ee uulla an kiina uwwoommo» yukko.

¹⁸Ee bikkina Abraam ixxi dukkaana ki'isaa Keebiroonanne yoo Maammire'i keesamaakkoo qilxo'uwwi gadanonne afuurukko; eekke'em Waa'ina kitima hincaa'oo beyyo baxukko.