Read Hadiyya Qooccanchi Kitaaba 18 Bible Online

Qooccanchi Kitaaba 18 - Hadiyya bible

Qooccanchi Kitaaba 18

¹Waa'i Abrihaamina samgud ballanne Maammire yakkam manchi hujuphphi haqqi gadanonne yoo Dukkaa'n u'llummanne afuuraakkoohaannonne moo'amukko.

²Abrihaamim ixxi illagenne uullito'oo sas manna moo'ukko. Ee ammanem afuuru beyyiinsi ki'aa sasem manchi beyyom marukko; ixxim heeshaa ixxuwwa xummaatisukko.

³Abrihaamim «I Moollanna! Ki illagenne an nuura siidaammoohan ihulas eese ki awwaadaancho uttaa higgitte.

⁴Lokko aanshaqqitakkam wo'o eeboommaare aanshaqqehe; ka haqqi hafannem usheexxehe.

⁵Ki'nnuwwina awwaadaanchi ihummi i beyyo waattakkolas ki'nnuwi taakkina hara'mmoo hofqax hurbaatam hincaa'oommo» yukko. Ixxuwwim «Erane, at yitittisam isse» yito'o.

⁶Abrihaamim qaqqisaa Dukkaa'n woro maraa Saara'ana «Qaqqise, qamika sas keennaancho qufissaa qorosho'o sare» yukko.

⁷Ee lasage Abrihaam la'l beyyo geeraa maraa mat xaboot wee'ichcho doo'llaa ixxi awwaadaanchi gudisoo'isina uwwukko; ixxim qaqqisaa duraa gudisukko.

⁸Ee lasage Abrihaam gi'inaakkoo adoo maaraa haqqi hafanne afuutto'i beyyonne massaa uwwaa uullaa itisukko.

⁹Ixxuwwim ixxena «Ki meentichcho Saara'a hannonnette?» yita'a xa'mmito'o; ixxim «Ise dukkaa'n woronnette» yukko.

¹⁰Ixxuwwiinsim mat «Kaballi hiincho kido'i ammanenne hanqo'isam an ki beyyo daba'llaa waaroommo; ki meentichcho Saara'am goonchi beeto qattamo» yukko; Ixxi ka woshsha wocoo ammane Saara'a ixxi afareen yoo dukkaa'n goocanne uullita'a macceessam hee'llo'o.

¹¹Abrihaamii Saara'aa lamim hore'em lobakata lomma'nnita'a hee'llo'i bikkina meentiinsi agananne agananne waaroo luwwi Saara'aansi uullaa hee'ukko.

¹²Saara'am is wodanonne «Anii i goonchii lamim lomma'nninaa lasage iina kido'i liiranchi hee'eena xanoohonnihe?» yita'a sawwito'o.

¹³Moollannim Abrihaamina «Saara'a ‹An lomma'nnaa lasage hinkid qachcho qareena xanoommo?› yita'a osatto'ok mahinatte?

¹⁴Hanqinam Moollanna kaa'oo luwwi yoohonnihe? Ka balli hiincho kido'i ammanenne daba'llaa waaroommo; Saara'am goonchi beeto qattamo» yukko.

¹⁵Saara'a baddito'i bikkina «An osarummoyyo» yita'a laggo'o. Ihukkaarem ixxi «At hanqinam osattaatto» yukko.

¹⁶Ee lasage oo manni matteena ki'llo'o; ixxuwwim Soddo'm beero'o aad asi'mmitam beyyo affo'o; Abrihaamim ixxuwwa geegeeseena marukko.

¹⁷Moollannim «Hanqinam an isseena sawwummi luwwa Abrihaamiinsi maaxoommonnihe?

¹⁸Hanqinam Abrihaam shumo'i malaayyaamoo lob minaadabaa ihookko; uulli minaadab hundim ixxi mashka'inne maasse'amookko.

¹⁹Xabbeenaa hanqo'anee ihu luwwa issimminne Waa'ika googo egettamisina ixxi oosoo ixxi abaroosaa sogimminne awwonsoo'isina an ixxo doo'llaammo; ixxi oosimdu eekka issitolas anim ixxena uwwummi neeyyato wonshoommo» yukko.

²⁰Moollannim Abrihaamina «Soddomannee Gamorannee hee'llam mannik jolli lobakkata lophphukkisa macceesaammo; ixxuwwi baaxiilim lobakata kee'mmaakko.

²¹Ixxuwwi bikkina macceesummi luwwi hundim hanqi ihukkisa la'eena ixxuwwi beyyo dilloommo» yukko.

²²Abrihaam Moollanninne uullukkisam lamem mannim utta'a Soddo'm kollo matto'o.

²³Abrihaamim Waa'i kollonne hincaa «Hanqinam muccur keeno baaxiilaaninne maqirem bi'issoohonnihe?

²⁴Ee beero'onne ontayyi muccur manni hee'uta'n beero'i hundam bi'issoohonnihe? Ee beero'onne yo'i ontayyi muccur manna gatisimmina beero'oomina urimma issitooyyonnihe?

²⁵Uulli hundannem xabbeenoominne oogattoo at hanqinam muccur keeno baaxiilaaninne maqirem hinkid shitootto? Eehid ihoone; eehido'is kiinniinsi qee'llona» yukko.

²⁶Moollannim «Soddo'm beero'onne baaxiilo baxxobee'i ontayyi muccur manna siidumta'n an ixxuwwi bikkina yaa ee beero'o hore'em bi'isoommoyyo» yukko.

²⁷Odim Abrihaam «An buchchaa gii'l buchchaa ihaammoo awwaad bee'i manchi i Waa'inne iggaa wocummi bikkina uraammo yihe.

²⁸I Waa'a! Ontayyi muccur keeniinsi onti xa'uta'n beero'i hundoomam ee xa'u kee'n bikkina bi'issoohonnihe?» yukko. Moollannim «Soree onti muccur mannaa siidumta'n ee beero'o hundoomam bi'isoommoyyo» yukko.

²⁹Odim Abrihaam «Ayyi la'ukko sor muccur manni hee'llota'nnahe?» yukko. Waa'im «Sore hee'llota'n bi'isoommoyyo» yaa dabarukko.

³⁰Ixxim «I Moollanna! Odim wocoommo quuqqitte; eehanniinsim sad muccur manni xale'i hee'llota'nnahe?» yukko. Waa'im «Sade hee'llota'n bi'isoommoyyo» yaa dabarukko.

³¹Abrihaamim «I Waa'a! Kiinninne maqire iggaa wocummi bikkina uraammo yihe; ayyi la'ukko xale'i lamiyyi hee'llota'nnahe?» yukko. Waa'im «Lamiyyi manni hee'llota'n ixxuwwi bikkina yaa ee beero'o bi'isoommoyyo» yukko.

³²Ixxim «I Moollanna! Mataagge xale'e edaa wocoommo quuqqitte; eehanniinsim tommi xale'i hee'llota'nnahe?» yaa xa'mmukko. Waa'im «Tommi manchi hee'llota'n ixxuwwi bikkina yaa ee beero'o bi'isoommoyyo» yukko.

³³Waa'im Abrihaaminne atoorachcha guullaa lasage ee beyyiinsi marukko; Abrihaamim ixxi mine daba'llukko.