Read Hadiyya Qooccanchi Kitaaba 15 Bible Online

Qooccanchi Kitaaba 15 - Hadiyya bible

Qooccanchi Kitaaba 15

¹Ee lasage Waa'i Abraamina kaaltinne moo'amukko. Waa'im Abraamina «Abraama, baddititte; an keesenne jor luwwi afoobee'isa kiina agir ihaa egeroommo; lobakat irifo'om uwwoommo» yukko.

²Ihukkaarem Abraam «Moollanni Waa'a! Iina oos bee'i bikkina i luwwa lago aa'ookkok Damaasqo'i Eeli'eezaratte; ee bikkina iina uwwitoo irifo'i maha issookko?

³Iina ooso uwwitbee'i bikkina i minenne qaramu awwaadaa'nnek mat i luwwa lago aa'eenatte» yaa dabarukko.

⁴Ee lasage odim Waa'i Abraamina «Ki gubeexxi qachchi ki luwwa lago aa'ookko bagaan ku manchi lago aa'ooyyo» yukkuuyyi macceesukko.

⁵Odim ee lasage Waa'i Abraama biir beyyonne fissaa «Hino'o iimane moo'e; iima'n boollaanka xiggeena xantoolas xige; ki shumo'im ee'isa ihookko» yukko.

⁶Abraamim Waa'anne amma'nnukko; oohim ixxena muccuroom ihaa xigamukko.

⁷Odim Waa'i Abraamina «At ka uulla lago aa'llona Kalaade'i manni uullanne yoo Uuriinsi awwonsaa fissummi Waa'i anette» yukko.

⁸Ihukkaarem Abraam «I Moollanni Waa'a! Ka uulla an lago aa'eena xanoommisa mahinne la'eena xanoommo?» yaa xa'mmukko.

⁹Waa'im Abraamina «Sas hiinchi addichcho, sas hiinchi fellakkichchi geexa, sas hiinchi gereechchi ambula, ee'isam handarekkichchoo handarekkichchi wotaraa amaddaa waare» yukko.

¹⁰Abraamim ee diinate hundam Waa'ina hincaa'aa annannichchom lam gudaanchonne diqaa lam ogoranne dissukko; ihukkaarem cii'a lam beyyonne diqukkoyyo.

¹¹Abraam diqaa dissu maara ammar iteena waarukkaare hollukko.

¹²Abraam maaro'i ballanne kee'mmaalli diriiro diriirukko. Lobakata baddisoo gambabbi tuunsim ixxonne ubukko.

¹³Waa'im Abraamina «Ki shumo'i manni uullanne waaraan ikka'a hee'llamisa la'e; ee uulli mannim ixxuwwa soor xibbi hiincho lobakata u'nnissu'uuyyi agiddanonne gassitamo.

¹⁴Ihukkaarem an ixxuwwa agiddano gassito'i minaadabanne oogatoommo; ee lasage lobakat amaxxa amadda'a fittamo.

¹⁵Ihukkaarem at lobakat doolle hee'llaa lasage xumminnem letaa waammantootto.

¹⁶Ki shumo'im soor qaranchiinsi lasage ka uulla daba'llookko; ee amman afeebe'e afamoo mashka'im Amoore'i mannik baaxii'l humbulli wo'mmeebe'ette» yukko.

¹⁷Eelliinchi aagaa uulli tuunsaa lasage midachchi wiriirii aphphoo giirii moo'amaa lamem ogorannem yoo maa'l lambe'inne higukko.

¹⁸Ee ayyaamom Waa'i Abraaminne «Gibxi uulli gabaliinsi ki'isaa lob Efiraaxiis daajjenne afeebe'e yoo uulla hundam ki shumo'ina uwwoommo.

¹⁹Ee'isam Qeene'i mannika, Qaaniiz mannika, Qaadmoo'n mannika,

²⁰Hiite'i mmannika, Fariiz mannika, Raafaayim mannika,

²¹Amoore'i mannika, Kana'aa'n mannika, Gergeese'i mannikaa Iyyaabuus mannikaa uulla ki shumo'ina uwwoommo» yaa hidi'l sagara aagukko.