Read Hadiyya Qooccanchi Kitaaba 17 Bible Online

Qooccanchi Kitaaba 17 - Hadiyya bible

Qooccanchi Kitaaba 17

¹Abraamina honsayyee honsi hiinchoo ihaakkoohaannonne, Waa'i ixxena moo'amaa «An hundam xanoommi Waa'a; hundi ammanem iina ijaajanchinne hanqo'i baxo baxe.

²An kiinninne maqire hidi'l sagara aagoommo; ki shumo'om lobakata fikkaannisoommo» yukko.

³Abraamim illillaachcha uullanne heeshaa otossukko; Waa'im

⁴«Kiinninne maqire aagoommi hidi'l sagar kane; an keese lobakat minaadabina anni issoommo.

⁵Ka balliinsi ki'isaa ki summi Abraama yamamooyyo. Ihukkaarem ki summi Abrihaama yamamookko; mashka'oomim keese lobakat minaadabina anni issoommo.

⁶An keese lobakata fikkaansoommo; lobakat minaadabam issoommo; adilluwwim kiinniinsi firookko.

⁷Ki lambe'ennee i lambe'ennee kiinniinsi lasonnem ki shumo'innee odim ixxuwwi shumo'innee heer heerinam hee'oo hidi'l sagara aagoommo; ee'isinnem kiinaa kiinniinsi lasagem ki shumo'inaa Waa'i ihoommo.

⁸At kaba koyyinanonne afuuttitti Kana'aa'n uulli hundam heer heerinam kiinaa ki shumo'inaa gaqqi uulli issaa uwwoommo; ixxuwwinam an Waa'i ihoommo» yukko.

⁹Odim Waa'i Abrihaamina «Atii ki shumo'ii iinninne maqire aaggitti hidi'l sagara qaranchiinsi qaranchi afeebe'e egellehe.

¹⁰Atii ki shumo'ii egettakkamisina kuroommi hidi'l sagar kane; ki'nnuwwi lambe'enne yoo goon hundim ballachchamona.

¹¹Ki'nnuwi hundim ki'nuwwika goo'n orachcho ballachchantakkamo; oohim i lambe'ennee ki'nnuwwi lambe'ennee yoo hidi'l sagarina mare'i ihookko.

¹²Ka lasage qaramoo goon oos hundim qaramu sadeenti ballanne ballachchamona; ee'isam ki minenne qaranto'i keenii mulli uulliinsi diinatinne bitaa'anta'a waatto'i agidii gattoo'n ee'isinne ballachchantona.

¹³Ki minenne qaramukkokii diinatinne bitaa'amukkokii hundim ballachchamona; ku ki'nnuwwi orachchonne ihoo ballachchanchi an ki'nnuwwinne heer heerinam aagoommi hidi'l sagarina mare'i ihookko.

¹⁴Goo'n orachcho ballachchamubee'i goon hundim iikka hidi'l sagara egerubee'i bikkina minaadaphphi lambe'iinsi annanni ihona» yukko.

¹⁵Odim Waa'i Abrihaamina «Kanniinsi eehid ki meentichchi summa ‹Saaraayye› yitaa weeshshitte. Ka balliinsi ki'isaa isek summi ‹Saara'atte›.

¹⁶Anim ise maasse'oommo; iseensim an kiina Goonchi beeto uwwoommo; lobakat minaadabinam amatte ikkona an ise maasse'oommo; is shumo'iinsim minaadaphphi adilluwwi qaramookko» yukko.

¹⁷Abrihaamim Waa'i illagenne heeshaa otossukko. Ihukkaarem ixxi wodanonne «Ixxi umur xibbi hiincho ihu manchi ooso qareena hinkid xanookko? Saara'akim umur honsayyi hiincho ihaakkoohaannonne ooso qatteena hinkid xantamo?» yaa osarukko.

¹⁸Abrihaam Waa'ina «Isma'eela maasse'llittaare i luwwa lago aa'eena xanooyyonnihe?» yaa xa'mmukko.

¹⁹Waa'im «Ee'isayyo; ki meentichcho Saara'a goonchi beeto qattamo; ixxi summam Yisaaqa yitaa weeshshootto; an ixxennee ixxi shumo'innee heer heerinam hee'oo hidi'l sagara aagoommo.

²⁰Isma'eel bikkina uunxittokam macceesaammo; ixxom maasse'oommo; ixxenam dut ooso uwwoommo; ixxi shumo'om lobakata fikkaannisoommo; tomminaa lam sullinaa anni issoommo; ixxi fikkaannam lob minaadab issoommo.

²¹Ihukkaarem waaroo hiinchonne kido'i ammanenne Saara'a kiina qattam Yisaaqinne maqire i hidi'l sagara qoxxisoommo» yukko.

²²Waa'i Abrihaaminne atooraraa lasage ixxeensi annanni ihaa iim firukko.

²³Abrihaam ee balla Waa'i ixxo ijaajukkisanne ixxi beet Isma'eela, ixxi minenne qaranto'okaa biiriinsi bitaa'anto'i agidoo edaa ixxi minenne hee'oo goon hundam ballachchukko.

²⁴Abrihaam ballachchamu ammane ixxek umur honsayyee honsi hiinchoo ihaa hee'ukko.

²⁵Ixxi beet Isma'eel ballachchamu ammane ixxek umur tommoo sas hiinchoo ihaa hee'ukko.

²⁶Lamim ballachchanto'ok matem ballannettem hee'ukko.

²⁷Ixxi minenne qaranto'i keenii biiriinsi bitaa'anto'i agidii matim gattoo'n goon hundim Abrihaaminne maqirem ballachchanto'o.