Read Hadiyya Qooccanchi Kitaaba 16 Bible Online

Qooccanchi Kitaaba 16 - Hadiyya bible

Qooccanchi Kitaaba 16

¹Abraam meentichcho Saaraayye ooso qattoo'n hee'llo'o. Ihukkaarem isena Aggaare yakkam Gibxi uulli awwaadaancho hee'llo'o.

²Saaraayyem Abraamina «Oono'o, Waa'i eese ooso qaroombee'isa issaakko; ee bikkina ayyi la'ukko is kollinne ooso siideena xanoommi bikkina i awwaadaanchonne maqire iinse'e» yito'o. Ee bikkina Abraam Saaraayye wocco'i woshshanne iittamukko.

³Ee bikkina Saaraayye isena awwaadaanchotte hee'llo'i Gibxi uulli Aggaare Abraamina meentichchotte ikkona uwwito'o. Oohim Abraam Kana'aa'n uullanne tommi hiincho afuuraa lasagennette hee'ukko.

⁴Abraamim Aggaarenne eebaqqanchi edancha edamukko. Isem lamfooratte ikko'o. Ee lasage Aggaare lamfooratte ikko'isa laqqa'a Saaraayyenne bolxito'o; isem gaddo'o.

⁵Saaraayyem Abraamina «Eesenne afu hawwojji hundim ki hanenne ihona. Aggaare kiina uwwummok an i gagame; ihukkaarem ise lamfooratte ikko'isa laqqo'i ammaniinsi ki'isaa eese gaddo'ookko. Waa'i ki lambe'ennee i lambe'ennee oogatona» yito'o.

⁶Ihukkaarem Abraam Saaraayyena «Oono'o, ki awwaadaancho ki angannette; at hassittisa issiteena xantootto» yukko. Ee lasage Saaraayye Aggaare lobakata u'nnisso'i bikkina Aggaare Saaraayyeensi fiikkito'o.

⁷Waa'i asse'amaanchi udma'i uullanne yoo wo'i bu'i gadanonne Aggaare moo'ukko. Oo wo'i bu'oomim yookkok Shuura yakkam beyyo massoo gooqqi gadanonnette hee'ukko.

⁸Waa'i asse'amaanchim Aggaarena «Saaraayyena awwaadaanchi Aggaare, hanniinsi waattoolla? Handu mattoolla?» yukko. Isem «An i moollam Saaraayyeensi fiikkoommuulla» yito'o.

⁹Waa'i asse'amaanchim Aggaarena «Ki moollam beyyo daba'llitaa mattaa isena ijaajame» yukko.

¹⁰Odim Waa'i asse'amaanchi isena «Ki shumo'o lobakata fikkaannisoommo; ixxuwwam ayyim xigaa xanooyyo.

¹¹«Oono'o at lamfooratte ikkaatto; goonchi beetom qattootto; Waa'i at hawwitaa wi'llittoka macceesu bikkina beetika summa Isma'eela[7] yitootto.

¹²Ihukkaarem ixxi bii'l hallichchisa ihookko; ixxim manni hundam sabookko; ee'isam manni hundim ixxo sabookko; ixxim qarmanna sabaa annanni ihaa hee'ookko» yukko.

¹³Aggaarem ise atoorassu Waa'a «Eeliroo'ii»[8] yita'a weeshsho'o.

¹⁴Ee bikkina manni Qaadees lambe'ennee Baareed lambe'ennee yoo wo'i bu'ika summa «Bii'eer Laahay Roo'ii» yaa weeshukko. Eehid yimmim «Eese moo'oo hee'oo Waa'i bu'o» yimma.

¹⁵Aggaarem Abraamina goonchi beeto qatto'o; Abraamim beet summa «Isma'eela» yaa weeshukko.

¹⁶Aggaare Abraamina Isma'eela qatto'i ammane Abraam umur sadeentayyee loh hiinchoo ihaa hee'ukko.