Read Hadiyya Qooccanchi Kitaaba 14 Bible Online

Qooccanchi Kitaaba 14 - Hadiyya bible

Qooccanchi Kitaaba 14

¹Ee ammane Baabiloo'n adil Amraafeel, Eelaasaa'l adil Ariyook, Eelaa'm adil Kadoorlaa'oomeerii Gooyii'm adil Tiidi'aalii hee'llo'o.

²Oo soorem adilluwwim Mulli keeno onti adilluwwa qasimmina matto'o. Ixxuwwi qasseena matto'i ontem adilluwwim Soddo'm adil Beera'atte, Gamo'l adil Bersha'atte, Adaa'm adil Shini'aabatte, Xabooyii'm adil Sheemeebeerattee Xoo'aara yakkam Beelaa'i adilaa hee'llo'o.

³Odim oo ontem adilluwwim mateeyyooma qooccita'a kaba sooqixxi dambalaqa yakkam Siidii'm cebbanne edanta'a oranto'o.

⁴Oo ontem adilluwwim Kadoorlaa'oomeerina tommoo lam hiinchoo ijaajanta'a hee'lo'o. Ihukkaarem tommonnee saxxi hiinchonnee ijaajancha sabbo'o.

⁵Tommonnee soo'l hiinchonnee Kadoorlaa'oomeerii ixxenne mat ikko'i adilluwwii ixxuwwi gaadaaninnem waatta'a Raafayaa'm manna Ashitaaroot Qaarinaayiminne, Zuuza'i manna Haaminne, Eema'i mannim Sheewe'i Qiryaataaminne qasso'o.

⁶Ixxuwwi odim Hoor manna kaa'lla'a Seeyir duunanne hee'llam beyyiinsi udma'i tochchonne yoo Eelfaraananne afeebe'e qasso'o.

⁷Ee lasage ixxuwwi Qaadeesa yakkam oogato'i bu'i yoo beyyo waatto'o Ee ammane ee beyyik summi Eyinmiishiphooxa yakkaman hee'ukko; ixxuwwim Amaaleeq uulli hundam amaddo'o; Haxaxoon Taamaaranne hee'llo'i Amoore'i mannam kaa'llo'o.

⁸Ee lasage Soddo'm adil, Gomo'l adil, Adaa'm adilii Xabooyyi'm adilii Beelaa'i uulli adilluwwaa gaadaanoo wixxaa'lla'a Siidii'm cebbanne oranto'o.

⁹Oo keenim Eelaa'm adil Kadoorilaa'oomeerinne, Goyi'm adil Tidi'aalinne, Baabiloo'n adil Amraafeelinnee Ilaasaal adil Ariyookinnee ontem adilluwwim Soorem adilluwwinnem oranto'o.

¹⁰Ixxuwwi oramam hee'llo'i Siidii'm cebbanne leeyyinne wo'mmaakkoo dut bar hee'ukko. Ee bikkina Soddo'mmekii Gomo'llekii adilluwwi oriinsi gibbu'uuyyim ee balleewwanne ubbo'o. Ihukkaarem gatto'i sasem adilluwwim duunnuwwi kollonne gibbo'o.

¹¹Oo soorem adilluwwim Soddomannee Gomorannee siiddo'i luwwi hundam itakkam hurbaat gatoo'n bogga'a massito'o.

¹²Odim Soddomanne hee'am hee'u Abraam abbaayyi beeto Looxaa ixxena yoo amaxxaa hundam qeefadda'a massito'o.

¹³Ihukkaarem mat manchi fiikkaa waaraa ihu luwwi hundam Ibro'i uulli manchi hee'u Abraamina kurukko. Ee ammane Abraam hee'am hee'ukkok Maammire yakkam Amoore'i uulli manchi keesamaakkoo qilxo'i haqqi gadanonnette hee'ukko. Maammire, ixxi abbaayyuwwi Ashikoolii Aneerii Abraaminne maqire hidi'l sagara aaggo'oo gaaxxi besh hee'llo'o.

¹⁴Abraam ixxi abbaayyi beeto qeefadakka'a massakko'isa macceesaa lasage ixxi minenne qarantaa hee'llam orancha laqqam kee'nnekka sas xibbee tommoo sadeenti mannaa amadaa soorem adilluwwam Daana yakkam beyyi afeebe'e hollamaa marukko.

¹⁵Ixxim ee manna gaalchi gaalchinne baxxansaa lasage ee beyyonne ixxi awwaadaaninnem hiimonne oramaa kaa'ukko. Damasqo'iinsi hanaa'n qarinne yoo Hoobba'i afeebe'e hollukko.

¹⁶Qeefadamu luwwi hundam dabaraa worukko; ixxi abbaayyi beeto Looxam ixxi amaxxinnem dabaraa worukko. Ee'isam ixxuwwinnem meentoo mulli mannaa hundam dabaraa worukko.

¹⁷Abraam Kadoorlaa'oomeeraa ixxenne maqire hee'llo'i adilluwwaa kaa'aa gaadiinsi daba'llukkuuyyi Soddo'm adil «Adi'l cebba» yakkam Shaawwe'i cebbanne aa'eena firukko.

¹⁸Odim hundiinsi lob Waa'ina qeessichchi hee'u Malkaxeedeeqa yakkam Saalee'm adil Abraamina itoo hurbaataa woyi'n diqaasaa amadaa waarukko.

¹⁹Malkaxeedeeqim Abraamina «Iimanee uullaa hundam qooccu hundiinsi lob Waa'i Abraama maasse'ona.

²⁰Ki diina'a ki anganne higisaa uwwu hundiinsi lob Waa'i maasse'amona» yaa masse'ukko. Abraamim diina'iinsi qeefadaa eebu luwwi hundiinsim Malkaxeedeeqina tommiinsi mato uwwukko.

²¹Soddo'm adilim Abraamina «Xale'i manna iina dabattaa mulli luwwi hundam ki gagina massaqqe» yukko.

²²Ihukkaarem Abraam Soddo'm adilina «An iimanee uullaa qooccu hundiinsi lob Moollanni Waa'i illagenne hide'oommo.

²³At ‹Abraama goddaanchi issummok anette› yitoobee'isina ki luchchika gootto'i fatira te'im kobe'i muuncanam ihuta'n i gagina massoommoyyo.

²⁴Manni itu hurbaatiinsi bagaan ki luwwika ma'llichchom i gagina massoommoyyo. Ihukkaarem iinninne waatto'i manni Aneer, Eeshikoolii Maammiree ixxuwwi bikke massaqqitona» yukko.